Nam 2023 pa do Ci ƀộ ƀòn Chứ, xã Ya Ly, kơnhoàl Sa Thầy tơmŭt tai 2 nă đảng viên pa kòn cau Jarai là A Nói mờ Phạm Quang Anh. Ƀí thư Ci ƀộ mờ kung là Kwang atbồ ƀòn Chứ ồng A Thoải pà git, Ci ƀộ neh ai pe nă làng bol geh pơnrơ jăk kòn cau Jarai, tàm hơ̆ geh, Y Phư, A Hlưm mờ A Num lòt bơsram ơdŭ bơtơl kờñ git bè Đảng. Jơh 3 nă cau do ndrờm là cau lam lài tàm broă bơtàu tơnguh lơh sa hìu nhă kung bè lam lài tàm broă bơ̆t bơtàu ƀòn lơgar pa. Jăt Ƀí thư Ci ƀộ A Thoải đơs, kờñ làng bol iăt, pin dờn mờ đờm jăt bal den tơl nă đảng viên pal lơh sa niam, lam lài tàm ală broă lơh ƀòn dê.

Ồng A Thoải đơs tai: “Nam pa do Ci ƀộ bol añ neh tơmŭt geh 2 nă cau đảng viên pa, lồi nam tơmŭt tai 1 nă cau. Bol añ neh sồr 3 nă cau lòt bơsram bơtơl nàng git đảng. tàm nam geh sơrlèt mờ jơnau geh ai 5 nă. Kơnờm mờ broă sền gròi, đơng lam nền nòn, lam lơh di tŭ den tàng geh cồng nha bè tŭ do. Tŭ do, bol añ gam pơn jăt tai lơh jăt broă bơ̆t bơtàu ƀòn lơgar pa, pal ñhăp ñhar, mblàng yal di pal, tam klăc bal, pal ndrờm bal. Bơ̆t bơtàu ƀòn lơgar pa pal git cèng geh bơta kwơ mùl màl. Dà lơgar neh sền gròi he pal lơh ngan brồ guh is, bañ kơ̆p tàm broă dong kờl bơh dà lơgar dê tai, să tờm he pal brồ guh. Tơnơ̆ do, oh kòn he geh dờp, gùng lòt neh geh, rài kis phan bơna tơl, bơta do he gam wèt tus”.

Đảng ƀộ xã Ya Ly, kơnhoàl Sa Thầy tŭ do geh 9 Ci ƀộ mờ 81 đảng viên, tàm hơ̆ geh 34 đảng viên là cau jơi bơtiàn ờ gal cau. Bơh bồ tơngai lơh broă tus tŭ do ală Ci ƀộ gơwèt Đảng ƀộ xã Ya Ly neh bơtàu tơnguh geh 22 đảng viên pa. Mìng is tàm nam 2024 do Ci ƀộ bơh 3 ƀòn: Chứ, Tum, Chờ kờp dŭ geh bơtàu tơnguh bơh 5 tus 7 đảng viên pa là cau jơi bơtiàn ờ gal cau kis bơh yau tàm do.

Ƀí thư Đảng ủy Ya Ly Phan Chí Thiện pà git: bơh broă lơh broă bal, ală dơ̆ pơrjum, broă lơh bơh làng bol, kấp ủy, ci ƀộ mờ tơl đảng viên dê ndrờm geh kơnòl jòi nàng git, gŏ cau pa, cau jăk chài tàm mpồl bơtiàn. Nàng Ci ƀộ pràn, tam klăc bal, tơrgùm geh uă cau jăk tàm broă bơtàu tơnguh đảng viên pa pal geh rơwah cau geh bơngă pin dờn tàm rài kis, broă lơh pah ngai mờ lơh broă sa. Mờ sền gròi, pal kah bơto sồr, tềm lam ală cau gam kơnòm, cau bơsram sră tus gùng tus dà. Ƀí thư Đảng ủy xã Ya Ly ồng Phan Chí Thiện đơs nền, kơnờm bơ̆t bơtàu geh Ci ƀộ, Đảng ƀộ pràn kơl dang, ngui geh gơnoar broă, kơnòl bơh tơl đảng viên dê, tàm hơ̆ uă ngan là pe ƀòn jơi bơtiàn ờ gal cau, tus lồi nam 2023 xã Ya Ly, kơnhoàl Sa Thầy neh lơh gơs 19 tàm 19 khà broă bơ̆t bơtàu ƀòn lơgar pa. Ƀí thư Đảng ủy xã Ya Ly ồng Phan Chí Thiện đơs tai: “Bơh ală đảng viên tàm Mpồl đơng lam, đảng viên tàm Ci ƀộ mờ kung là kwang atbồ ƀòn, đảng viên tàm ală thôn, ƀòn uă ngan ai Đảng ủy xã in tàm broă lơh jăt ală gùng dà broă lơh bơh Đảng, adăt boh lam bơh Dà lơgar dê. Mùl màl bè nam pa do bol añ lơh ƀòn lơgar pa lam làng bol ai ù lơh gùng, dong kờl ngai lơh broă, ai geh bơta niam tiah kis tơlir-kloh-niam bơh thôn ƀòn geh gơnoar broă bơh đảng viên ală Ci ƀộ geh sền gròi ngan”.

Nam 2023 Đảng ƀộ kơnhoàl Sa Thầy, càr Kon Tum neh tơmŭt geh 97 đảng viên pa, geh 102% pơn drờm mờ broă rơndăp lơh tơnguh khà đảng viên gùt Đảng ƀộ tus 2 rơbô 033 đảng viên. Tus tŭ do jơh 64 thôn, ƀòn tàm kơnhoàl ndrờm neh lơh gơs broă pồ gơnoar broă Ƀí thư Ci ƀộ mờ kung là kwang atbồ ƀòn ha là Kwang atbồ mpồl lơh broă Mặt trận ƀòn. Mò Y Sâm, Phó Ƀí thư Thường trựk Huyện ủy, Củ tịc HĐÑZ kơnhoàl Sa Thầy pà git, nàng cau kơnòm să tàm ală thôn, ƀòn geh bơta ngăc ngar tàm broă bơsram sră, bơta pràn kơl dang kờñ mŭt tàm mpồl Đảng, Huyện ủy kơnhoàl Sa Thầy sền kwơ tàm broă bơ̆t bơtàu Ci ƀộ pràn kơl dang pơgồp bal mờ lơh sa mpồl bơtiàn ƀòn lơgar bơtàu tơnguh. Mò Y Sâm, Phó Ƀí thư Thường trựk Huyện ủy, Củ tịc HĐÑZ kơnhoàl Sa Thầy đơs: “Bol añ sền gròi tus broă bơtàu tơnguh đảng viên tàm tiah ƀòn mờ tàm hơ̆ uă ngan là broă bơtàu tơnguh đảng viên cau jơi bơtiàn ờ gal cau. Bol añ lơh pràn broă bơtàu tơnguh lơh sa hìu nhă tiah làng bol ờ gal cau là tơrgùm tam gơl phan tam, phan ròng nàng làng bol pin dờn gơwèt mờ broă đơng lam, lam lơh bơh Đảng dê. Bơh broă lơh mùl màl rơnàng kơnòm să gŏ Đảng, gơnoar atbồ sền gròi tus broă bơtàu tơnguh lơh sa hìu nhă kung bè broă bơ̆t bơtàu mpồl kwang bàng kơnòm să. Tàm tơngu me hơ̆ bol añ bơ̆t bơtàu geh cau, bơto bơtê, bơtơl rơnàng kơnòm să nàng tơmŭt Đảng”.

Bơh broă bơ̆t bơtàu Ci ƀộ pràn kơl dang pơgồp bal mờ lơh sa mpồl bơtiàn ƀòn lơgar bơtàu tơnguh, jơnau đơs bơh Huyện ủy Sa Thầy pà gŏ tơngu me, broă lơh bơh ci ƀộ tàm ală thôn, ƀòn geh tam gơl pa, mŭt tàm bơta niam mùl màl rơlao. Là kơnhoàl tiah nhàr dà lơgar càr Kon Tum dê, mờ bơta geh sơnrờp ngan bè lơh sa mpồl bơtiàn uă kal ke, mơya tus lồi nam 2023 kơnhoàl Sa Thầy neh geh 4 xã geh khà ƀòn lơgar pa, priă geh tơl nă làng bol geh mờr 52 tơlăk đong tàm 1 nam. Gùt kơnhoàl geh 54 tàm 64 thôn, ƀòn geh dờp “Thôn, Ƀòn niam chài”.