Lồi nam, hìu lơh phan bơh Kông ty Kổ phần gar điều Hải Bình Gia Lai, ƀòn dờng Pleiku, càr Gia Lai ờ ru ngan mờ broă coh gar điều nàng tăc di Satềp. Ồng Hoàng Văn Quang, ala măt Kông ty pà git, kung là gar điều ờs mờng bơh ală tiah tam tàm càr dê sơl, mơya phan bơh kông ty geh khà OCOP 4 sơrmañ, gam wèt tus khà 5 sơrmañ, là kơnờm mờ broă lơh is: gar điều coh mờ lòng. Phan neh mờng ngan mờ kung krơi is ngan neh dong kờl kông ty rề ơnàng drà kă bro, geh bal tàm lơgar bal mờ tăc mờ lơgar bơdìh: “Mpồl lơh sa kă bro kung geh ală bơta ƀuơn. Hơ̆ là broă tăc mờ lơgar bơdìh geh tam gơl loh làng ngan pơn drờm mờ ală nam lài. Ală gah lơh broă bal tàm ală lơgar câu Âu mờ ală lơgar tàm tiah đah jum măt tơngai lik câu Á ndai kung neh rơcang tus jòi nàng rề ơnàng drà kă bro tăc phan mờ lơgar ndai sơl. Nàng di pal mờ ală jơnau kờñ tăc phan mờ lơgar ndai dê, mpồl lơh sa kă bro kung gam lơh ngan lơh geh ală jơnau kờñ dờp kấp dờng rơlao, gơguh jăk rơlao”.

Tus jơh nam 2024, tiah Tây Nguyên neh geh rơlao 1 rơbô 300 phan OCOP geh dờp bơh 3 tus 5 sơrmañ. Phan OCOP Tây Nguyên ờ mìng là bơta niam bơh nùs nhơm lơh broă mờ bơceh lơh, mờ gam là jơnau pơnyờ să ngan bè ù tiah geh uă bơta niam chài krơi is, bè phan :ce hoa vàng”, OCOP 3 sơrmañ kơnhoàl Krông Păc, càr Dăk Lăk dê.

Ồng Nguyễn Ngọc Quỳnh, cau lơh gơs phan do pà git, bơh jŏ, ồng neh iăt bè bơta kwơ bơh phan do, den tàng tŭ git tàm brê bơnơm Tây Nguyên geh ală mpồl ce hoa vàng tàm do, ồng neh bơtàu tơnguh lơh gơs phan. Tơnơ̆ mờr 10 nam tam, ồng neh geh 3 rơbô tờm tàm bă ù ơnàng 2 lồ, nàng mŭt tàm tơngai lơh gơs phan kă bro. Ồng Quỳnh pà git: “Añ git là lơgar Việt Nam he geh uă ngan phan geh lơh bơh broă lơh sa suơn sre geh kwơ, tàm hơ̆ uă ngan là ală bơta tờm chi lơh sơnơm. Mờ nùs nhơm kờñ gơboh mờ dà lơgar, añ kờñ gàr niam mờ bơtàu tơnguh tai, mờ lơh geh uă tus mờ làng bol tàm do, hòi jà ală cau sền gàr tờm chi lơh sơnơm do, lơh geh dùl bơta niam uă mờ sền gàr tiah kis bơh să tờm he dê bal mờ ală cau gùt dar”.

Gơboh kờñ, pơnyờ să mờ lơh lơh ù tiah geh uă bơta niam chài krơi is, uă bơta bè phan geh is chi che, mò Lê Thùy Kim Loan, kwang lam bồ Kông ty Kổ phần Pyloheb tàm càr Kon Tum neh geh bơsal mờ 15 bơta phan geh sră dờp phan OCOP. Jăt mò Lê Thùy Kim Loan đơs, lơh ală bơta phan bơh kông ty dê ndrờm geh lơh bơh chi lơh sơnơm bơh tàm brê is geh. Làng bol kis tàm ală thôn ƀòn tiah kơh bơnơm ñhoa kơnhoàl Kon Plông mờ Đăk Glei, càr Kon Tum là ală cau ai ală bơta chi lơh sơnơm geh bơta niam uă nàng lơh. Den tàng, tơl phan OCOP ndrờm geh broă pơgồp bal bơh mpồl bơtiàn dê: “Sră dờp phan OCOP là cơng tàng ai phan geh uă bơta niam chài krơi is ù tiah dê. Tŭ geh dờp OCOP, bol añ gŏ là phan bơh bol añ dê geh ală bơta krơi is, bơh chi lơh sơnơm uă, phan lơh tus mờ lơh broă ndrờm tus bơh ù tiah do dê. Tem OCOP ai tàm càr Kon Tum  neh ai tơngŏ phan lơh sơnơm krơi is bơh tiah do dê”.

Bơh phan geh is là ală phan phan geh lơh bơh broă lơh sa suơn sre mờng ngan, mơya mờ nùs nhơm kờñ gơboh, pơnyờ să bè phan geh lơh bơh ƀòn lơgar dê, tơl nă làng bol kis tàm Tây Nguyên neh lơh geh ală bơta phan OCOP krơi is geh uă bơta bơkah, bal mờ rùp rài bơh ù tiah dê. Ală cồng nha bơh broă lơh tơl sàh dùl bơta phan tàm do pà gŏ bơta geh uă bơh broă pơgồp bal bơta niam chài krơi is ƀòn lơgar dê mờ bồ tơngoh tam gơl pa. bơta do ờ mìng pơgồp bal tàm broă tơnguh uă rài kis làng bol dê, mờ gam lơh geh uă nùs nhơm pơnyờ să bè Tây Nguyên dê mờ tam gơl pa sùm.