Tơngai pa do, broă lam lơh Broă neh lơh nền sồ 06 bơh ƀòn dờng Hà Nội dê neh lơh geh uă cồng nha pal cih dờp ngan, ngan là tàm broă lơh đơng lam bồ, sồr lơh, pơlam mờ lam lơh jat geh Thàñ ủy, Ủy ƀan Ñân zân, ală sở, mpồl, gah broă lơh bơh ƀòn dờng Hà Nội dê lam lơh jat jơh nùs ngan. Đơs tàm pơrjum, Thủ tướng đơs nền, nàng lơh gơtùi ală jơnau kờñ bơtàu tơnguh lơh sa mpồl bơtiàn bơh càr lơgar dê tus nam 2025, ngan là sơlơ tơnguh tai tam gơl sồ mờ lam lơh geh cồng nha Broă neh lơh nền 06, kơnòl broă ai tơlik là kơn jơ̆ kơn jut ngan. Thủ tướng sồr jơh gùt ală kwang bàng pal tơnguh nùs nhơm geh kơnòl, “ờ đơs ờ, ờ đơs kal ke, ờ đơs geh mơya ờ lơh”, tơnguh bơta lơh ngan “neh đơs là lơh, neh lơh là geh cồng nha”, “mìng bơyai lơh, ờ bơyai sơ lơŭ wơl”. Hà Nội pal là tiah lam lài tàm broă lơh tam gơl pa mờ bơtàu tơnguh lơh sa sồ, mpồl bơtiàn sồ, làng bol sồ, wèt tus mpồl bơtiàn gơguh jak, tam gơl pa.