Broă lơh lòt jòi, tờ tơrgùm, đal git mat ƀồc ntìng cau ling chơt màng gam ờ tơl jơnau yal tàm nam 2023 mờ 6 nhai bồ nam 2024 geh ală kâp, gah broă lơh, ală tiah bơh càr Gia Lai dê lam lơh jơh nùs, geh cồng nha. Bơh nam 2023 tus tŭ do, Mpồl K52 (Cơldŭ Cíñ trị, Gah đơng lam ling klàng càr Gia Lai) neh jòi tơrgùm geh 21 ƀồc ntìng cau ling chơt màng, tơnguh khà jòi tơrgùm geh, cèng rê tơp hờ ƀòn tờm bơh nam 2001 tus tŭ do là 1 rbô 489 ƀồc ntìng cau ling chơt màng.

Tàm càr Gia Lai, bơh nam 2023 tus tŭ do neh jòi bàn, tờ geh 26 ƀồc ntìng cau ling chơt màng. Mpồl đơng lam 515 git nền, broă lơh lòt jòi, tờ tơrgùm ƀồc ntìng cau ling chơt màng tàm tơngai tus rơp ngai sơlơ kal ke rlau tài jơnau yal bè bơtô ƀồc cau ling chơt màng ngai sơlơ dồ êt, ală tiah geh jơnau yal bè bơtô ƀồc cau ling chơt màng geh uă tam gơl, ală cau git jơnau yal bè bă tiah tơp ƀồc cau ling chơt màng tŭ do ờ gam uă tai.