Nhai 5/2023, Thiếu tá geh griăt ờs mờng Lê Thị Minh Thủy lòt lơh broă tus bồt dờng Trường Sa. Tơnơ̆ 35 nam, kờp bơh ngai bèp bi dê là cau ling chơ̆t màng Lê Đình Thơ chơ̆t phi să tàm tŭ lơh kơnòl broă sền gàr bồt dờng Trường Sa, bi hơ̆ sồng lơh geh jơnau kơ̆p kờñ bơh he dê- Tus còp mờ chu ñàng ai bèp bal mờ 63 nă cau ling bal bơh ồng dê in. Tàm li la bơta dờng ơnàng ngan dà lềng tàm ƀồt dờng Trường Sa dê, bi đơs yal is tàm nùs nhơm ai bèp in gĭt bè rài kis, bè broă lơh tŭ do mờ bơta kơ̆p kờñ lòt jat tai broă lơh bèp bi dê wăc sềr geh ală pang sră wăc sềr gùng dà lềng, pơgồp bơnah sền gàr dà lềng, bồt bơlào dà lềng. Bi Lê Thị Minh Thủy đơs:“Tŭ añ geh lòt tus Trường Sa, ngan là geh dùl bơta gơ lơh ờ gơtùi đơs ngan. Do là bơta mờ añ kơ̆p kờñ tàm uă nam. Tŭ geh tơdùh guàng bơkào bal mờ ală oh mi tàm ơhò nàng kah kơlôi ai bèp bal mờ 63 nă cau ling chơ̆t màng neh chơ̆t phi să tàm ngai 14 nhai 03 nam 1988, añ kơ̆p kờñ ngan đơs mờ bèp bal mờ ală wa neh chơ̆t phi să là: bèp mờ ală wa iang nùs tĕ, kòn mờ mpồl cau ling bal pơn jat tai lơh jat jơnau kờñ bơh bèp mờ mờ ală wa dê, rơ̆p pơnđơl pràn lơh ngan uă rlau tai”.

Bèp bi Minh Thủy dê là cau ling chơ̆t màng Lê Đình Thơ là kwang bàng Mpồl Đo was wăc sềr gùng dà lềng mờ kơlôi sơnơng dà lềng, chơ̆t phi să tŭ bi tòm 1 sơnam. Bàr pe nhai tơnơ̆ ngai bèp bi dê chơ̆t phi să, mè bi dê kung chơ̆t sơl. Bi Thủy dờng tàm bơta kờñ gơboh hìu bơnhă đah bèp đah mè dê mờ bơta sền gròi bơh ală wa tàm mpồl ling bal bèp dê. Jơh bơsram Đại họk Mỏ - Địa chất, gah lơh broă ờs mờng sền gròi kơnhoàl ù tiah wăc sềr ù tiah, bi rê lơh broă tàm Mpồl Đo was gùng dà lềng mờ kơlôi sơng dà lềng, mờ bơta kơ̆p kờñ geh pơn jat tai gùng lòt mờ bèp bi dê neh lòt.

Tàm dơ̆ lơh broă tàm Trường Sa, bơdìh mờ broă geh gơtha kwơ màng ngan là geh còp tiah bèp bi dê lơh kơnòl broă, bi Minh Thủy neh sền gròi tơn ală jrong sơntơ̆p kơryan tàm dà kơryan bol sò tơm mut sơgràm, ală bơtơ̆t kìng dà, tiah lŭ bùi dà lềng, geh sền gŏ mờ mat tơn ală bơta niam bơnĕ bơh dà lềng dê tàm ală tiah jờl mờ tiah jrô krơi is. Hơ̆ là ală sră nggal geh ngan kwơ màng ngan rlau jơh ai broă lơh wăc sềr gùng dà lềng bơh bi mờ cau ling bal dê.

Bơta nền nòn, kơlôi sơnơng nền cê mờ bơta kờñ ngan, bơta kờñ broă lơh neh gơmut tàm să jan bi dê, tàm tơl gùng wăc sềr, broă lơh geh jàu. Bi Thủy yal, pah dơ̆ dờp khà kờp bơh gah lơh broă mpồl ling dê, bi sùm pơnđơl pràn lơh ngan tơrgùm wơl, bơsong, sền sơwì wơl mờ ràng tơlik dùl bă ngan ngồn, di pal ngan rlau jơh, lơh bè lơi tàm ală pang wăc sềr gùng dà lềng sùm lơh geh cồng nha niam ngan rlau jơh, gàr niam bơta lơngăp lơngai ai cau lòt tàm dà lềng in. Tàm ală nam do, bi neh bal mờ cau lơh broă bal lơh sir broă bơceh lơh măi mok lơh gơlik ală jơnau wăc sềr ù tiah mờ tơlik mat sră wăc sềr ù tiah tơr è dà lềng khà 1:100.000 geh 196 bơnah; sền sơ wì, sền gĭt gĭt nđờ rơhiang sră wăc sềr gùng dà lềng sồ drơng kơnòl broă gah sền gàr dà lơgar in. Bi Lê Thị Minh Thủy chờ hờp đơs bè kông nghệ pa tàm gah wăc sềr gùng dà lềng dê: “Nam rềp ngan rlau jơh nàng bol añ geh sền sơ wì là 196 bơnah sră wăc sềr ù tiah gùng tơr è dà lềng dơ̆ sơn rờp nàng mut ngui là phần mềm pa là Arcgis. Tơnơ̆ tŭ rơndăp broă lơh hơ̆ den bol añ geh Kwang atbồ jờng rơ uă ngan. Bơdìh mờ ală phan bơna sră wăc sềr gùng dà lềng sền sơ wì tàm ală phần mềm mờ bol añ lơh bơh jŏ do, bol añ gam pờ ơnàng tus sền sơ wì tàm ală phần mềm pa, uă ngan là ngui jơnau đơs dà Mỹ là uă ngan. Gĭt mờ ală phần mềm pa neh pờ geh ai bol añ in uă gùng lòt tàm gah lơh broă wăc sềr tơr è dà lềng dê”.

Bơdìh mờ bơta gĭt wă bơsram mờng chài uă, bi Thủy bơsram is jơnau đơs dà Mỹ, jòi gĭt mờ ngui ală phần mềm pa, drơng broă sền sơ wì sră wăc sềr , bè  Arcgis, Paperchat Composer... Bi Thủy kung là dùl tàm ală cau lam lài tàm broă ngui kông nghệ sồ tàm gah sền sơ wì sră wăc sềr gùng dà lềng, gĭt mờ ală bơta gơguh jak tàm gah wăc sền gùng dà lềng dunia dê. Bơdìh mờ tŭ jiơ lơh broă tàm mpồl ling, trồ mang bi jòi sền is, jòi gĭt is ală jơnau pa, ală phan ngui kơlôi sơnơng... Bơta kờñ gơboh mờ ală pang sră wăc sềr gùng dà lềng, bồt bơlào neh dong tai bi in geh bơta pràn, bơta chài tàm broă lơh. Thiếu tá Nguyễn Văn Dũng, Kwang atbồ Mpồl sền sơ wì sră wăc sềr gùng dà lềng đơs bè bi Lê Thị Minh Thủy: “Tàm gơnoar broă là Kwang atbồ Mpồl sền sơwì sră wăc sềr gùng dà lềng, bi Thủy sùm lơh sir jak ngan broă lơh; ală jơnau sồr, kơnòl broă sền sơ wì sră wăc sềr gùng dà lềng geh kwang đơng lam bồ dê jàu, bi Thủy neh lơh sir jak ngan, geh cồng nha ngan. Broă lơh jàu ai bi Thủy in là sùm iang nùs ngan. Thủy lơh broă jơh nùs jơh tồr, kong bol glar lùp bơsram bal. Tàm gah wăc sềr gùng dà lềng den gĭt loh uă ngan; bulah gam kơnòm să mơya Thủy lơh ngan lùp bơsram mờ mhar ngan gĭt mờ ală bơta gơguh jak rlau mờ ală cau ndai. Là kwang bàng kơnòm să, mơya Thủy geh Kwang đơng lam bồ mpồl ling dê pin dờn, jàu kơnòl broă tus bal tàm uă rơndăp broă lơh kwơ màng, bè: rơndăp broă lơh rơndăp ù tiah dà lềng dà lơgar, rơndăp broă lơh bè sră wăc sềr ù tiah tơr è dà lềng drơng broă ai Ƀộ mờ Kụk Wăc sềr ù tiah in,...”

Ngềt ngơ̆t đah bơh ngkời ală pang wăc sềr gùng dà lềng nàng tơl dơ̆ lòt tàm dà lềng bơh ală mpồl ling dê sơlơ lơngăp lơngai, ală pơnđơl pràn lơh ngan tàm broă lơh bơh Thiếu tá geh griăt ờs mờng Lê Thị Minh Thủy dê geh cih dờp mờ uă sră jờng rơ, ƀằng khen bơh ală kấp, Quân chủng Ling dà lềng mờ Ƀộ Quôk phòng dê tài neh geh cồng nha jak ngan tàm broă lơh, pơgồp bơnah tàm broă lơh bơt bơtàu Mpồl ling klàng, bơt bơtàu gah sền gàr Dà lơgar mờ sền gàr Dà lơgar dê.