Tus jơh nhai 09 pa do, kơnhoàl Kon Rẫt, neh tam geh rlau 1 rbô 500 lồ brê, sơrlèt mờr 340 lồ pơndrờm mờ broă jàu tam brê geh càr Kon Tum dê jàu tàm 04 nam, bơh nam 2021- 2024. Do kung là nam dơ̆ puan tàm pơn jăt sùm, kơnhoàl sơrlèt broă rơndăp lơh bơtàu tơngguh brê. Ồng Nguyễn Văn Thủy, Phó Củ tịc Anih duh broă Làng bol kơnhoàl Kon Rẫy, pà gĭt nàng tam geh brê sơrlèt broă rơndăp lơh càr dê jàu, sền gàr brê tam bơtàu tơngguh niam, gơnoar ătbồ kơnhoàl neh lam lơh ndrờm bal uă gùng dà broă lơh. Ồng Nguyễn Văn Thủy, đơs: Anih duh broă Làng bol kơnhoàl li la ală bơnah priă nàng dong kờl làng bol tus bal tam pa bă brê. Sùm sồr ală mpồl, ƀòn lơgar sền swì, sền wơl, bơto pơlam, hòi jà làng bol sơngka sền gàr brê tam. Pah nam bă brê lơi mờ chơ̆t tài bơh ală jơnau ờ gơtùi rơcăng lài den lam tam bơtơl wơl nam tơnơ̆ tơn.

Bal mờ kơnhoàl Kon Rẫy, tơngai bơh nam 2021- 2024, uă tiah tàm càr Kon Tum kung sơrlèt broă rơndăp lơh tam brê sơl. Tàm hơ̆, ƀòn dờng Kon Tum, kơnhoàl Tu Mơ Rông mờ Kon Plông…neh sơrlèt broă rơndăp lơh bơh bàr pe rơhiang tus rlau 1 rbô lồ. Uă tiah neh geh tŭ là tiah pơneh ngan bơh càr Kon Tum dê bè jơnau mus kơl brê tìs mờ adăt boh lam, chu aniai brê lơh mìr, den tŭ do làng bol neh sền gŏ geh bơta kwơ bơh brê dê mờ tus bal tam wơl brê. Bi A Long ơm tàm thôn Ti Tu, xã Đăk Hà, kơnhoàl Tu Mơ Rông pà gĭt, hìu bơnhă bi mờ uă hìu làng bol tàm ƀòn neh tam gơl wơl tam brê tàm bă ù tam bùm blàng jŏ nam neh klàr ờ gam nđiơm gơs tai, geh rlau 30 lồ. Bi A Long, đơs: Lài do, añ tam bùm blàng, mờ bùm blàng kung ờ gơtùi hòn dờng sơl, bùm sùm gơtìp ồm, tŭ do geh dồ êt bùm kung ờ huan bòl glar rlau. Añ kung bè làng bol tàm ƀòn lơgar sơl lài do ờ kơlôi tus tam brê ờ. Kwang bàng xã, hơ̆ sồng thôn jà hòi he sùm den he kung wờng sơl. Hìu añ geh bă ù tam bùm blàng jŏ nam ir rao, bùm dềt ngan den tàng añ lơh nền tam gơl wơl tam tờm nho. Geh xã dong kờl tờm nho sơntìl añ kung chờ hờp ngan. Añ lơh ngan pès ñhơ̆t nàng tờm nho in mhar dờng hơ̆ sồng rơcăng lài pleh gơtìp ồs sa niam rlau.

Lơh jăt Jơnau lơh nền tàm pơrjum bơh Pơrjum dờng Đảng ƀộ càr Kon Tum dơ̆ XVI dê bè tam pa 15 rbô lồ brê tàm tơngai lơh broă, bal mờ tam brê tơrgùm bal, ală tiah tàm càr gam lơh pràn tam chi rah rài. Tus tŭ do, neh tam pa geh rlau 3 tơlak 600 rbô tờm, geh rlau 121% jơnau kờñ tàm jơnau lơh nền tàm pơrjum dê; căng ròng kis wơl rlau 6 rbô 100 lồ brê; jàu rlau 9 rbô 400 lồ brê ai mpồl bơtiàn in ătbồ sền gàr; lơh geh broă lơh broă sa tàm broă brê bơnơm ai rlau 24 rbô nă cau lơh broă in, sơrlèt jơnau kờñ mờ jơnau lơh nền tàm pơrjum dê sồr…Ồng Nguyễn Quốc Tuấn, Phó Kwang ătbồ Ci Kụk Sền gàr brê càr Kon Tum pà gĭt, ală broă lơh tam brê, sền gàr brê gam lơh gơlik geh broă lơh, dong làng bol bơtàu tơngguh broă lơh broă sa mờ bơtàu tơngguh lơh sa broă lơh sa sươn sre brê bơnơm. Ồng Nguyễn Quốc Tuấn, đơs: Tàm tơngai chi pa tam, làng bol geh ngui bă ù nàng lơh ală broă lơh tơrlòng lài lơh sa broă lơh sa sươn sre brê bơnơm pơgồp bal tơngguh uă priă lơh geh ai làng bol tus bal tam brê in. Bè jŏ jòng broă lơh tam brê, gòm tơlir ù lời gời grồi ờ geh chi che rơ̆p cèng wơl priă lơh geh ai làng bol in kung bè là geh tă tơm priă sền gàr tiah ơm kis brê, geh dờp kwơ bơh broă sa brê tam, ală phan bơna bơh brê tam mờ mờr tus lơh jăt sră cơng tàng carbon. Do là ală priă lơh geh sùm mờ jŏ jòng ai làng bol in tŭ mờ tus bal tam brê.

Bal mờ broă lơh pràn tam brê, bơh nam sơnrờp tơngai lơh broă tơn, Tỉñ ủy càr Kon Tum geh Jơnau lơh nền tàm pơrjum sồ 06 bè bơtàu tơngguh broă brê bơnơm kơ̆ kơl jăp tus nam 2025, pơlam gùng tus nam 2030. Bơh nam 2021 tus nam 2023, càr Kon Tum neh hòi tơrgùm rlau 1 rbô 500 tơmàn đong nàng bơtàu tơngguh gah broă brê bơnơm; kờp jơh priă geh bơh lơh sa gah broă brê bơnơm bơh càr dê tus nam 2023 kờp dŭ geh rlau 7 rbô 500 tơmàn đong, tàm hơ̆ is ồn priă  tam brê kờp dŭ geh mờr 950 tơmàn đong. Ồng Nguyễn Tấn Liêm, Kwang ătbồ Sơ̆ Broă lơh sa sươn sre mờ Bơtàu tơngguh Ƀòn lơgar càr Kon Tum dê pà gĭt, sở gam dan mờ càr tơngguh khà dong kờl mờ bơnah bơcri tàm gah broă brê bơơm nàng gơhòi gơ jà cau tam brê. Jơnau kờñ gơ ai tơlik là lơh geh tiah tam brê ngui lơh phan, lơh geh jơnau kờñ bơtàu tơngguh lơh sa mờ măy mŏk lơh dơm chi. Ồng Nguyễn Tấn Liêm, đơs: Khà dong kờl ai làng bol tam brê lơh sa in mìng geh 10 tơlak đong lơm tàm dồ lồ. Gùng dà broă lơh nàng jơnau lơh nền tàm pơrjum lơh geh niam rlau kung bè bơtàu tơngguh ai tơngai lơh broă tơnơ̆ in den khà dong kờl uă rlau nàng làng bol in geh priă jền tam brê, tơngai ờ hềt geh phan bơna geh priă jền bơh brê 6, 7 nam hơ̆ sồng geh dơm chi. Dơ̆ bàr tai là bơnah bơcri kung gam lơyah rlau pa geh 67 tơlak đong lơm tàm dồ lồ mờ tàm 04 nam. Dilah bè tam brê pơgăp 150 tơlak đong dồ lồ, tơngai gơ wơl bơh 4 tus 5 nam den tơngai sơngka sền gàr jòng rlau, cồng nha brê rơ̆p jơnhoa rlau.

Tơnơ̆ 04 nam lơh jăt Jơnau lơh nền tàm pơrjum bơh Pơrjum dờng Đảng ƀộ càr dơ̆ XVI, tơngai lơh broă bơh nam 2020- 2025 bè tam brê mờ 03 nam lơh jăt Jơnau lơh nền tàm pơrjum sồ 06 bè bơtàu tơngguh broă brê bơnơm kơ̆ kơl jăp tus nam 2025, pơlam gùng tus nam 2030, broă lơh ătbồ, sền gàr mờ bơtàu tơngguh brê bơh càr Kon Tum dê lơh geh uă cồng nha niam ngan. Tŭ do bal mờ ătbồ, sền gàr niam rlau 550 rbô lồ brê geh is bal mờ mờr 64 rbô lồ brê tam, càr Kon Tum gam pơn jăt tai ai lài priă jền nàng bơcri bơtàu tơngguh lơh sa broă brê bơnơm jăt gùng dà kơ̆ kơl jăp mờ wèt tus jơnau kờñ tơngguh bă ù geh brê geh 64% tàm lồi nam 2025.