Tàm nùs nhơm ờ ru ngan ală ngai lồi nam, mat kă bro kơphê Miss EDE tàm ƀòn dờng Buôn Ma Thuột, càr Dăk Lăk neh geh dơ̆ jun pơndiang phan neh lơh gơlik sơn rờp tăc tus lơgar Mỹ. Hơ̆ là 18 rơbô tấn kơldung kơphê chàng măi gơ gơs phan bơna ơn tàm kơldung tàm lơgar Việt Nam dê, blơi bơh mpồl lơh sa kă bro tàm tiểu bang Illinois, tàm pà tàm ală drà pa tàm tiah do dê. Mò Trần Phương Linh, ala mat cau blơi phan bơh lơgar Mỹ tàm Việt Nam pà gĭt, nàng geh dơ̆ jun pơndiang phan do, 2 gah neh roh mờr nggùl nam cribơyai, tàm bơyai mờ ring bal kĭ hơ lơh broă bal. Mò Trần Phương Linh, đơs:“Broă lơh geh ală jơnau sồr tăc phan mờ lơgar ndai ờ ƀuơn dồ ết lơi mờ sồr pal geh bơta kơ̆ nùs, Miss EDE neh lơh niam ngan bơta do mờ bol añ niam nùs ngan. Bol añ pin dờn là bơta gĭt gơ̆p lơh broă bal dơ̆ do rơ̆p ờ mìng ơm wơl tàm tơngai tŭ do lơm mờ gam bơtàu tơnguh tàm rài tơnơ̆ do tai. Tàm tơngai tus, bol añ hơ lòt bal mờ Miss EDE tàm broă bơtàu tơnguh phan bơna mờ rề ơnàng mờ cau blơi, brồ guh tus ală lơgar”.

Nam 2024, Dăk Lăk tăc phan mờ lơgar ndai lơh geh 1 tơmàn 800 tơlak dolar Mỹ mờ tă pơgồp dờng bơh ală bơta phan lơh geh bơh broă lơh sa suơn sre, uă mpồl lơh sa kă bro pa, bơta phan pa dơ̆ sơn rờp geh tăc mờ lơgar ndai jat sră blơi uă. Bơh bồ nam tơn, Kông ty pơgồp bal Tăc mờ blơi phan mờ lơgar ndai Nutri Soil (tàm ƀòn dờng Buôn Ma Thuột) neh tăc bơnah plai màk càr Dăk Lăk sơnrờp tus lơgar Hàn Quốc, Kông ty pơgồp bal Banana Brothers Farm tàm kơnhoàl M’Drăk tăc prìt mờ lơgar ndai, Kông ty pơgồp bal Tăc mờ blơi phan Bar bèt chàng Thành Dung (tàm Krông Pách) tăc mờ lơgar ndai bơnah rơsòn sềm bar bèt... Tus tŭ do, càr Dăk lăk neh geh gĭt nđờ jơ̆t bơta phan lơh geh bơh broă lơh sa suơn sre tăc mờ lơgar ndai jat sră blơi uă tus lơgar Lo. Uă phan bơna lơh geh bơh broă lơh sa suơn sre lơh gơlik jrô bè bar bèt chàng, gar mắc ca neh geh ală cau tàm pà phan lơgar Hàn Quốc, Lo tơmut tàm gah tăc phan tàm lơgar dê.

Tă pơgồp dờng ngan rlau jơh tàm priă lơh geh bơh tăc phan mờ lơgar ndai tàm càr dê tàm nam pa do kung là ală bơta phan geh bơta ƀuơn, bơta pràn bè kơphê, tiêu, sầu riêng, kao su, mờ ală mpồl lơh sa kă bro geh mờng chài lơh broă jŏ nam. Bè Kông ty trách nhiệm hữu hạn Một thành viên tăc mờ blơi phan bơh lơgar ndai 2-9 (Simexco) Dăk Lăk, neh geh pơgăp 125 rơbô tấn kơphê geh tăc mờ lơgar ndai tus 89 Dà lơgar mờ kơnhoàl ù tiah. Ồng Lê Đức Huy, Củ tịc Mpồl Duh broă tàm mpồl mơkung là Kwang Lam bồ dờng kông ty dê pà gĭt, mìng tàm 10 nhai nam 2024 kông ty neh lơh geh priă lơh geh bơh tăc phan mờ lơgar ndai rlau 300 tơlak dolar Mỹ: “Ală bơta phan geh kwơ bơh Tây Nguyên den uă ngan mơya Simexco kung tàm pơgồp bal tờm mờ 2 bơta phan tờm là tờm kơphê mờ tiêu, mờ jơnau kờñ tăc bro 2 bơta phan do tàm dunia niam rlau mờ tơngai pa do. Bol he gĭt lơh mat kă bro mờ yờ tơnguh uă bơta niam bơkah den priă jền rơ̆p geh tơnguh uă tai”.

Jat ồng Lưu Văn Khôi, Kwang lam bồ Sở Lơh sa mờ măi mok mờ Kă bro phan càr Dăk Lăk, tăc mờ lơgar ndai phan lơh geh bơh broă lơh sa suơn sre lơh gơlik jrô là jơnau kờñ bơh càr dê nàng kờñ tơnguh uă bơta kwơ mờ bơta niam bơkah phan lơh geh bơh broă lơh sa suơn sre tiah do dê. Tŭ do, ală bơta phan lơh geh bơh broă lơh sa suơn sre lơh gơlik bơh càr Dăk Lăk dê neh brồ guh rlau 70 Dà lơgar mờ kơnhoàl ù tiah tàm dunia, tàm hơ̆ uă bơta phan geh bơta kwơ tăc mờ lơgar ndai mờ bơta pràn jak tàm pơrlòng niam. Jơh gùt càr tŭ do geh rlau 520 anih lơh gơlik phan bơna lơh geh bơh broă lơh sa suơn sre, tơrgùm tàm ală phan bơna tờm bè kơphê, mắc ca, ka kao, điều, phe, rào goh phan plai chi ris, plai chi pơr ro, plai chi ơn mrềt... Nàng lơh geh jơnau kờñ kờp jơh priă lơh geh tăc phan mờ lơgar ndai lơh geh 1 tơmàn 700 tơlak dolar Mỹ tàm nam 2025 do, càr neh lơh broă rơndăp lơh mờ ală broă lơh geh ngan mờ ngan ngồn. Ồng Lưu Văn Khôi pà gĭt: “Tàm tơngai tus den bol añ rơp pơn jat tai geh ală broă lơh dong kờl nàng dong kờl ai ală mpồl lơh sa kă bro in ngai sơlơ bơcri priă niam rlau tai măi mok bè priă bơcri, bè yal tơngĭt ală phan bơna, nàng ală phan bơna lơh gơlik jrô ngai sơlơ mut geh tàm drà kă bro dờng tàm dunia”

Mut mut nam pa mờ ală jơnau kờñ mờ bơta kơ̆p kơnơm pa, càr Dăk Lăk pơn jat tai lơh ngan nàng lơh sir ală broă jàu kơnòl broă geh ai tàm nam mờ jơh bal tŭ tơngai. Mờ ală cồng nha niam ngan tàm nam do, gơnoar atbồ mờ làng bol tiah do gam brơn brài wă rò dùl nam pa mờ ală bơta pin dờn, kơ̆p kờñ pa.