VOV4.K’ho – Nam 2011, Bộ Chính trị khoá 11 tơlik Chỉ thị sồ 03 bè “Pơn jat tai sơlơ chồl pràn bơsram mờ lơh jat krơh Bác Hồ”. Mơya tơnơ\ 5 nam lơh jat, cồng nha lơh geh ờ hềt jat bè bơta kơp kờ`. Den tàng, nam 2016, Bộ Chính trị khoá 12 tơlik Chỉ thị sồ 05 bè “Sơlơ chồl pràn bơsram mờ lơh jat nùs nhơm, rài kis Bác Hồ”. Bulah pa rơp 3 nam, mơya ală cồng nha kuơ màng neh geh ai go\ ngan ngồn, lơh gơs bơta tam gơl niam tàm jơnau git wă mờ broă lơh tàm gùt Đảng, tàm ală mpồl lơh broă chính trị mờ tàm làng bol.

Tơnơ\ 5 nam lơh jat Chỉ thị sồ 03, bơh nam 2011 tus nam 2016, uă bơta ờ niam neh geh ai tơnggo\. Hơ\ là lơh jat Chỉ thị ờ hềt gơ gơs là broă lơh sùm, ờ hềt crơng gơs jơnau git wă lơh jat is bơh kuang bàng, cau geh Đảng dê, ngan là cau atbồ; tàm uă tiah kung gam sền do bè dùl srơh, dùl dơ\ lam sồr; bơyai lơh bơsram uă mơya lơh jat den ờ huan uă. Hơ\ là, cau atbồ, kuang bàng tờm ngan, kuang bàng, cau geh đảng, công chức, viên chức ờ hềt tơnguh uă kơnòl lơh krơh, ờ huan pơlam tàp, ờ lam lài tàm broă lơh mờ rài kis, lơh gơmù bơta pin dờn bơh làng bol dê gơwèt mờ Đảng. Broă lơh jat ngan ngồn mờ lam lơh ală khà tơl nùs nhơm, cih mat dan bơsram mờ lơh jat krơh Bác Hồ tàm uă tiah kung gam mìng là tàm sră pơ àr, ờ hềt ngan ngồn. Broă lơh mblàng yal bè lơh jat Chỉ thị ờ hềt niam, ờ hềt geh bơta gơ hòi gơ jà, ờ hềt lơh gơlik bơta gơ rề pràn bơh ală cau geh pơn rơ jak tàm Đảng mờ mpồl bơtiàn; broă lơh sền sơwì tàm uă tiah, uă mpồl lơh broă ờ hềt geh lơh sùm, ngan là tàm tu\ lồi tơngai lơh broă, ờ hềt lơh geh jơnau kờ` tơrmù bơta ờ niam bè nùs nhơm chính trị, rài kis mờ ală tìs sa kuề sa kùa, bơta ờ niam. Tàm dùl bơta ndai, Giáo sư, Tiến sỹ Khoa học Phan Xuân Sơn, Học viện Chính trị dà lơgar Hồ Chí Minh mblàng lơh loh bè do:

“Bol he ờ hềt lơh jat jơh tơngume bơh Chỉ thị dê; lơh jat, bơsram mờ lơh jat nùs nhơm Bác Hồ tơnơ\ do bơ tơl tai nùs nhơm, rài kis Bác Hồ. Bè hơ\, bol he bơsram ờ mìng geh nùs nhơm, gùng dà bơsong broă lơh, gùng dà lơh broă, bơta chài boh bơr mờ làng bol, gùng dà broă lơh cribơyai mờ kuang bàng, bơta chài lơh broă tàm dơlam, hờ bơdĩh. Bơta do tàm Bác Hồ là niam ngan. Dơ\ 2 tai là geh bơta ờ niam tàm broă lam lơh. Bol he geh tu\ gam sền dờng màng bơta đah bodĩh, pơn yơu bè đơs den uă, jơnau đơs hơ\ sồng pơr lòng uă. Mơya kờ` pal sền sơwì cau bơsram git wă bơta lơi, ai tơng go\ bè lơi, khà tơl lơi nàng sền sơwì mờ ai tơnggo\ mờ broă lơh bè lơi tàm mpồl bơtiàn, ală bơta do bol he ờ hềt sền gròi. Bè hơ\, broă lam lơh bơsram mờ lơh jat nùs nhơm Bác Hồ pal ngan ngồn, lơh geh cồng nha, ờ go\ di lơh jat bơta srơh tàm pơr lòng”.

Bơsong ală bơta ờ niam do, nam 2016 do, Bộ Chính trị khoá 12 tơlik Chỉ thị sồ 05 bè “Sơlơ chồl pràn bơsram mờ lơh jat nùs nhơm, rài kis Bác Hồ” mờ broă đơs tờm pràn rlau tai bơta kuơ màng, gơnoar broă, bơngă bơh broă bơsram Bác Hồ gơwèt mờ broă lơh bơt bơtàu Đảng dùl bă tơl làm, jơh bal bè chính trị, nùs nhơm, broă lam lơh mờ rài kis; mờ broă đal git, bơsram mờ lơh jat nùs nhơm, rài kis Bác Hồ là dùl tơngume kuơ màng bơh broă lơh bơt bơtàu, lơh niam wơl Đảng. Bộ Chính trị kung sồr, lơh jat Chỉ thị sồ 05 gơ jat bal mờ lơh jat Nghị quyết dà lơgar 4, khoá 12 bè kơryan, tơrmù bơta ờ niam bè nùs nhơm chính trị, rài kis mờ ală tơng go\ “lơh gơlik is”, “tam gơl is” tàm dơlam is mpồl dê, sơlơ chồl pràn broă rơcang sơndră sa kuề sa kùa, hoàc huơr, pơ hề pơ hà.

Ồng Nguyễn Túc, Ủy viên Đoàn Chủ tịch Mặt trận dà lơgar Việt Nam đơs là, Chỉ thị sồ 05 geh ai tơlik mờ lam lơh jat, gơ jat bal mờ Nghị quyết dà lơgar 4, khoá 12 neh cèng wơl mơ cồng nha niam ngan tàm broă lơh bơt bơtàu, lơh niam wơl Đảng. Đảng neh khin cha, song dơpă bơsong, lơh glài krà` ală kuang bàng cau geh Đảng lơh tìs, sa kuề sa kùa, geh broă lơh ờ niam, kờp bal là cau geh Đảng hơ\ geh gơnoar broă dờng kàr lơi. Gùng dà broă lơh mờ nùs nhơm lơh ngan “Ờ geh tiah kơryan, ờ geh bơta bơdĩh mờ bơta pal jat” tàm broă sơlơ tơnguh rlau tai kơrnuat lơh broă tàm Đảng, tàm broă sơlơ sền gròi rlau tai gơnoar broă, neh tơnguh tai bơta pin dờn bơh làng bol dê gơwèt tus mờ Đảng. Jat ồng Nguyễn Túc, bơta hơ\ neh ai go\ loh làng nùs nhơm Bác Hồ dê bè bơt bơtàu, lơh niam wơl Đảng: 

“Bol he geh gùng dà broă lơh, geh nghị quyết mơya broă lơh den ờ hềt tus gùng tus dà, mơya bơta lơh ngan ờ hềt tơl. Bol he kah tus Bác Hồ neh bơto tơngkah là, gùng dà 1, broă lơh 10 mờ bơta lơh ngan pal 20. Bơh pơrjum dà lơgar 4, khoá 12 a` go\, nùs nhơm hơ\ bơh Bác Hồ dê neh geh ai tơnggo\ loh làng ngan. Bơh khà kuang bàng gơwèt dà lơgar atbồ gơtìp lơh glài, kờp bal mờ lơh glài hình sự neh tơnguh tai bơta pin dờn bơh làng bol dê”.

Tàm Chỉ thị sồ 05, Bộ Chính trị đơs tờm uă ngan tus gơnoar broă bơh cau atbồ dê. Hơ\ là, pal “bơt bơtàu mpồl kuang bàng, ngan là mpồl kuang bàng kấp dờng màng pal geh tơl pràn jak, geh nùs nhơm, di mờ kơnòl broă geh jàu”; tơnguh uă kơnòl git is bơsram lài, lơh jat lài nàng lơh krơh bơh cau atbồ mờ kuang bàng tờm ngan, bơh kuang bàng, cau geh Đảng dê tàm broă bơsram mờ lơh jat nùs nhơm, rài kis Bác Hồ. ală bơta pa kuơ màng bơh Chỉ thị sồ 05 cèng wơl ală cồng nha niam tàm ngan ngồn. Kuơ màng ngan rlau jơh là bơh sơn rờp neh gơtùi kơryan bơta ờ niam bè nùs nhơm chính trị, rài kis mờ ală tềl tơnggo\ “lơh gơlik is”, “tam gơl is” tàm dơlam is mpồl. Lơh gơs bơta tam gơl niam bè git wă mờ broă lơh tàm Đảng, tàm ală mpồl lơh broă chính trị bơh dà lơgar tus kấp hơ đơm, tàm ală tiah tàm gùt lơgar. Jơh ală, mìng mờ jơnau kờ`, bơsram Bác Hồ - lơh jat Bác Hồ, mờ neh geh uă broă lơh bơceh pa, uă mpồl cau, cau dùl nă să geh pơn rơ jak.

Mờ jơnau đơs “Rơcang lài, geh kơnòl; đơs gơ jat bal mờ lơh; sră wơl nùs nhơm kơp gơn”, càr Cao Bằng là dùl tàm ală tiah bè hơ\. Ală kấp ủy, mpồl duh broă Đảng, ală tiah, anih lơh broă, mpồl lơh broă tàm Cao Bằng ai tơlik tơl broă lơh ngan ngồn, tơr gùm bơsong ală bơta geh sền gròi uă, ală jơnau ờ suk, bơta ờ niam, ờ pràn bơh [òn lơgar, bơh anih lơh broă, mpồl lơh broă dê, bơt bơtàu khà tơl nùs nhơm, gùng dà lơh broă, kơnòl lơh krơh bơh kuang bàng, cau geh đảng dê; mblàng yal ală  broă lơh niam, bơceh pa, krơh cau niam, broă niam, bơta niam tàm broă bơsram mờ lơh jat nùs nhơm, rài kis Bác Hồ, lơh gơs bơta gơ rề làm bă tiah… Ală chi bộ kấp hơ đơm lơh jat ngan ngồn ală tơngume bơsram mờ lơh jat Bác Hồ tàm dơ\ pơrjum chi bộ pah nhai, pơgồp bal mờ kơnòl chính trị bơh anih lơh broă, mpồl lơh broă mờ kơnòl broă bơh tơl nă cau dê.

Ală broă lơh mờ nùs nhơm lơh ngan hơ\ neh cèng wơl uă broă lơh pa, bơceh pa, geh cồng nha tàm bơsram mờ lơh jat Bác Hồ tàm càr Cao Bằng bè: broă lơh “4 ờ”, “Pah ngai bơsram dùl jơnau Bác Hồ bơto sồr” tàm Đảng bộ ling klàng càr; bơt bơtàu gùng dà lơh broă kuang àng làng bol geh nùs nhơm, lơbơn niam, tài làng bol mờ drơng lơh tàm Đảng bộ kuang àng càr; “Bơt bơtàu [òn dờng àng, tơlir, sàng kloh, niam bơne\, gơguh jak” tàm Đảng bộ [òn dờng Cao Bằng; “Rềp làng bol, iat, boh bơr mờ làng bol; bơsong jơh ală jơnau sồr, bơta kơp kờ` dipal bơh làng bol dê” tàm Đảng bộ kơn hoàl Hoà An. Ồng Triệu Đình Lê, Phó Bí thư Thường trực Tỉnh ủy Cao Bằng pà git:

“Uă kấp ủy ngac ngar, bơceh pa, lơh ngan uă tàm broă lơh jat, đal git loh tơngume tam gơl pa. Khin lơh broă kal ke nàng bơsong. Geh ngai sơlơ uă mpồl cau, cau dùl nă să geh pơn rơ jak tàm bơsram mờ lơh jat Bác Hồ. Pa do, càr Cao Bằng neh jờng rơ 185 mpồl cau, 305 nă cau dùl nă să. Bơta dờng ngan rlau jơh là pơgồp bơnah kuơ màng tàm broă lam lơh geh cồng nha kơnòl chính trị, bơtàu tơnguh lơh sa mpồl bơtiàn bơh càr dê, tơnguh bơta pin dờn bơh làng bol dê gơwèt mờ ală kấp ủy, gơnoar atbồ tàm [òn lơgar”.

Cau mblàng K’Duẩn