Bơh àng drim gờñ tus nggùl mang, bulah trồ tơngai duh halà trồ mang noat mrềt, sap loa pờ tơlik bơh bơnơm Hàm Rồng kung gam mpong ntas sùm. Bi Ngô Khổng Tuấn Anh, 1 tàm 4 nă cau chài drơng măi pờ tơlik jơnau pà git: bơh tŭ anih pờ tơlik jơnau geh ntrờn bơh ƀòn dờng Pleiku tus bơnơm Hàm Rồng, bơta ơnàng pờ tơlik jơnau đơs sơñio rùp bơh 40 tus 50 kơi sồ neh geh tơnguh bơh 80 tus 100 kơi sồ, gơ glòm jơh ală ù tiah càr Gia Lai. Mơya tam gơl wơl, jơh 4 nă cau pal lơh broă tàm anih ndrờm bè tam cah is mờ bơdìh tơn.

Jat bi Ngô Khổng Tuấn Anh pà git, bulah ơm rềp gùng dờng 14 gal cau mờ mìng ơm ngài ƀòn dờng Pleiku 14 kơi sồ, mơya bơnơm Hàm Rồng ndrờm bè ờ geh cau, ngềt ngơt ngan, pah nam mìng geh tơngai, càl, mìu halà mhual. Bơh jơng bơnơm tus anih pờ tơlik jơnau là kuèl kue ngan, jơnhua rlau 400 thơk, guh halà mù ờ ƀuơn dùl êt lơi: “Tàm nhai mìu, gùng guh tus bơnơm Hàm Rồng ntiar ngan, tŭ mờ nha tờm nho 2 gah gơ jrùh tàm gùng, đì rơndeh kal ke ngan. Uă tŭ he guh mờ rơndeh ntiar pừ tơn, tàm gùng den ờ geh cau lòt rê. He kung pal lơh ngan pơ tàu rơndeh mờ guh tus anih pờ tơlik jơnau đơs tàm gơ in di tŭ jơ jat jơnau sồr nàng tàm jàu broă lơh oh mi in. Bulah kal ke mơya he kung gam pơn đơl pràn lơh niam kơnòl broă”.

Bi Trần Thiên Thế kung là cau chài drơng măi pờ tơlik jơnau neh geh uă nam đềt mềr mờ anih pờ tơlik Hàm Rồng. Bi pà git, bi bal mờ cau lơh broă bal neh kwèng mờ broă ơm kis ơm rlô tàm hìu kâp 4 dềt bơh anih do dê, mờ ală dơ̆ sàu sa bal hiă ngan. Mơya bơta rơngòt kơnàs còng tàm nhai mìu mờ ồs sa brê tàm kàl prang sùm gơ ơm tàm nùs tồr, tài Hàm Rồng jơnhua bè dùl jrong kup kơnàs geh is mờ geh gơ glờm bơh brê nho ƀuơn ồs sa: “Ndrờm bè nam lơi kung geh kơnàs còng lơm, geh tŭ den nggờc, geh ală tŭ den hoàc huơr dờng, kàl prang den ƀuơn gơlik geh ồs sa chi che tàm brê gùt dar. Bơta aniai lơi bè pràn kơldang să jan den kung rơcang lài tàm pơ gơl dơ̆ lơh broă mờ gơp. Nhai mìu càl rbut dờng ală bơta ờ niam bè măi mok sùm gơlik geh, tŭ hơ̆ dilah mìng geh 1 nă cau den kal ke ngan nàng bơsong bơta gơlik geh. Ờ di là dơ̆ he drơng măi, mơya tŭ geh bơta ờ niam lơi den oh mi kung lời tĕ broă tàm hìu nàng tus hờ anih pờ tơlik jơnau đơs dong kờl bơsong broă gơlik geh”.

Ồng Nguyễn Khắc Quang, Phó Kwang atbồ Anih pờ tơlik jơnau đơs – sơñio rùp càr Gia Lai pà git: jơh ală jơnau sơñio rùp, pờ tơlik jơnau đơs tàm càr ndrờm gơwèt tàm Anih pờ tơlik Hàm Rồng lơm nàng gơtùi tus mờ cau iat, cau sền. Mờr 1 nam do, Anih pờ tơlik jơnau đơs – sơñio rùp càr Gia Lai geh tai kơnòl broă pa là pờ tơlik gah pờ tơlik jơnau đơs dà lơgar VOV1 mờ VOV4, tŭ jơ là 19 jơ pah ngai. Bulah ơm ngài tiah tờm, bơta lơh broă kal ke mờ geh uă bơta sơbơng roh, mơy ală cau chài drơng măi tàm do ndrờm lơh ngan sơrlèt gan, lơh gơs niam kơnòl broă geh jàu: “Anih pờ tơlik jơnau đơs – sơñio rùp càr Gia Lai kung lơh gơlik bơta niam, sền gròi bè tơl bơta kờp bal bè phan bơna kung bè nùs nhơm, geh broă dong kờl oh mi in tai, nàng oh mi geh tai priă jền bơdìh mờ priă dong kờl bơh anih pờ tơlik jơnau đơs dê đơs bal. Rlau 1 nam do, Anih jơnau đơs Việt Nam ai măi pờ tơlik jơnau đơs gah VOV4 tus, mờ kung pờ tơlik VOV1 tai den pal đơs là mpồl bol hi chờ hờp ngan tŭ geh măi mok, bơta niam pờ tơlik gơguh rlau. Tềng Kbang, ù tiah pôs đồng kac màng iat loh ngan. Bơh hơ̆ làng bol git uă tơngume niam, chờ hờp ngan ai bơyô iat rơdiô tàm Gia Lai in đơs bal mờ jơh gùt tiah gùt dar in tai”.

Trồ mang tus, tàm bơta noat mrềt bơh bơnơm Hàm Rồng dê, ală kwang bàng pờ tơlik bơh Anih pờ tơlik jơnau đơs – sơñio rùp càr Gia Lai dê kung gam ngềt ngơt lơh broă. Khi sơrlèt gan bơta kal ke, bơta dùl nă să is nàng pơgồp bơnah ai jơnau tơnggit tus mờ cau iat, cau sền rềp, ngài in.