Tàm sơnah ƀòn Mũi Né, càr Lâm Đồng, mpồl lơh broă ntrờn bơh Kwang àng càr tus tơn tàm hìu mò Nguyễn Thị Tiếp, 79 sơnam, nàng dờp tơrgùm mẫu sinh phẩm ADN. Mò Tiếp geh bàr nă oh klao là cau ling chơ̆t màng, sơnđan là Nguyễn Văn Nô, phi să tàm nam 1968 mờ Nguyễn Văn Ốm, phi să tàm nam 1973. Rơlao 50 nam neh rơlao, cau tàm hìu nhă kung gam kơ̆p gơn sùm jòi gŏ ƀồc ntìng cau ling chơ̆t màng bơh bàr nă cau ling chơ̆t màng do. Broă ai mẫu ADN geh lơh tàm hìu tơn neh lơh geh nùs nhơm kơ̆p kờñ jòi gŏ wơl cau pròc mhàm. Mò Lê Thị Tư, kòn ùr mò Tiếp ngoh rơngăc pà git: “Hìu nhă chờ hờp ngan tŭ geh ai mẫu ADN. Do là jơnau kơ̆p kờñ bơh hìu nhă dê neh bơh jŏ ngan, mơya lài do ờ hềt geh tơl bơta nàng lơh. Tŭ do, hìu nhă kơ̆p kờñ rơ̆p gờñ geh jòi gŏ jơnau yal bè cau pròc mhàm”.

Kung tàm sơnah ƀòn Mũi Né sơl, hìu nhă ồng Trần Văn Hùng kung gam ờ hềt jòi gŏ bơto ƀồc cau ling chơ̆t màng Trần Văn Năm, bi tờm ồng dê, phi să tàm nam 1966. Tơnơ̆ mờ uă nam kơ̆p gơn, ồng Hùng kơ̆p kờñ broă dờp tơrgùm mờ tàm pơn drờm ADN rơ̆p dong kờl hìu nhă đal git bơtô ƀồc bơh cau pròc mhàm dê: "Broă dờp tơrgùm mẫu ADN nàng jòi, đal git măt cau ling chơ̆t màng geh kwơ màng ngan. Hìu nhă kơ̆p kờñ gờñ jòi gŏ wơl cau pròc mhàm, geh gŏ bơtô ƀồc nàng kah kơlôi, chu ñàng duh khoai, kung là bơta kơ̆p kờñ bơh lài do hìu nhă dê sơl”.

Tàm tơngai sơnrờp Broă lơh dờng 500 ngai mang, càr Lâm Đồng neh bơyai lơh 32 dơ̆ lòt jòi sền, mpồl lơh broă geh gơnoar neh jòi rồ, tơrgùm geh 26 ƀồc ntìng cau ling chơ̆t màng, ai mẫu nàng drơng tàm broă đal git ADN gơwèt mờ 17 nơm ƀồc. Mờ lơh gơs broă ai mẫu 3 rơbô 625 bơtô ƀồc tơl niam tàm 11 ƀlàng tơ̆p ƀồc cau ling chơ̆t màng, gờñ rơlao mờ broă rơndah lơh geh ai 3 nhai. Kwang àng càr Lâm Đồng kung neh dờp tơrgùm geh 1 rơbô 371 mẫu sinh phẩm ADN bơh cau pròc mhàm.

Lơh jăt tơngai dơ̆ bàr, càr Lâm Đồng kờp dŭ dờp tơrgùm geh di pơgăp 1 rơbô 74 mẫu sinh phẩm ADN bơh cau pròc mhàm cau ling chơ̆t màng. Prao mpồl lơh broă geh crơng gơs, tàm hơ̆ geh 3 mpồl ơm dùl ba tiah mờ 3 mpồl ntrờn, tus tơl hìu ală cau pròc mhàm cau dờng sơnam, cau gơtìp kòp jroă ha là kal ke tàm broă lòt rê. Bal mờ broă dờp tơrgùm mẫu, mpồl kwang àng gam pơgồp bal mờ gơnoar atbồ sàh nàng sền wơl, đal git jơnau yal, lam sồr ală hìu nhă tus bal, gàr niam broă ờ gơtìp gơlời ală cau ờ geh tơl jơnau yal. Đại úy ồng Hoàng Đăng Hải, Cơl dŭ lơh broă Cảnh sát Atbồ sră nggal bè lơngăp lơngai mpồl bơtiàn, Kwang àng càr Lâm Đồng pà git: “Să tờm añ tam pà drơng broă dùl mpồl lơh broă ntrờn, tus tơn tàm ală hìu nàng dờp tơrgùm ADN bơh cau pròc mhàm cau ling chơ̆t màng dê. Bol añ tus bal mờ nùs nhơm geh kơnòl uă ngan, lơh ngan lơh gơs niam kơnòl broă geh jào”.