Di tàm dơ̆ tus còp do, Thứ trưởng Ƀộ Nông nghiệp mờ Phát triển Nông thôn ồng Hoàng Trung neh cri bơyai mờ Phó Kwang atbồ, Tổng kụk Hải quan lơgar Lo ồng Triệu Tăng Liên.

Tàm cri bơyai, kwang đơng lam 02 anih lơh broă neh ring bal uă bè bơta git gơ̆p lơh broă bal tàm gah kă bro mờ pờ mpồng drà kă bro gơwèt mờ ală bơta phan geh lơh bơh suơn sre brê bơnơm, phan tàm dà đah bàr lơgar dê. Bàr gah ring bal lơh pràn broă lơh bal tàm gah kă bro phan geh lơh bơh suơn sre mờ pờ drà kă bro tàm tơngai tus. Jăt mờ hơ̆, geh gờñ lơh gơs ală sră nggal nàng kĭ Nghị định thư bè sồr sền gròi kòp phan tam gơwèt mờ plai lơ-u ris, plai sầu riêng lơh mrềt bơh lơgar Việt Nam tăc tus lơgar Lo.