Bơh ngai 1/11/2025 tus tŭ do, mpồl lơh broă geh gơnoar càr Gia Lai neh lòt sền, jòi tàm 37 tiah tàm lơgar mờ 4 tiah tàm lơgar ndai, tơrgùm geh 85 ƀồc ntìng cau ling chơ̆t màng. Càr kung tơrgùm dờp rlau 3 rơbô 100 mẫu sinh phẩm cau pròc mhàm; lòt sền, tờ bơtô ƀồc ai mẫu rlau 12 rơbô ƀồc ntìng cau ling chơ̆t màng tàm ală ƀlàng tơ̆p ƀồc, tơrgùm geh 7 rơbô 800 mẫu tơl ală bơta sền gĭt ADN. Đại tá ồng Võ Tấn Tài – Chính ủy Gah đơng lam Mpồl ling klàng càr, Phó Lam bồ Mpồl Lơh kơnòl broă sùm Mpồl sồr lơh 515 càr Gia Lai jờng rơ, bơta pơgồp bal đah ală mpồl ling mờ gơnoar atbồ ală kấp tàm càr neh pơgồp bơnah lơh sir niam ngan kơnòl broă Tơngai dơ̆ 1 dê.

Mut tàm Tơngai dơ̆ 2 Broă lơh dờng 500 ngai mang lòt jòi, rồ tơrgùm mờ đal gĭt mat ƀồc ntìng cau ling chơ̆t màng, ală mpồl ling rơ̆p pơn jat tai pơnđơl pràn lơh ngan: “Tơngai tus den Mpồl Sồr lơh pơn jat tai tă pơgồp jơnau đơs mờ Duh broă sùm, Mpồl lơh kơnòl broă sùm Tỉñ ủy càr đơng lam ală Sờh, gah geh bơta pơgồp bal, mut lơh bal kràñ cê jơh nùs mờ pơgồp bal mờ kơnòl broă 6 loh làng gơwèt mờ ală sờh, gah jat di mờ gơnoar broă kơnòl broă dê. Gơwèt mờ jơh ală tiah tơnơ̆ tŭ neh pơrjum, ai jơnau bơsram mờng chài gơwèt mờ tơl sàh, sơnah ƀòn den pal kràñ cê jơh nùs rlau tai, is ồn là lơh jat niam gơnoar bơh Làng bol kung bè ală mờng chài mờ ală cau gĭt neh lòt jòi, đal gĭt mat ƀồc ntìng cau ling chơ̆t màng mờ rồ tơrgùm tŭ do nàng lơh bè lơi bol he lơh geh tềl lời wơl mờ lơh geh broă jàu mờ Mpồl Sồr lơh Dà lơgar dê jàu ai càr Gia Lai in”.

Mut tus nam 2027, Mpồl Sồr lơh 515 càr Gia Lai rơ̆p tơrgùm jơh bơta pràn ai tơngai dơ̆ 2 mờ ală jơnau kờñ tờm: lơh sir 100% broă jàu rồ tơrgùm bơh Ling tiah 5 dê jàu; lơh sir ai mẫu ală bơtô ƀồc cau ling chơ̆t màng geh dùl bơnah jơnau yal; kờp sền, lơh geh ală jơnau tơngĭt 100% cau ling chơ̆t màng ờ hềt loh jơnau yal tơngĭt mờ tơrgùm mẫu ADN cau pròc mhàm jơi đah mè nàng tàm pơndrờm jat tàm Ală jơnau yal dà lơgar dê. Lam lơh tơn kơnòl broă tàm kơnă lam lài, Thượng tá Hoàng Viết Ngọc – Chính trị viên Mpồl K52 đơs loh nùs nhơm lơh ngan lơh broă: “Tơngai dŭt ndơl broă lơh dờng bol añ rơ̆p tơnguh mhar lơh jat broă lơh lòt jòi jơh bal tàm lơgar mờ bơdìh lơgar. Bol añ lam lơh mờ jơh ală kwang bàng, cau ling tơnguh uă nùs nhơm geh kơnòl, đal gĭt loh gơnoar broă, kơnòl broă, ờ kờp ngai mang, jơh nùs lơh ngan sơr lèt gan tơl bơta kal ke nàng lơh sir niam ngan ală kơnòl broă geh jàu”.

Di dơ̆ do, 14 mpồl cau bal mờ 32 cau dồ nă să is geh cồng nha jak ngan tàm broă lơh lòt jòi, rồ tơrgùm mờ đal gĭt mat ƀồc ntìng cau ling chơ̆t màng geh dờp Bằng khen bơh Chủ tịch Anih duh broă Làng bol càr Gia Lai dê.