Anih duh broă Làng bol càr Gia Lai pa geh sră yal dan Đảng ủy Anih duh broă Làng bol càr sền sơ wì, yal mờ Mpồl Lơh kơnòl broă sùm Tỉñ ủy càr ring bal gùng dà broă lơh nàng Mpồl duh broă Làng bol càr in lơh jat Jơnau lơh nền tàm pơrjum dong kờl priă jền ai kwang bàng, kông cứk, viên cứk mờ cau lơh broă kấp càr in pal ntrờn rê tàm anih tờm sră nggal gơnoar atbồ pa tơnơ̆ tŭ tơmŭt bal mờ càr Bình Định.

Jat jơnau sồr đơs, tơl nă cau rơ̆p geh dong kờl 23 tơlak đong, ndrờm mờ pơgap 10 nhai priă nhai ƀòn lơgar dê. Kờp jơh khà cau geh dờp dong kờl là 1 rơbô 844 nă cau, mờ kờp jơh priă tă mờr 42 tơmàn 400 tơlak đong, ai bơh kes priă càr Gia Lai lài mờ tŭ tơmŭt bal. Broă lơh do nàng kờñ dong cau lơh broă in geh tai ală bơta nàng rcang priă jền blơi phan ngui tàm rài kis kwơ màng tàm tiah ơm pa. Kờp dŭ tơnơ̆ tŭ tơmŭt bal, anih tờm sră nggal gơnoar atbồ- cíñ trị bơh càr pa dê rơ̆p lơh tàm ù tiah càr Bình Địnbh tŭ do, ngài mờ anih tờm sră nggal gơnoar atbồ yau pơgăp 65 kơi sồ.