Tàm gùl poh nhai 10, lŏ Bàn Mùi Diết, kòn cau Dao, tàm thôn 12, sàh tiah nhàr lơgar Ia Rvê tus gờñ tàm hìu lơh broă Anih duh broă Làng bol sàh nàng tus bal rơwah sồ dờp ù lơh hìu ơm. Bơklao lòt lơh broă hờ lơgar bơdìh, lŏ ơm tàm hìu sền gàr bàr nă kòn gam dềt. Hìu gam ơm geh lơh ing tàm bă ù mè bèp. Rài kis mìng kơnờm tàm broă tam biăp, ròng iar, priă geh ờ uă. Den tàng, broă geh dờp ù lơh hìu neh lơh lŏ chờ hờp ngan. “Añ chờ hờp ngan, tŭ geh Dà lơgar ai ù lơh hìu ơm, ù lơh sa bè do añ chờ hờp ngan mờ ưn ngài Dà lơgar uă ngan”.

Geh bal mờ nùs nhơm chờ hờp do, ồng Đặng Tòn San, tàm thôn 13, neh geh mờr 10 nam ơm kis tàm tiah nhàr lơgar Ia Rvê, mơya hìu nhă ồng kung gam ờ geh ù lơh hìu ơm, ù lơh sa sơl. Nàng geh piang sào tàm rài kis, ồng San neh pal lòt lơh broă ơpah sùm tàm gùt tiah. Tŭ Dà lơgar lơh jăt broă dong kờl ù tiah, ồng San kơ̆p gơn pah ngai nàng geh dờp ù, bơh tŭ hơ̆, geh tơl bơta niam nàng lơh sa kơl jăp tơn tàm ƀòn lơgar. “Lài do añ ờ geh ù, tŭ do geh Dà lơgar dong kờl làng bol in, añ ưn ngài ngan, lài do añ mìng lòt lơh broă ơpah, tŭ do neh geh ù bloh den lơh sa tàm do mơ”.

Mờ ală hìu làng bol bè lŏ Diết, ồng San dê, ù lơh hìu ơm là bơta niam nàng ơm kis mờ lơh broă sa kơl jăp; ù lơh sa là tơngu me tờm nàng rơhời rơcang is tàm rài kis, tơrmù broă gơrềng tàm broă lơh ơpah jăt kàl. Jăt jơnau sền wơl bơh sàh tiah nhàr lơgar Ia Rvê dê, gùt sàh do geh 155 hìu kờñ geh dong kờl bè ù tiah mờ sră nggal adăt boh lam bè ù tiah. Tàm hơ̆, geh 92 hìu ờ geh ù lơh hìu ơm, ù lơh sa; 6 hìu neh geh ù lơh sa mơya ờ hềt geh ù lơh hìu ơm, bal mờ uă hìu kờñ geh dong kờl lơh gơs sră nggal adăt boh lam bè gơnoar ngui ù.

Lơh jăt Jơnau lơh nền sồ 104 bơh Thủ tướng Chính phủ dê bè bơtàu tơnguh lơh sa mpồl bơtiàn pơgồp bal mờ sền gàr lơngăp lơngai, dà lơgar tàm Tây Nguyên mờ Jơnau lơh nền sồ 28 bơh Mpồl duh broă Làng bol càr Dăk Lăk dê bè broă dong kờl ù tiah gơwèt mờ làng bol jơi bơtiàn ờ gal cau, sàh Ia Rvê lơh geh gùng dà broă lơh nàng ai geh bă ù gơdờp bal mờ jơnau kờñ mùl màl.

Bă ù lơh hìu ơm geh ai rơndăp ù tiah ơnàng mờr 8 lồ, jăt gah gùng lòt tus tàm ală thôn, bơh thôn 8 tus thôn 10, tam pà gơs 198 bă. Jăt gùng dà broă lơh geh ai, tơl hìu geh ai 400 thơ̆k vuông, tàm hơ̆ geh 200 thơ̆k vuông ù lơh hìu ơm mờ 200 thơ̆k vuông ù tam phan pah nam.

Lài mờ tŭ lơh, khà măt ală hìu geh dờp, sră rùp ù tiah rơndăp broă ù tiah lơh nền mờ ală jơnau geh ai gơrềng bal geh lir loh làng tàm 15 ngai tềng hìu lơh broă Anih duh broă Làng bol sàh. Mpồl atbồ is ală thôn kung yal tơn nàng làng bol in git, tus bal pơgồp jơnau đơs. Dơ̆ rơwah sồ tàm gùl nhai 10 ai 28 hìu ờ hềt geh ù lơh hìu ơm in, geh bơyai lơh loh làng mờ broă tus bal sền bơh gơnoar atbồ, Mặt trận Dà lơgar bal mờ làng bol.

Ồng Nông Văn Gióng, lam bồ thôn 4, sàh Ia Rvê pà git, tàm dơ̆ sơnrờp lơh jăt Rơndăp broă 104, thôn geh 6 hìu geh dờp ù. Do là ală hìu nhă geh rài kis gơtìp kal ke, ơm kis tàm thôn uă nam mơya ờ geh ù nàng tam phan mờ ù lơh hìu ơm kơ̆ kơl jăp. “Geh broă sền gròi bơh Đảng mờ Dà lơgar 6 hìu làng bol do geh Dà lơgar pà ù do den làng bol chờ hờp ngan. Tŭ do tus dờp ù tàm sàh, 6 hìu tàm thôn añ guh bic bơh gờñ mờ lòt tơl”.

Geh ù lơh hìu ơm mìng rơ̆p bơsong dùl bơnah kal ke. Nàng làng bol mùl màl kơl jăp rài kis, geh bơta pràn brồ guh lik klàs rơƀah, sàh Ia Rvê gam lơh gơs sră nggal nàng ai 266 lồ ù lơh sa tàm ală thôn 7, 12 mờ 13. Jăt gùng dà broă lơh bơh sàh dê, tơl hìu kờp dŭ geh dờp 1 lồ ù. Bal mờ ù lơh sa, sàh rơ̆p lơh ală gùng dà broă lơh nàng dong kờl priă càn sa priă cồng ờ uă, bơto sồr tàm broă rơwah phan tan, phan ròng gơdờp mờ ù tiah geh is mờ bơta pràn lơh bơh tơl hìu dê.

Ồng Nguyễn Huy Tiến, Bí thư Đảng ủy sàh Ia Rvê pà git, sàh rơ̆p pơn jăt tai sền wơl cau, bă ù mờ lơh mhar broă lơh, mờ pơgồp bal mờ dong kờl ù tiah mờ gùng dà broă lơh rài kis lơh broă sa ai làng bol in. “Tàm tơngai tus Đảng ủy, Anih duh broă Làng bol sàh pơn jăt tai sồr cơl dŭ lơh broă lơh sa pơn jăt tai sền wơl nàng bơyai lơh ai ù lơh hìu ơm mờ ù lơh sa, nàng dong kờl làng bol geh ù tam phan, pơgồp bal tàm broă kơl jăp rài kis tàm sàh tiah nhàr lơgar Ia Rvê dê. Bal mờ broă ai ù, sàh kung geh ală gùng dà broă lơh nàng lơh ală broă lơh bè rài kis broă lơh broă sa, tam gơl broă lơh nàng làng bol kơl jăp rài kis, đềt mềr jŏ jòng tàm sàh tiah nhàr lơgar dê”.

Bơh ală bă ù lơh hìu ơm sơnrờp ngantus mờ broă rơndăp lơh ai ù lơh sa, broă dong kờl ù tiah tàm sàh Ia Rvê gam rơhời wèt tus bơsong jơnau kờñ mùl màl bơh làng bol jơi bơtiàn ờ gal cau in. Cồng nha bơh broă dong kờl ờ mìng geh tàm khà hìu geh jào ù, mờ gam tàm bơta pràn dong kờl làng bol in geh hìu ơm kơl jăp, geh ù lơh sa mờ lơh geh priă jŏ jòng. Do kung là bơta kwơ màng nàng làng bol iang nùs lơh sa, đềt mềr mờ tiah nhàr lơgar, pơgồp bal tàm broă bơtàu tơnguh lơh sa mpồl bơtiàn mờ gàr kơl jăp lơngăp lơngai tàm tiah do.