Bi A Rất Vu ơm tàm tổ zân phố A Dinh, thị trấn Prao, kơnhoàl Đông Giang tam rlau 4 lồ tờm keo, kơnờm ngui bơta chài tàm broă tam, sơngka sền gàr den tàng brê keo bi dê neh hòn gơs niam ngan. Kàl tơnhàu nam do, bi A Rất Vu lơh geh mờr 100 tơlak đông. Bi A Rất Vu pà git, kơnờm tam brê, hìu bơnhă bi neh jơh rƀah, rài kis geh gàr kơ̆ kơljap. Jat bi yal: Tam tờm keo den mìng kờñ geh dồ êt priă bơcri mờ mìng bòl glar tàm tơngai bơh chờm tam sơngka sền gàr. Bi Vu pà git, tŭ do, hìu bơnhă bi sơn đờm tus bal tam brê dơm chi dờng: “Lài do, hìu bơnhă tam kòi mìr mìng tơl sa, bơh tam tờm keo den rài kis neh bơtàu tơnguh rlau. Bơh tŭ dà lơgar geh broă rơndap lơh tam tờm chi dơm dờng, làng bol neh kờñ ngan mờ lơh jat mơ. Bol hi kờñ tam gơl tam brê dơm chi dờng nàng bơtàu tơnguh lơh sa nàng rài kis kơ̆ kơljap rlau. Gơnoar atbồ tàm do kung sền gròi dong làng bol tờm chi sơntìl”.

Kung bè bi A Rất Vu, bi A Lăng Thị Trang, kòn cau Cơ Tu ơm tàm xã Ka Dăng, kơnhoàl Đông Giang tam rlau 6 lồ keo. Bi A Lăng Thị Trang pà git, kơnờm bơtàu tơnguh tam brê, hìu bơnhă neh brồ guh lơh pas. Bulah bè hơ̆, kờñ lơh geh cồng nha lơh sa jŏ jòng, bi neh tam gơl tam brê dơm chi dờng tàm 2 lồ ù hìu bơnhă dê: “Tam gơl tam tờm chi dơm dờng nàng bơtàu tơnguh lơh sa kơ̆ kơljap rlau. Bulah tơngai rơndap ù tiah jŏ rlau mờ tờm keo mơya kờp bè lơh sa den kơ̆ kơljap rlau tờm keo. Tam tờm keo den broă lơh sa bơtàu tơnguh rlau mờ tam kòi, tơngời, tơnơ̆ do añ rơp tam tờm chi dơm dờng mờ bă ù tam uă rlau nàng bơtàu tơnguh. Rài kis hìu bơnhă añ dê tŭ do neh bơtàu tơnguh rlau mờ lài do”.

Tơngai lài, Ủy ƀan Ñân zân kơnhoàl Đông Giang, càr Quảng Nam sền gròi tus rề ơnàng bă ù tam brê lơh sa, tus bal broă lơh tơnguh bơta niam brê mờ tam gơl bơh brê dơm chi dềt tam brê dơm chi dờng. Kờp bal pah nam, kơnhoàl do tă kes priă bơh 1 tơmàn 500 tơlak tus 2 tơmàn đông dong làng bol tơnguh cồng nha lơh geh, bơta niam brê tam dê, uă ngan tơrgùm tàm tam brê dơm chi dờng. Kơnhoàl Đông Giang neh dong kờl làng bol tam rlau 500 lồ brê dơm chi dờng mờ uă sơntìl tờm chi niam bè dổi tơlir, lim tơlir, sao jù, ươi, huỳñ đàn… Kơnhoàl Đông Giang lơh ngan tus nam 2025 tơnguh bă ù tam brê dơm chi dờng gơguh tus 4 rbô 500 lồ. Ồng Đỗ Hữu Tùng, Phó Củ tịc Ủy ƀan Ñân zân kơnhoàl Đông Giang pà git: “Do là jơnau lơh nền di ngan bơh kơnhoàl dê kung bè bơh càr dê nàng kờñ hòi jà làng bol tam brê, lơh gơlik tiah kis brê ngai sơlơ bơtàu tơnguh rlau. Jơh gùt kơnhoàl neh hòi jà làng bol tam dùl êt nam bơh 300 lồ brê dơm chi dờng mờ ală bơta tờm chi bè tờm gáo rơmit, tờm mùng, sao jù, kờp bal mờ tờm keo, lơh bè lơi nàng gơtùi gàr tiah kis brê mờ bơh hơ̆ gơtùi rơcang lài pleh mờ bơta tơrlah ù, trồ tiah lơh aniai, mìu càl rbut dờng dà kŏ dà cò. Bơh hơ̆, làng bol gơtùi sền gàr mờ atbồ niam rlau, bơtàu tơnguh lơh sa, tơn jơh jơgloh tơrmù rƀah. Tơnơ̆ do, cồng nha tam brê dơm chi dờng uă rlau mờ cèng wơl làng bol in priă jền lơh geh kơ̆ kơljap jŏ jòng sùm. Rơp bơtàu tơnguh làm uă tàm jơh gùt ù tiah kơnhoàl dê”.

Tàm ală kơnhoàl tiah kơh bơnơm càr Quảng Nam geh git nđờ rhiang hìu bơnhă làng bol kòn cau Cơ Tu tus bal tam tờm keo mờ cèng wơl priă jền lơh geh kơ̆ kơljap. Quảng Nam neh geh uă gùng dà broă lơh hòi jà cau tam brê tam gơl bơh tam brê dơm chi dềt nàng tam brê dơm chi dờng dong làng bol ờ mìng bơtàu tơnguh lơh sa, mờ gam pơgồp bơnah sền gàr tiah ơm kis. Càr Quảng Nam geh rlau 769 rbô lồ brê mờ ù rơndap lài tam brê. Pah nam, khà dơm chi brê drơng jơnau kờñ ngui tàm lơgar mờ tac hờ lơgar ndai bơh càr dê in geh mờr 1 tơlak 450 rbô khối, pơgồp bơnah ai geh broă lơh, dong làng bol tiah kơh bơnơm lik klàs rƀah kơ̆ kơljap jŏ jòng sùm.