Drim ngai 12/05, tàm ƀòn dờng Gia Nghĩa, Ƀộ Kwang àng pơgồp bal mờ Anih duh broă Làng bol càr Dăk Nông bal mờ ală mpồl dong kờl bơyai lơh Dơ̆ lam lơh uă ngan ai cau lik lòt bơtàu, tơn jơh hìu lơh ing, hìu ồm sèt ñhăt dà mìu; mơkung dờp priă jền mờ tàm jàu hìu lơh pơn yơu tàm ù tiah càr dê. Ƀộ Kwang àng neh hòi jà tă pơgồp bal mờ jàu 30 tơmàn đong nàng dong kờl lơh 500 nơm hìu ai hìu bơnhă rƀah, hìu bơnhă pa lik klàs rƀah mờ hìu bơnhă geh sră dong kờl kal ke bè hìu ơm tàm ù tiah càr Dăk Nông dê.

Tàm dơ̆ lam lơh, Trung tướng ồng Phạm Thế Tùng– Thứ trưởng Ƀộ Kwang àng gờm chờ ală hìu bơnhă geh dờp phan pà, mơkung pơyoa jơnau ưn ngài tus ală cau dong kờl, ală sờh, gah broă tàm càr Dăk Nông dê neh lòt bal, pơgồp bal mờ Ƀộ tàm broă lơh tơn jơh hìu lơh ing, hìu ồm sèt ñhăt dà mìu tàm tiah do dê. Jat Broă rơndăp lơh, càr Dăk Nông rơ̆p tơn jơh kờp bal 1 rơbô 755 nơm hìu sèt nhăt dà mìu, dong kờl hìu bơnhă rƀah, hìu bơnhă pa lik klàs rƀah, hìu bơnhă geh sră dong kờl Dà lơgar mờ làng bol jơi bơtiàn dồ ết nă cau tàm jơh gùt càr dê. Kờp tus tơngai tŭ do, càr neh lơh sir pơgăp 75% mpồl broă lơh mờ kờp dŭ rơ̆p lơh sir jơh broă tơn jơh hìu lơh ing, hìu ồm sèt nhăt dà mìu lài mờ ngai 30/8/2025.