Tàm suơn kơphe tam pa, bi Nguyễn Văn Việt, tàm thôn 6, sàh Ea Ô, càr Dăk Lăk gam pic ală plai dum gờñ. Bàr nam lài, hìu bi càn 300 tơlăk đong nàng tam wơl rơlao 1 lồ ù tam kơphe neh kra. Nam do, bă ù kơphe tam pa neh sơn đờm ai pic plai sơnrờp ngan. Mờ kàl tơnhào sơnrờp, hìu nhă bi kờp dŭ tơnhào geh 6 tạ kơphe gar. Khà priă do ờ hềt gơtùi bơtơl priă tă tàm broă bơcri, mơya là dơ̆ sơn đờm nàng hìu nhă bi rơhời bơtàu tơnguh lơh sa.

Bi Việt pà git, gơwèt dùl hìu làng bol lơh broă sa, broă sơrbì git nđờ rơhiang tơlăk đong nàng rồ sơrbì phan tàm lài do, tam pa wơl mờ sơnka sền gàr tàm ală nam ờ hềt geh priă tơnhào là kal ke uă ngan. “Di lah ờ càn priă bơh anih priă jền, hìu nhă kung kal ke ngan. Bơcri priă bè do, rồ sơrbì suơn tam phan lài do kung roh uă ngan priă. Priă càn sa priă cồng ờ uă, gơdờp mờ làng bol lơh broă sa, añ gŏ niam ngan, pal lơh geh uă ai làng bol in tàm uă tiah nàng tam pa wơl kơphe geh cồng nha uă”.

Mùl màl pà gŏ, kal ke dờng ngan bơh cau tam kơphe dê ờ mìng là priă tă lài ngan, mờ gam là khà priă nàng geh sùm broă lơh sa tàm tơngai pa tam lài ngan. Sơntìl, phơng sih, phan lơh broă bal mờ tơngai sơnka sền gàr ndrờm pal geh bơcri priă sùm.

Tàm broă lơh mpồl lơh sa kă bro dê, jơnau kờñ geh priă gam pơgồp bal mờ bơta pràn lơh bă ù dờng ơnàng mờ geh sùm broă lơh sa tàm tơngai jŏ jòng. Tàm Công ty TNHH MTV Cà phê 52, broă tam wơl geh lơh bơh nam 2026. Tàm khà kờp jơh uă ù di pơgăp 500 lồ, mpồl lơh sa kă bro neh tam pa 230 lồ.

Ồng Đỗ Đức Vinh, Chủ tịch mờ kung là Kwang lam bồ Công ty TNHH MTV Cà phê 52 pà git, tŭ lơh rơndăp broă, mpồl lơh sa kă bro gơtìp kal ke tài priă tăc kơphe tam gơl, tàm tŭ priă bơcri nàng tam pa wơl uă mờ tơngai geh tơrgùm wơl priă jŏ jòng. Priă càn neh dong kờl di tŭ nàng mpồl lơh sa kă bro tam pa wơl. “Tàm bơta dùl tơngai kơphe priă tăc ờ kơl jăp, Công ty 52 neh rồ ală bă suơn lài do, cồng nha ờ uă. Công ty tam pa wơl 230 lồ kơphe. Mờ broă tam pa là 50 tơmàn đong, tàm hơ̆ anih priă jền dong kờl rơlao 30 tơmàn đong. Ưn ngài Anih priă jền Lơh sa suơn sre neh dong kờl ai Công ty 52 tàm tơngai kal ke ngan”.

Cồng nha lơh sa bơh broă tam pa wơl geh ai tơngŏ bơh broă tam gơl bè cồng nha. Lài mờ tŭ tam pa wơl, cồng nha bè ờs geh di pơgăp 8 tấn kơphe plai tàm 1 lồ ù, tơnơ̆ tŭ tam pa wơl cồng nha gơguh mờr bàr dơ̆, tàm pơgăp 15 tấn tàm 1 lồ. Mpồl lơh sa kă bro pơgồp bal mờ Anih kơlôi sơnơng Jak chài măy mŏk Broă lơh sa sươn sre brê bơnơm Tây Nguyên rơwah sơntìl pa, gơdờp mờ tam gơl trồ tiah.

Mơya, cồng nha gơguh ờ hềt ndrờm bal mờ priă cồng gơguh ndrờm bal sơl, tài cồng nha gam gơrềng tàm priă tă bơcri, phan lơh broă, cau lơh broă mờ broă tăc kơphe tai. Den tàng, broă tam pa wơl pal geh pơgồp bal mờ broă rơwah sơntìl, broă tam mờ priă jền di pal, ờ mìng ơm wơl tàm broă ala bă suơn kơphe neh kra.

Gùng dà broă lơh do gơdờp mờ Jơnau lơh nền tàm pơrjum sồ 19, ngai 16 nhai 6 nam 2022 bơh Mpồl duh broă Đảng Dà lơgar khoă XIII mờ Broă lơh kwơ màng bơtàu tơnguh broă lơh sa suơn sre, ƀòn lơgar kơl jăp jăt Jơnau lơh nền sồ 150 ngai 28 nhai 1 nam 2022 bơh Thủ tướng Chính phủ dê. Lơh jăt mùl màl jơh gùng dà broă lơh do, ală rơndăp broă tam pa wơl kơphe bơh Bộ Broă lơh sa suơn sre mờ Tiah ơm kis wèt tus ala bă ù ờ geh cồng nha, tơnguh uă cồng nha, bơta niam mờ priă geh ai cau tam in.

Mờ tơngai hòn gơs lài ngan tàm pơgăp bơh 3 tus 4 nam, tòm kơphe pal geh priă càn geh tơngai di pal mờ tơngai ờ hềt geh tơnhào mờ bơta pràn tơm wơl priă. Ồng Võ Tiến Nam, Phó Kwang lam bồ Agribank tàm càr Dăk Lăk pà git, mpồl lơh broă do lơh ală khà priă ai càn di mơ tơngai, jŏ tơngai, sền sơwì tơñgai tơm wơl dồs tàm tơngai kơphe ờ hềt geh tơnhào, ai bơh tàm gùng dà broă lơh sa mờ bơta pràn tơm dồs bơh cau càn priă dê. “Anih priă jền geh sùm broă lơh bơh 266 jơnum càn priă, pơgồp bal mờ ală mpồl, mpồl cau ai priă tus tơl hìu làng bol, mờ pơgồp bal mờ gah lơh sa suơn sre, mpồl dong kờl bơto pơlam broă lơh sa suơn sre sàh, sơnah ƀòn bơto sồr làng bol ngui broă tam pa wơl tềm pềr. Jơnau kờñ là nàng priă càn lơh geh cồng nha mùl màl, tơrmù priă tă bơcri, tuh dà, phơng sih mờ tơngai lơh broă, tơnguh cồng nha, bơta niam gar kơphe”.

Tàm bơta lơh kơphe gam ơm tềng đăp mờ jơnau kờñ tơnguh uă cồng nha, bơta niam mờ bơta pràn tàm pơrlòng, tam pa wơl ờ mìng là ala ală tờm kơphe neh kra. Do là broă bơcri priă jŏ tơngai, den tàng pal kơlôi sơnơng nền nòn đah priă càn, broă tam mờ drà kă bro. Tŭ càn geh ngui di pal mờ tơngai lơh sa, lòt bal mờ gùng dà broă ngui priă geh cồng nha, cau tam kơphe hơ̆ sồng geh tơl pràn tơnguh bơta kwơ tàm dùl bă ù mờ bơtàu tơnguh jăt gùng dà broă lơh kơl jăp.