Tàm tơngai dơ̆ 1, mpồl lơh broă geh gơnoar càr Lâm Đồng neh bơyai lơh 32 dơ̆ lòt sền, lòt jòi, rồ tơrgùm geh 26 ƀồc ntìng cau ling chơ̆t màng ờ hềt gĭt jơnau yal. Ală mpồl lơh broă neh lơh ai mẫu 3 rơbô 625 bơtô ƀồc tơl ală bơta drơng broă sền gĭt ADN, lơh sir lài mờ tơngai pơr gon 3 nhai. Kwang àng càr Lâm Đồng neh tơrgùm dờp rlau 1 rơbô 300 mẫu sinh phẩm bơh cau pròc mhàm jat jơi đah mè ală cau ling chơ̆t màng ờ hềt gĭt jơnau yal.

Lơh jat tơngai dơ̆ 2 Broă lơh dờng 500 ngai mang lòt jòi, rồ tơrgùm mờ đal gĭt mat ƀồc ntìng cau ling chơ̆t màng, càr Lâm Đồng ai jơnau kờñ rồ tơrgùm geh pơgăp 100 ƀồc ntìng cau ling chơ̆t màng. Nàng lơh geh jơnau kờñ do, càr pơn jat tai tơnguh uă kơnòl bơh jơh bal anih lơh broă chính trị dê, hòi jà làng bol yal jơnau yal. Mpồl lơh broă lơh tơn kơnòl broă pơn jat tai pơgồp bal niam mờ ală mpồl cau, gơnoar atbồ ală tiah tàm ƀòn lơgar mờ làng bol ală tiah dê.