Hìu bơnhă bi Đàm Thị Thảo ơm tàm ƀòn Bản Hoàng, xã Trường Hà, kơnhoàl Hà Quảng, càr Cao Bằng là 1 tàm ală hìu bơnhă geh dờp kuơ bơh rơndap broă lơh lơh hìu jàl nàng tam ală bơta rơpung. Mờ rlau 100 tơlak đông neh geh, bal mờ bơta dong kờl gơguh tus 150 tơlak đông bơh dà lơgar dê, hìu bơnhă bi blơi phan bơna, măi mok mờ bàr, pe bơta phan ngui lơh sa suơn sre nàng lơh broă lơh tam rơpung tàm hìu jàl. Bi Thảo pà git, broă lơh ơnàng 1 sàu, ngui măi ƀồm dà hòc ntờc mờ 2 rbô tờm rơpung jàl, rơpung lê, rơpung kài. Bơh tŭ tơngai tam tơrlòng lài sền gŏ, tờm cho hòn gơs niam, lì bơkàu ring mờ plai dờng, khà tơt plai geh rlau 90%: “Tam rơpung tàm hìu jàl den kàl tờm he rơp tam rơpung gang mờ rơpung jàl, ai kàl ndai den tam rơpung ƀao tử, sùm là kàl mrềt. Pah nam, tam 3 kàl, kờp jơh priă tă lơh geh priă cồng rlau 200 tơlak đông. Tơnơ̆ tŭ geh tus bal ală ơdŭ bơto pơlam bè tam phan tàm hìu jàl den añ git ală tŭ tơngai niam nàng sơngka sền gàr kờñ lơh geh cồng nha uă, sền bal den kung ndrờm bè tờm tơngời, tờm kòi sơl”.

Broă lơh tam phan tàm hìu jàl mờ ngui măi ƀồm dà hòr ntờc dong chi tam ờ gơ wèt uă ir tàm trồ tiah mờ gơtùi tơrmù ƀà bơta kòp tu sa aniai. Ờ mìng bè hơ̆, làng bol lơh broă sa gam gơtùi tơrmù priă tă lơh tài ờ ngui sơnơm sền gàr phan tam, gàr geh phan kloh niam mờ lơngăp lơngai gơ wèt mờ pràn kơldang să jan cau tam bal mờ cau ngui sa. Cồng nha bơh sơn rờp bơh broă lơh dê lơh gơlik bơta gơn kơnờm nàng làng bol in khin cha tă priă ngui măi mok pa tàm broă lơh sa suơn sre tàm ƀòn lơgar. Kung là 1 tàm ală hìu bơnhă geh dong kờl lơh hìu jàl tam rơpung, bi Nguyễn Văn Quảng ơm tàm ƀòn Bản Chá, xã Ngọc Đào, kơnhoàl Hà Quảng, càr Cao Bằng pà git: “Hìu bơnhă añ tam rơpung gang, rơpung ờs. Tờm sơntìl bơh sơn rờp geh rơndap broă lơh dong kờl. Ală kàl tơnơ̆ den añ blơi is. Tŭ pa sơn đờm tam rơpung tàm hìu jàl. Kwang bàng gah bơta chài lơh broă bơh rơndap broă lơh dê tus tàm suơn nàng pơlam tơn bơta chài tam, sơngka sền gàr. Tam tàm hìu jàl dilah he lơh jat jơnau pơlam bè bơta chài lơh broă den kung ƀuơn sơl gơ dê. Tam rơpung bè do pah nam tam geh 3 kàl. Dilah sơngka sền gàr niam den cồng nha lơh sa uă rlau pơn drờm mờ ală bơta chi tam ndai”.

Bơh ală cồng nha niam mờ broă lơh neh lơh geh, uă hìu bơnhă làng bol tàm ală xã ndai tàm kơnhoàl lòt bơsram, đòm jat, khin cha tă priă lơh pơgồp bal mờ bơta dong kờl bơh gơnoar atbồ dê nàng tam gơl broă lơh sa. Ồng Đàm Quang Đạo, Kwang atbồ Mpồl cau lơh broă sa xã Ngọc Đào, kơnhoàl Hà Quảng, càr Cao Bằng đơs: Ală broă lơh tam phan ngui măi mok pa tàm xã neh di tŭ lơh jat jơnau kờñ bơh drà kă bro tŭ do dê: “Nam 2022, kơnhoàl Hà Quảng dong kờl xã Ngọc Đào in 3 hìu jàl jat broă lơh dà lơgar dong kờl 50%. Nam sơn rờp lơh den dà lơgar dong kờl sơntìl mờ bơta chài sơngka sền gàr. Tơngai tus, Mpồl cau lơh broă sa pơn jat tai mblàng yal, hòi jà làng bol sơlơ rề ơnàng ală broă lơh bơtàu tơnguh lơh sa suơn sre kloh niam, ngui măi mok pa, tơnguh priă jền lơh geh tàm dùl bă ù tam phan, pơgồp bơnah tơn jơh jơgloh, tơrmù rƀah, lơh ngan lơh gơlik phan OCOP”.

Broă lơh tam rơpung tàm hìu jàl, ngui măi ƀồm dà hòr ntờc pờ tơlik gùng lòt pa tàm broă lơh sa tàm ƀòn lơgar. Do kung là tŭ niam dong làng bol lơh broă sa đòm jat mờng chài, ngui bơta chài lơh broă, măi mok pa nàng lơh gơlik phan kloh niam, lơngăp lơngai gơ wèt mờ pràn kơldang să jan cau ngui sa.