Tổng Thư ký Quốk hội, Củ ñiệm Văn phòng Quốk hội ồng Bùi Văn Cường pà git: Pơrjum dơ̆ 7, Quốk hội geh sền wơl 40 tơngu me, tàm hơ̆ geh 24 tơngu me gơwèt broă lơh adăt boh lam, 16 tơngu me bè lơh sa mpồl bơtiàn, kes priă dà lơgar, jăt sền mờ ală bơta kwơ màng ndai.

Kờp dŭ tơngai lơh broă tàm 27 ngai, sơn đờm bơyai lơh tàm ngai 25 nhai 5 mờ tơn jơh Pơrjum tàm mho ngai 28 nhai 6. Tàm pơrjum, ală kwang bàng tàm Ủy ƀan Thường vụ Quốk hội đơs là, broă Cíñ phủ ai jơnau lơh Adăt Ù tiah nam 2024 geh ngui lơh jăt bơh ngai 01 nhai 07 nam 2024 ala mờ ngai 01 nhai 01 nam 2025 bè tàm Adăt Ù tiah neh geh cih. Mơya tus tŭ do, Ủy ƀan Thường vụ Quốk hội kung ờ hềt dờp sơl Jơnau yal bơh Cíñ phủ sồr lơh Nghị quyết bơh Quốk hội tam gơl, bơtơl sèng 1 Bơta 252 Adăt Ù tiah dê.