Củ tịc lơgar Võ Văn Thường neh tus bal mờ đơs tàm dơ̆ bơyai lơh. Broă lơh sa tềp bơtòm tơrgùm mat – Nam pa kah ưn ngài geh lơh di tàm tơngai mờr tus sa tềp dà lơgar pah nam bơh Kông đoàn ală kâp bơyai lơh, nàng kờñ lơh gơlik nùs nhơm chờ hờp, niam bơnĕ, ram mhŭ tus đoàn viên kông đoàn mờ cau lơh broă tàm bồ nam pa, ngan là ală cau geh rài kis kal ke, ờ geh priă jền nàng rê hờ ƀòn tờm wă rò sa tềp.

Đơs tàm broă lơh, Củ tịc lơgar Võ Văn Thưởng đơs nền, ƀòn dờng Hồ Chí Minh là tiah bơceh lơh uă srơh gàr lơngăp lơngai rài kis mpồl bơtiàn ngan ngồn mờ geh cồng nha, pơgồp bơnah uă ngan sền gròi ai cau rƀah, cau geh rài kis kal ke, hìu bơnhă geh sră dong kờl bơh dà lơgar, ờ mìng tàm ƀòn dờng mờ gam tàm jơh gùt tiah do mờ tàm gùt lơgar. Bulah bè hơ̆, Củ tịc lơgar đơs là, nam 2023 geh uă mpồl lơh sa kă bro gơtìp kal ke, khà jờng pà sa tềp ờ uă lơh gơ rềng tus broă sền gròi sa tềp ai cau lơh phan, cau lơh broă in. Tàm bơta bè hơ̆, mờ bơta lam lơh bơh Mặt trận dà lơgar Việt Nam, Tổng Liên đoàn Lao Động Việt Nam mờ ală mpồl lơh broă ndai dê, broă lơh Sa tềp bơtòm tơrgùm mat – Nam pa kah ưn ngài neh pơgồp bơnah kuơmàng ngan sền gròi sa tềp ai cau lơh phan, cau lơh broă geh rài kis kal ke nàng cau lơi kung geh wă rò sa tềp lơm.