Jăt Mpồl đơng lam Ling klàng sàh Đặng Thùy Trâm yal, kwang bàng, cau ling mờ ala măt kwang đơng lam sàh bơyai lơh jòi tàm tiah Hìu sơnơm Đức Phổ gŏ 2 ƀồc ntìng cau ling chơ̆t màng bal mờ uă phan lời wơl. Ală phan lời wơl geh jòi gŏ, tàm hơ̆ geh toah tăng, biài ju, che su, ào blờt, đèng pil mờ pềs pơn ñàr neh gơtìp sek.

Ală ƀồc ntìng neh geh jào ai Cơl lơh broă Niam chài mpồl bơtiàn sàh Đặng Thùy Trâm prăp gàr di jăt mờ jơnau geh ai. Rơlao 6 nhai lơh “Broă lơh dờng 500 ngai mang lơh pràn broă jòi rồ, tơrgùm mờ đal git măt ƀồc ntìng cau ling chơ̆t màng”, càr Quảng Ngãi neh lơh gơs broă tơrgùm mẫu sinh phẩm gơwèt mờ 13 rơbô 514 ƀồc ntìng cau ling chơ̆t màng ờ hềt git đal, gờñ rơlao mờ broă rơndăp lơh geh ai bơh càr dê 45 ngai mờ broă rơndăp lơh Dà lơgar ai 5 nhai. Mờ tơrgùm geh 4 rơbô 929 mẫu ADN cau pròc mhàm cau ling chơ̆t màng, geh rơlao 80%.