Là hìu bơnhă rƀah bơh ƀòn Cư Kanh, xã Ea Sin, kơnhoàl Krông Búk, càr Dăk Lăk dê, bồ nam 2023, mò H Yam Mlô, geh dong kờl 1 nơm kơnrồ me nàng lơh priă brồ guh klàs bơh rƀah. Bơh mờr 2 nam, mờ bơta sền gròi bơh mpồl cau dê, ngan là bơta bơto pơlam jơh nùs jơh tồr bơh kwang bàng lơh sơnơm phan ròng dê tàm broă sền gàr kơnrồ me, tŭ do, hìu mò H Yam neh geh tai dồ nơm kơnrồ kòn bơh kơnrồ me geh pà dê deh kòn. Mo H Yam chờ hờp yal: Añ geh Dà lơgar dong kờl kơnrồ, tŭ do kơnrồ deh geh bàr pe dơ̆, añ ròng siam sền gàr niam nàng kơnrồ in geh rơ̆ rài rlau. Ưn ngài Dà lơgar neh dong kờl ală cau kal ke bè bol añ, ai bol añ in uă ngan bơta nàng bol añ geh rài kis niam bơnĕ rlau.

Gĭt nền loh bơta ƀươn bơh tiah he dê mờ jăt tàm ală Jơnau lơh nền tàm pơrjum bơh Mpồl duh broă Đảng ƀộ ală kâp bè tơrmù rƀah kơ̆ kơl jăp, Đảng ƀộ xã Ea Sin, kơnhoàl Krông Buk, càr Dăk Lăk neh lơh Jơnau lơh nền tàm pơrjum đơng lam bơtàu tơngguh lơh sa tơngai lơh broă bơh nam 2020- 2025. Tàm hơ̆, cih loh jơnau kờñ, kơnòl broă, broă lơh loh làng, dipal mờ bơta geh ngan tàm tiah he dê. Tam gơl gùng dà lơh jăt jrô ơnàng rlau, geh cồng nha rlau. Bal mờ hơ̆, lơh pràn mblàng yal, hòi jà làng bol ngui bơta gơguh jak măy mŏk dê tàm tam gơl rơndăp tăp sèng chi tam, phan ròng, ai chi sơntìl, kòn sơntìl pa gơ ai cồng nha, bơta niam uă tàm broă lơh sa. Ồng Vũ Văn Tuấn, Ƀí thư Đảng ủy xã, pà gĭt: Xã Ea Sin neh lơh jăt ngan ngồn gơgơs broă rơndăp lơh nàng lam lơh jăt tàm tơl nam. Ală tŭ lơh ai làng bol lơh cau tờm, ngui niam gơnoar broă tus bal bơh jơh ală anih lơh broă cíñ trị dê. Bơh ală nam den cồng nha tơrmù rƀah neh lơh geh ală cồng nha pơnrơ ngan. Is ồn là bơta gĭt wă bơh làng bol dê tàm broă lơh tơrmù rƀah neh geh tơngguh tai loh làng, làng bol neh gĭt ngui tơl broă lơh tơrlòng lài, tơl broă lơh, bơsram bal mờ gơ̆p nàng brồ guh klàs bơh rƀah. Neh geh uă hìu bơnhă brồ guh pas sơm tơl ngui tơl sa.

Bal mờ hơ̆, mờ ală priă dong kờl bơh ală broă lơh tơrmù rƀah, dà sàng goh kloh niam tiah ơm kis, dong kờl càn priă bơh ală anih priă jền dê neh ai tơl bơta ai làng bol in bơcri bơtàu tơngguh lơh sa. Tus tŭ do, khà hìu rƀah bơh xã Ea Sin dê neh gơmù bơh rlau 57% tàm nam 2021 gơmù gam 39,8% tàm nam 2023, priă lơh geh kờp bal dồ nă cau kung gơguh rơhời bơh ală nam.

Bơh cồng nha broă lơh tơrlòng lài “Gơmù rƀah kơ̆ kơl jăp” tàm xã Ea Sin, Mpồl duh broă Đảng ƀộ kơnhoàl Krông Buk, càr Dăk Lăk neh lam lơh, rề ơnàng lơh uă tus ală tiah tàm kơnhoàl. Nàng rềp mềl mờ ƀòn lơgar, Mpồl duh broă Đảng ƀộ kơnhoàl gam jàu ală oh mi tàm kâp ủy pah nhai rê pơrjum bal mờ Ci ƀộ ƀòn nàng gĭt nền jơnau kơlôi sơnơng, bơta kơ̆p kờñ bơh kwang bàng, đảng viên mờ làng bol ƀòn lơgar dê, di tŭ tă bơsong ală kal ke, gơkòl tàm bơtàu tơngguh lơh sa tàm ƀòn lơgar. Ồng Nguyễn Hải Đông, Ƀí thư kơnhoàl Krông Buk, càr Dăk Lăk, pà gĭt: Kơnhoàl neh sồr ală kwang bàng, đảng viên drơng kơnòl jăt sền ƀòn lơgar kung bè kwang bàng 7 xã sùm sùm lòt pơrjum ci ƀộ ƀòn lơgar. Sùm jăt sền mờ sền swì cồng nha lơh jăt ală broă jàu ală tơnggume nàng lơh jăt broă lơh jơnau lơh nền tàm pơrjum dong tơn jơh jơgloh tơrmù rƀah nàng ngai sơlơ niam rlau.

Kơnhoàl Krông Buk, càr Dăk Lăk tŭ do geh rlau 30 mpồl đảng kơnă hơđơm bal mờ rlau 180 ci ƀộ gơ wèt ală Đảng ƀộ kơnă hơđơm. Kơnờm lơh jăt niam gơnoar broă đơng lam, sồr lơh, pơlam gùng tàm bơtàu tơngguh lơh sa- mpồl bơtiàn tàm ƀòn lơgar, den tàng 16 mpồl broă jàu bè bơtàu tơngguh lơh sa- mpồl bơtiàn kơnhoàl dê nam 2023 neh lơh geh mờ sơrlèt broă rơndăp lơh. Tàm hơ̆, khà hìu rƀah gơmù 1% geh 100% broă rơndăp lơh; khà hìu bơnhă rƀah xã kal ke ir gơmù 6,97%  geh 116% broă rơndăp lơh. Kơnhoàl kung neh lơh geh 74 broă lơh tơrlòng lài bơta jăt chài măy mŏk, ngui rơndeh rơndồ măy mok, sơntìl chi tam, phan ròng pa cèng wơl bơta kwơ lơh sa uă. Rài kis làng bol dê ngai sơlơ kơ̆ kơl jăp. Bơh hơ̆, pơgồp bơnah lơh jăt geh cồng nha Jơnau lơh nền tàm Pơrjum dờng Đảng ƀộ kơnhoàl Krông Buk, tơngai lơh broă bơh nam 2020- 2025 neh sồr lơh, bơ̆t bơtàu kơnhoàl ngai sơlơ bơtàu tơnguh rlau tai.