Gam ròng 2 nơm kơn rồ me deh kòn pa geh dà lơgar dong kờl pơgap mờ do rlau 1 nhai tàm rơndap broă lơh lơh gơlik li la broă lơh sa, bơtàu tơnguh broă lơh tơrmù rƀah gơ wèt Broă lơh jơnau kờñ dà lơgar tơrmù rƀah kơ̆ kơljap, tơngai bơh nam 2021 tus nam 2025, ồng Trần Ngọc Phương ơm tàm xã Thuận Hòa, kơnhoàl Châu Thành ờ gơtùi pồn bơta chờ hờp, tài bơh bơta dong kờl do, hìu bơnhă ồng dê rơp geh tai bơta ƀuơn nàng gàr kơ̆ kơljap rài kis. Tŭ do, ồng Phương neh tam tai nhơt nàng lơh phan siam kơn rồ in, mờ kung ơpah 3 nă cau lơh suơn nàng tam tai tờm tăo dum phồng mờ bơta kơp kờñ hìu bơnhă geh priă jền lơh geh sùm, mhar brồ guh lik klàs rƀah. Ồng Phương yal: “Geh dà lơgar dong kờl he rơp lơh ngan, lơh bè lơi nàng lơh geh cồng nha uă ngan rlau jơh. Añ kung neh tam nhơt, wàng ròng kung neh lơh gơs, gơwèt mờ bơta chài ròng phan den kung gam bơsram”.

Broă lơh jơnau kờñ dà lơgar tơrmù rƀah kơ̆ kơljap, Broă lơh jơnau kờñ dà lơgar bơt bơtàu ƀòn lơgar pa, Broă lơh jơnau kờñ dà lơgar bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau bal mờ uă broă lơh, rơndap broă, broă lơh dong kờl kòn cau ndai geh ală kâp, ală gah broă lơh tàm càr Sóc Trăng sồr lam lơh neh lơh geh uă cồng nha kuơmàng. Bơh hơ̆ neh pơgồp bơnah dong hìu bơnhă rƀah, hìu bơnhă ndrờm bè cau rƀah đơs bal mờ hìu bơnhă rƀah, hìu bơnhă ndrờm bè cau rƀah jơi bơtiàn dồ êt nă cau đơs is rơhời tơnguh niam rài kis, bơtàu tơnguh lơh sa, brồ guh lik klàs rƀah.

Rê kơnhoàl Trần Đề tŭ do, bol hi sền gŏ bơta tam gơl dờng ngan tàm tiah làng bol jơi bơtiàn dồ êt nă cau. Hơ̆ làrbàng, gùng lòt ƀòn lơgar ngai sơlơ dờng niam, kơ̆ kơljap. Mìng is tàm tơngai bơh nam 2019 tus nam 2024, kơnhoàl neh lơh pa 519 broă lơh, lơh gơs mờ ai ngui 451 broă lơh. Uă broă lơh drơng mpồl bơtiàn lơh gơs mờ ai ngui neh cèng wơl cồng nha ngan ngồn, pơgồp bơnah chồl tơnguh lơh sa – mpồl bơtiàn bơtàu tơnguh, tam gơl muh mat ƀòn lơgar. Ồng Thạch Soi, ơm tàm ƀòn Hội Trung, ƀòn drà dềt Lịch Hội Thượng chờ hờp đơs: “Dà lơgar sền gròi ngan tus rài kis làng bol, ngan là làng bol jơi bơtiàn dồ êt nă cau. Mùl màl, lài do gùng do mìng ơnàng 2 thơk, tŭ do neh geh lơh ơnàng tus 3 thơk, làng bol kung kờñ ngan, ai is ù dà lơgar in lơh gùng, bơh hơ̆ broă lòt rê làng bol dê ƀuơn ngan, oh kòn lòt bơsram kung ƀuơn sơl”.

Bơh priă jền tam pà rlau 103 tơmàn đông bơh Broă lơh jơnau kờñ dà lơgar bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau mờ Broă lơh jơnau kờñ dà lơgar tơrmù rƀah kơ̆ kơljap, tơngai bơh nam 2021 tus nam 2025; kơnhoàl Trần Đề neh dong kờl hìu ơm ai 344 hìu bơnhă in, dong kờl ù ơm ai 37 hìu bơnhă in, tam gơl broă lơh ai rlau 360 hìu bơnhă in, dong kờl dà ngui sa rah rài ai rlau 190 hìu bơnhă in, bơcri priă lơh 28 broă lơh rbàng, gùng lòt ƀòn, xã uă kal ke in. Bơdìh hơ̆ tai, lơh pa mờ lơh niam wơl drà tiah jơi bơtiàn dồ êt nă cau, dong kờl bơtàu tơnguh lơh sa, lơh li la broă lơh sa ƀòn lơgar in, bơto broă lơh. Ồng Trịnh Văn Bé, Phó Củ tịc Anih duh broă làng bol kơnhoàl Trần Đề pà git, kơnhoàl sùm đal git broă lơh jơi bơtiàn mờ broă lơh dong kờl kòn cau là kơnòl broă kuơmàng, bè hơ̆ den tàng, tàm tơngai tus, kơnhoàl rơp tơrgùm lam lơh uă broă lơh nàng lơh geh cồng nha niam ngan rlau jơh: “Tơrgùm bơcri lài ai ală xã, ƀòn uă kal ke in bè: bơsong bơta ù ơm, hìu ơm, ù lơh sa, dà ngui sa; dong kờl bơtàu tơnguh lơh sa, lơh gơlik li la broă lơh sa ƀòn lơgar in; bơcri priă lơh phan bơna pal geh, drơng lơh sa, rài kis làng bol tàm tiah jơi bơtiàn dồ êt nă cau in. Lơh kơ̆ kơljap anih lơh broă cíñ trị kâp hơ đơm, sền gròi tus broă bơto bơtê, tơnguh pràn jak kwang bàng, ngan là kwang bàng jơi bơtiàn dồ êt nă cai. Ai lài tơnguh cau lơh broă, tơnguh bồ tơngoh bơsram sră làng bol gơ jat bal mờ bơto broă lơh, ai geh broă lơh làng bol jơi bơtiàn dồ êt nă cau in”.

Jat Ƀí thư Tỉñ ủy càr Sóc Trăng ồng Lâm Văn Mẫn pà git, Sóc Trăng neh lòt gan tŭ tơngai bơh nam 2019 tus nam 2024 bềng kal ke mờ uă bơta tam gơl dờng. Tàm bơta bè hơ̆, tềng đap bơta đơng lam bồ bơh ală kâp ủy Đảng, gơnoar atbồ mờ làng bol tàm càr dê, ngan là làng bol ală jơi bơtiàn dồ êt nă cau neh đòm jat bơhiàn tam klac bal, nùs nhơm kờñ gơboh dà lơgar, lơh ngan tàm pơrlòng, lơh ngan pơn đơl pràn, sơrlèt gan bơta lòng, bơta kal ke, lơh geh uă cồng nha dờng. Tàm tơngai bơh nam 2019 tus nam 2024, lơh sa càr dê sùm geh bơta bơtàu tơnguh. Mìng is 6 nhai bồ nam 2024, kờp dŭ geh rlau 6,5%, jơnhua rlau pơndrờm mờ khà kờp bal gùt lơgar dê (6,42%), ơm dơ̆ 6 tàm tiah ring dà dờng Cửu Long. GRDP kờp bal dùl nă cau kờp tus lồi nam 2023 geh rlau 60 tơlak đông dùl nă cau dùl nam.

Ồng Lâm Văn Mẫn kung đơs nền, bơh priă jền bơcri bơh 3 Broă lơh jơnau kờñ dà lơgar geh pơgồp bal, lam lơh geh cồng nha nàng tă priă, lơh niam, lơh pa rơndap tap sèng phan bơna lơh sa – mpồl bơtiàn tiah jơi bơtiàn dồ êt nă cau, kơnờm bơh hơ̆, tus tŭ do, jơh ală xã ndrờm geh gùng rơndeh oto tus tiah tàm gùl; rlau 99% hìu bơnhă tiah jơi bơtiàn dồ êt nă cau geh ngui gùng che đèng dà lơgar; khà hìu bơnhă ngui dà sàng goh geh rlau 99,6%. Kuơmàng, broă lơh tơrmù rƀah tàm tiah làng bol jơi bơtiàn dồ êt nă cau geh bơta tam gơl niam, gùt càr neh dong kờl tam gơl broă lơh ai 4 rbô 600 hìu bơnhă in mờ 67 broă lơh bơtàu tơnguh lơh sa, pơgồp bơnah lơh li la broă lơh sa ƀòn lơgar mờ tơrmù rƀah kơ̆ kơljap. Kờp tus lồi nam 2023, tàm càr gam rlau 4 rbô hìu bơnhă rƀah là cau jơi bơtiàn dồ êt nă cau, gơmù rlau 6 rbô 500 hìu bơnhă pơn drờm mờ nam 2021: “Khà hìu bơnhă rƀah kờp bal gơmù 2% pah nam; tàm hơ̆, khà hìu bơnhă rƀah là cau Khmer gơmù 3% pah nam. Ală broă lơh dong kờl gàr lơngăp lơngai rài kis mpồl bơtiàn geh lam lơh di tŭ, di cau. Tàm tơngai bơh nam 2019 tus nam 2024, càr neh dong kờl lơh 14 rbô 826 nơm hìu lời ai hìu bơnhă rƀah in, tàm hơ̆ geh 6 rbô 184 nơm hìu lời ai hìu bơnhă rƀah cau jơi bơtiàn dồ êt nă cau in”.

Ală cồng nha lơh geh là bơta lơh ngan cíñ trị mờ bơta sồr lơh, đơng lam kràñ cê bơh kâp ủy, gơnoar atbồ ală kâp tàm càr Sóc Trăng dê, bơdìh hơ̆ tai là bơta lơh ngan, sơrlèt gan kal ke brồ guh bơh làng bol ală jơi bơtiàn tàm càr dê, bơh hơ̆, neh rơhời lơh tam gơl pa tiah jơi bơtiàn dồ êt nă cau.