Tàm gơ jàr mờ tŭ jiơ ơm rlô klo ngai, lòt sền bă sươn biăp sa mờ gul wơl ală rbòng blơn ồs mbòr ngan plai nàng kờñ jàu ai cau kă phan in pik tàm bàr pe ngai tus, đảng viên ồng Ya Dũng, Kwang ătbồ thôn Labouye A, xã Lạc Xuân, kơnhoàl Đơn Dương, càr Lâm Đồng dê pà gĭt, gŏ geh broă tam phan jăt bơta mờng kwèng bơh yau ờ gŏ cèng wơl cồng nha, priă lơh geh ờ gŏ geh sùm den tàng hìu bơnhă neh lơh nền tam gơl wơl tam phan jăt gùng dà lơh broă sa sươn sre măy mŏk pa. Mờ 4 sào ù tam biăp ală bơta, pah kàl dong hìu bơnhă he lơh geh priă cồng rlau 100 tơlak đong. Jăt ồng đơs, bơh cồng nha lơh sa do neh dong broă mblàng yal, hòi jà mờ jơnau đơs bơh dồ nă đảng viên bè he dê rơ̆p geh làng bol iăt kơno, dòn jăt. Ồng Ya Dũng, đơs: Să tờm he lơh ngan lùp bơsram uă tiah, ờ mìng tàm do lơm mờ gam tàm uă tiah ndai tai. Lùp bơsram sền cau dê tam chi do, sơntìl chi do, tờm chi ne. Mờ gơnoar broă là dồ nă cau gam kơnòm mơya geh làng bol pin dờn dòn kơnờm sền là cau geh bơngă pin dờn, là cau ala măt Mpồl duh broă ala măt làng bol den pal lơh ngan lùp bơsram, lùp jòi ală gùng dà pa nàng tam phan, ndrờm bè tŭ do he gam lơh là tam phan jăt gùng dà pa. Tài bơh làng bol neh bal mờ gơ̆p bơ̆t bơtàu ƀòn lơgar he dê bơtàu tơngguh ngai sơlơ gơguh tai.

Ndrờm bè hơ̆ sơl, đảng viên ồng K’Hiệu, ơm tàm thôn 2, xã Đinh Trang Thượng, kơnhoàl Di Linh, càr Lâm Đồng kung tề lam làng bol tàm ƀòn lơgar he dê khin cha tam gơl rơndăp tăp sèng chi tam bơh broă lơh loh làng. K’Hiệu pà gĭt, tàm nam 2014, tơnơ̆ tŭ lòt bơsram ơdŭ bơto pơlam bè tam pa wơl kơphê bơh gah lơh broă sa sươn sre tiah do dê pờ, ồng neh lơh nền tam gơl sươn kơphê kra jŏ sơnam gơ ai cồng nha ờ huan uă bơh hìu bơnhă he dê bơh broă tam wơl sơntìl kơphê pa. Bơh 3 nam tam pa wơl jăt gùng dà lơh rơhời, sươn kơphê bơh K’Hiệu dê neh sơnđờm tơngguh cồng nha lơh geh, cèng wơl priă lơh geh sùm. Gŏ geh cồng nha, tŭ do làng bol tàm ƀòn lơgar hơ̆ sồng đòm lơh jăt. Đảng viên ồng K’Hiệu đơs là, kờñ làng bol dòn mờ lơh jăt den să tờm he pal lơh krơh lơh lài, bơr đơs tê lơh den hơ̆ sồng di. Ồng K’Hiệu, đơs: Mờ gơnoar broă là Đảng viên, là kwang bàng thôn dê, añ lơh ngan lơh jăt niam gơnoar broă he dê tàm tiah do. Añ hòi jà làng bol pin dờn tàm gùng dà đơng lam bơh Đảng dê, broă dong kờl adăt boh lam Dà lơgar dê, hòi jà oh kòn kòn sau jơi nòi bơsram sră tus gùng tus dà den hơ̆ sồng gĭt wă, geh bơta wă wờng nàng lơh sa bơtàu tơngguh lơh sa, bè sền gàr tờm kơphê, gĭt ngui bơta jak chài măy mŏk tàm broă sơngka sền gàr, tơngguh uă cồng nha lơh geh bơh tờm chi tam dê mờ hòi jà làng bol tàm thôn lơh jăt niam ală srơh tàm pơrlòng lơh broă lơh sa bơh tiah he dê lam lơh.

Ai jăt Đảng viên ồng K’Lèn, Ƀí thư Ci ƀộ ƀòn K’Long, xã Hiệp An, kơnhoàl Đức Trọng yal, lài do rài kis làng bol dê tàm ƀòn kal ke ngan, priă lơh geh uă ngan là bơh bàr pe sào sre lơh kòi dồ kàl den tàng bơta jơgloh, bơta rƀah gơ tê gơ jăt sùm. Kơnờm bơh geh Đảng, Dà lơgar sền gròi dong kờl bơcri bè ală bơta, lam lơh uă broă lơh dong kờl bơcri priă, dong kờl giă jun pơndiang ală sơntìl chi tam mờ bơto pơlam bơta chài tam phan, bal mờ bơta mblàng yal bơh mpồl cau, mặt trận mờ gơnoar ătbồ ală kâp dê, lơh jăt niam gơnoar broă “Đảng viên lòt lài, làng bol ƀòn lơgar lòt jăt tơnơ̆”, làng bol tàm tiah do rơhời tam gơl bơta kơlôi sơnơng, rơhời lùp bơsram, đòm jăt mờ ngui măy mŏk pa tàm broă lơh sa jăt gùng dà tơngguh uă priă lơh geh phan bơna kă bro dê. Ồng K’Lèn, đơs: Lài jơh he pal lùp bơsram bơta gĭt wă ai să tờm he dê in, pal wă wờng wil tơl ală jơnau sồr, gùng dà broă lơh bơh Đảng mờ adăt boh lam bơh Dà lơgar dê den hơ̆ sồng ƀươn mblàng yal, hòi jà ai tơl nă cau là làng bol in. Bal mờ hơ̆, tŭ lơh khăt dồ broă lơh lơi den he kung kờñ pal lòt lài, pơnyơu bè he pal lơh hìu krơh hìu jàl lơh broă sa sươn sre măy mŏk pa nàng làng bol in lùp bơsram. Dilah mìng đơs mờ bơr lơm den làng bol ờ rơgơi gĭt wă geh, să tờm he pal lơh mờ jơh bal oh kòn kòn sau he dê kung pal bè hơ̆ sơl, tŭ gŏ geh cồng nha lơh sa loh làng den làng bol hơ̆ sồng bài lơh jăt.

Bơh ală broă lơh loh làng, geh ngan bơh tơl nă đảng viên dê tàm lơh jăt gơnoar broă lam lài, lơh krơh lơh jăt mblàng yal, hòi jà làng bol mờ tề lam làng bol bơtàu tơngguh lơh sa mờ rài kis, uă broă lơh tơrlòng lài lơh sa geh cồng nha neh ngai sơlơ geh rề ơnàng lơh uă tàm làm jơh ală tiah jơi bơtiàn dồ êt nă cau bơh càr Lâm Đồng dê. Bơh hơ̆, pơgồp bơnah kwơmàng ai khà hìu rƀah uă bơta bơh càr dê gơmù uă ngan mìng gam wơl hơđơm 2%, tàm hơ̆ hìu rƀah là làng bol jơi bơtiàn dồ êt nă cau gam 5,6%.