. Ală Hìu bơnhă Việt Nam neh gơ gơs hìu ơm dơ̆ 2 cèng wơl bơta kờñ gơboh hìu bơnhă- hơ̆ là bơta sền gĭt bal bơh uă gơ̆p bơyô kơnòm să lơgar Lào mờ Campuchia dê tus bal broă lơh “Hìu bơnhă Việt Nam mờ cau bơsram dờng lơgar Lào mờ Campuchia gam bơsram sră tàm ƀòn dờng Hồ Chí Minh” nam 2023 tàm dơ̆ tơn jơh geh bơyai lơh tàm mho mang ngai 23/02  bơh Ủy ƀan Mặt trận Dà lơgar Việt Nam ƀòn dờng Hồ Chí Minh dê bơyai lơh.

Gơwèt mờ 91 nă cau bơsram dờng lơgar Lào mờ 14 nă cau bơsram dờng lơgar Campuchia tus bal broă lơh nam 2023, ală hìu bơnhă dờp ròng siam tàm ƀòn dờng Hồ Chí Minh neh dong ală cau bơsram dờng geh tai bơta gơn kơnờm pơnđơl pràn lơh ngan bơsram sră kơnờm bơta dong kờl bè phan bơna bal mờ nùs nhơm tàm bơta sền gròi kờñ gơboh. Kơnờm hơ̆ ală cau bơsram dờng geh uă tŭ tơngai niam nàng jòi gĭt tai bè bơhiàn niam chài mờ ù tiah kòn bơnus lơgar Việt Nam, pơgồp bơnah sơlơ lơh niam rlau tai nùs nhơm tam klăc bal ngan đah làng bol 3 lơgar Việt Nam- Lào mờ Campuchia. Di dơ̆ do, tơn jơh broă lơh lơh broă mờ lơgar ndai làng bol mờ broă lơh cau Việt Nam tàm lơgar ndai nam 2023, Ủy ƀan Mặt trận Dà lơgar Việt Nam ƀòn dờng pà gĭt Mặt trận mờ ală mpồl cau neh rcang bơyai lơh uă broă lơh tìp mat lơh kwèng mờ làng bol ală lơgar: Lo, Lào, Campuchia; sơlơ tơnguh priă jền hòi jà tă pơgồp bal bơh ală mpồl lơh broă bơdìh Cíñ phủ bơh lơgar ndai mờ ngui geh cồng nha ală bơnah priă dong kờl.