Tus tơngai tŭ do, kòp jê ndul gơ jroh sur câu Phi neh bơtờp kòp tàm 66 hìu bơnhă gơwèt 17 xã bơh 10 kơnhoàl, ƀòn drà dờng, ƀòn dờng càr Dăk Lăk dê, lơh chơ̆t mờ tơ̆p pơrgŭc rlau 510 nơm mờ kờp jơh bơta kơn jơ̆ rlau 24 tấn. Tŭ do, gam 6 kơnhoàl kòp ờ hềt jơh 24 ngai. Gơwèt mờ kòp as sồt kơltau geh pơnời tàm rơpu, kơn rồ, tàm poh, bơtờp kòp tàm 2 hìu bơnhă tàm ƀòn drà dềt Ea Pốk, kơnhoàl Cư M’gar mờ xã Hoà Phú, ƀòn dờng Buôn Ma Thuột, càr Dăk Lăk, kờp jơh bơta kơn jơ̆ pal tơ̆p pơr gŭc rlau 300 kĭ.

Kờp sền bơh bồ nam tus tŭ do, tàm càr Dăk Lăk geh 4 tiah kòp as sồt kơl tau geh pơnời tàm rơpu, kơnrồ tàm kơnhoàl Ea Súp, Cư M'gar mờ ƀòn dờng Buôn Ma Thuột, lơh chơ̆t 9 nơm, tơ̆p pơrgŭc 4 nơm, kờp jơh bơta kơn jơ̆ tŭ tơ̆p pơrgŭc là rlau 450 kĭ. Nam do, càr tă mờr 29 tơmàn đong Kes priă Dà lơgar dê nàng ală tiah in lam lơh ală broă lơh rcang lài kơryan kòp tàm phan poan jơng, iar ada in.