Hìu bơnhă bi Lê Thị Thắm ơm tàm sơnah ƀòn Chiềng Cơi, ƀòn dờng Sơn La tŭ do gam tam mờr 2 lồ ală bơta biap. Dilah bè lài do den bi Thắm pal glar bòl bơh àng drim gờñ cèng biap lòt tàm drà tac, giă tac lơyah mờ ờ kơ̆ kơljap, den bơh tŭ tus bal Hợp ták xã lơh sa suơn sre tơlir 26-3 tàm ƀòn dờng Sơn La, jơh ală bơta biap bi tam ndrờm geh hợp ták xã blơi jơh mờ giă blơi kơ̆ kơljap sùm. Ngui ù suơn thòng, mƀùr nàng tam ală bơta biap sàng goh, pah nam, hìu bơnhă lơh geh mờr 200 tơlak đông: “Bơh tŭ mut bal tàm hợp ták xã den khà lơh gơlik biaơ añ dê gơguh uă mờ geh anih blơi kơ̆ kơljap sùm, ờ duh pal lòt tac tàm drà, giă tac den 2 gah ring bal bơh sơn rờp tơn, dilah giă tac dipal den he tac, biap den tam jat di broă rơndap lơh bơh hợp ták xã dê”.

Tơnơ̆ 8 nam mut tàm drà kă bro phan lơh gơs bơh suơn sre sàng goh, Hợp ták xã lơh sa suơn sre tơlir 26-3 là anih pin dờn ngan tàm broă tam mờ tac phan lơh gơs bơh suơn sre kloh niam tàm Sơn La. Ờ mìng dong kờl lơh gơlik, tac phan lơh gơs bơh suơn sre kloh niam ai 12 nă cau geh jơng mờ hìu bơnhă làng bol lơh bal in, do gam là anih nàng tàm jàu bơta chài măi mok, dong làng bol tam gơl bơta kơlôi sơnơng, broă lơh tàm lơh sa suơn sre. Bi Trần Mạnh Hùng ơm tàm ƀòn Nong Nái, xã Chiềng Mung, kơnhoàl Mai Sơn pà git: “Lài do, añ tam prìt den priă lơh geh kờp bal là 5 tơlak đông pah nhai, tŭ do mờ khà biap bè do den tàm mờr 2 lồ biap añ lơh geh mờr 7 tơlak đông pah nhai. Bơh nhai 6 nam lài, añ lơh bal mờ hợp ták xã gŏ cồng nha lơh sa gơguh rlau. Hợp ták xã dong he in sơntìl, phơng sih mờ bơta chài sơngka sền gàr”.

Mờ tiah tam phan rlau 13 lồ, pah nhai hợp ták xã 26-3 tac tàm drà kă bro pơgap bơh 30 tus 40 tấn biap, kơnuh, plai chi ală bơta. Nàng tac jơh phan lơh gơs bơh suơn sre, hợp ták xã neh mờ gam gàr sùm 4 anih tac phan tơlir tàm drà 7/11, drà 308 mờ drà Rặng Tếch, ƀòn dờng Sơn La. Gàr sùm sră pơrgon jŏ tơngai mờ ală hìu ƀềp trŭ sa bal bè hìu sơnơm, hìu bơsram, mờ kung sơlơ tơnguh tai anih tac phan lơh gơs bơh suơn sre kloh niam tus ală siêu thị, drà bơh sơn rờp tiah đah tô dà lơgar. Ală bơta phan biap, kơnuh, plai chi kloh niam bơh hợp ták xã dê ndrờm geh giă tac jơnhia rlau mờ drà kă bro bơh 20 tus 30%, kơnờm bơh hơ̆ priă lơh geh bơh lơh sa suơn sre kung jơnhua rlau. Bi Hoàng Thị Thắm, Phó Kwang atbồ hợp ták xã Lơh sa suơn sre tơlir 26-3 Sơn La pà git: “Tac phan lơh gơs gơ wèt mờ hợp ták xã den bol hi geh uă ngan anih, lài ngan là ală pang mạng xã hội bè facebook, zalo mờ ală anih kă bro điện tử. Bol hi pơn đàng mờ tac phan tàm ală pang mạng xã hội hơ̆ kung cèng wơl cồng nha niam ngan, nac kờñ blơi mờ bol hi lòt jun, tơl broă gŏ ƀuơn rlau. Gah dơ̆ 2 là bol hi tac tàm ală anih ràng phan, tac tơn”.

Mờ broă lơh ngac ngar, bơceh pa, broă lơh bal lơh sa ờ mìng dong hợp ták xã rề ơnàng broă lơh sa, lơh gơlik li la phan bơh suơn sre, bơh phan ris tus phan neh lơh gơlik, mờ gam dong làng bol tac phan lơh gơs bơh suơn sre mờ giă jơnhua rlau. Dùl broă lơh sa pa geh lơh gơs, cèng wơl bơta kuơ ai jơh ală gah tus bal in, bơh hơ̆ chồl pràn bơtàu tơnguh lơh sa suơn sre. Bi Nguyễn Đình Đại, ơm tàm ƀòn Thống Nhất, xã Chiềng Mung, kơnhoàl Mai Sơn đơs: “Tŭ do, añ tam thanh long, ƀắp sũ, blơn krep mờ gam lơh bal mờ hợp ták xã. Tŭ lơh bal den jòi geh anih tac phan lơh gơs bơh suơn sre he dê ƀuơn rlau, kơ̆ kơljap jŏ jòng rlau”.

Tàm ală tiah ƀòn lơgar càr Sơn La dê, broă lơh bal lơh sa geh sền là broă lơh dipal, geh cồng nha tàm broă tam gơl rơndap tap sèng lơh sa, lơh gơs ală mpồl lơh bal lơh sa, tơnguh bơta niam phan lơh gơs bơh suơn sre, drơng jơnau kờñ bơh drà kă bro dê.