Tàm càr Gia Lai, Củ tịc Quôk hội Vương Đình Huệ jờng rơ càr neh lơh ngan bơtàu tơnguh lơh sa – mpồl bơtiàn, tơnguh niam rài kis nùs nhơm mờ phan bơna ai làng bol in. kuơmàng, tàm gah niam chài – mpồl bơtiàn geh uă tam gơl niam, ngui niam ală bơta kuơ niam chài krơi is bơh ală jơi bơtiàn càr Gia Lai dê; cồng nha bơto bơsram, bơta niam lơh sơnơm geh tơnguh. Ală broă lơh gàr lơngăp lơngai rài kis mpồl bơtiàn, tơn jơh jơgloh tơrmù rƀah, ai geh broă lơh geh sền gròi lam lơh ring bal; khà hìu bơnhă rƀah gơmù gam 8,11%. Tơrgùm đơng lam ală kâp, ală gah broă, ală tiah lam lơh niam ală broă lơh gàr lơngăp lơngai rài kis mpồl bơtiàn, sền gròi ai làng bol in tàm dơ̆ sa tềp, gàr tơl hìu, tơl nă cau ndrờm geh chờ hờp nam pa, wă rò sa tềp. Do là broă lơh ngan pal geh cih dờp ngan càr dê.

Củ tịc Quôk hội kung đơs là, tài gơ rềng bơh kòp Kovid-19 dê, tŭ do kung gam uă hìu bơnhă gam kal ke, cau lơh phan, cau lơh broă geh tiah ờ geh broă lơh. Tềng đap bơta geh ngan do, Đảng, dà lơgar he kung neh sền gròi ngan tus làng bol mờ broă ai tơlik ală broă dong kờl nàng kờñ lơh gơlik bơta niam ngan rlau jơh. Kuơmàng là Ƀan Ƀí thư neh ai tơlik Jơnau sồr sồ 26 bè gròi sền sa tềp ai cau rƀah in: “Tă pơgồp dùl êt gơ gơs uă, nùs nhơm “Kờñ cau ndai bè kờñ să tờm he” bơh jơi bơtiàn Việt Nam dê pal ki ngàm ngan tàm dunia mờ là broă lơh sùm, kuơmàng là tàm dơ̆ nam pa tus. Tài sa tềp là kuơmàng ngan rlau jơh, ờ geh bơta lơi ndrờm mờ sa tềp. Ală oh mi đơng lam bồ Đảng, Dà lơgar ndrờm kờñ geh bơta niam ngan rlau jơh nàng tơl nă cau, tơl hìu, cau lơi kung geh bơta ƀuơn nàng chờ hờp nam pa, wă rò sa tềp. Bol hi đơs niam mờ ngan là jờng rơ Đảng ƀộ gơnoar atbồ, jơh gùt mpồl lơh broă cíñ trị càr Gia Lai, bulah priă jền gam kal ke, là càr rƀah, mơya neh sùm sền gròi mờ kung sền dờng màng ngan broă do. Bol hi sồr ală mpồl lơh broă cíñ trị bol he neh sền gròi den pal pơn jat tai sền gròi rlau tai, bal mờ ală mpồl lơh sa kă bro, ală cau geh nùs nhơm niam dong kờl ai làng bol in mờ broă niam ngan rlau jơh là bơtàu tơnguh lơh sa, kă bro bè lơi nàng làng bol in geh bơta niam lik klàs rƀah. Sền gròi tơnguh tai bè khà cau blơi ƀảo hiểm xã hội, ƀảo hiểm y tế”.

Di dơ̆ do, Củ tịc Quôk hội Vương Đình Huệ mờ mpồl kwang bàng neh jàu 400 bơnah phan pà ai ală hìu bơnhă geh sră dong kờl bơh dà lơgar, cau geh màng mờ dà lơgar, kwang bàng, cau ling mpồl phàu crong, hìu bơnhă rƀah, cau gơtìp sơnơm khih điôxin lơh aniai, cau lơh phan, cau lơh broă geh rài kis kal ke tàm càr; hòi jà tă pơgồp priă jền dong kờl pà 200 nơm hìu tam klac dờng, kờp priă 10 tơmàn đông ai Mặt trận dà lơgar càr Gia Lai in. Kung tàm dơ̆ lòt còp mờ lơh broă tàm càr Gia Lai, Củ tịc Quôk hội Vương Đình Huệ neh sền Ngân hàng Thương mại kổ phần Kông thương Việt Nam (Vietinbank) jàu 10 tơmàn đông pà càr Gia Lai in nàng dong lơh anih lơh broă Kwang àng xã tiah nhàr dà lơgar.

Kung tàm dơ̆ lòt lơh broă tàm tiah Tây Nguyên, Củ tịc Quôk hội Vương Đình Huệ neh jàu gơnoar ai ồng Bùi Văn Cường, Kwang gơnoar cih, Kwang atbồ Cơldŭ lơh broă Quôk hội in pơyua pà 300 bơnah phan sa tềp ai càr Dăk Lăk in. Jat Jơnau sồr bơh Ƀan Ƀí thư Đảng dà lơgar mờ lơh jat bơta tam pà kơnòl bơh Ƀộ Cíñ trị dê, Củ tịc Quôk hội neh lòt còp mờ nting bơr sa tềp tàm 3 càr là Bạc Liêu, Gia Lai mờ Yên Bái. Bulah bè hơ̆, mờ nùs nhơm he dê, Củ tịc Quôk hội neh hòi jà tă pơgồp tai ală bơnah phan pà ai ală hìu bơnhă geh sră dong kờl bơh dà lơgar, làng bol kòn cau geh rài kis kal ke tàm 2, 3 tiah. Mìng is càr Dăk Lăk, Củ tịc Quôk hội pơyua pà 300 bơnah phan (tơl bơnah phan kờp priă 1 tơlak 300 rbô đông) sồr kwang đơng lam bồ càr jàu tus làng bol in di nam pa Giáp Thìn mờr tus. Củ tịc Quôk hội Vương Đình Huệ pơyua jơnau nting bơr gờm chờ niam ngan rlau jơh tus Đảng ƀộ, gơnoar atbồ, làng bol ală jơi bơtiàn tàm càr Dăk Lăk di bồ nam pa. Ồng Bùi Văn Cường pà git: “Củ tịc Quôk hội, Kwang geh jơng tàm Ƀộ Cíñ trị Vương Đình Huệ jàu añ in mờ pơyua jơnau nting bơr niam ngan rlau jơh tus đảng ƀộ, gơnoar atbồ, làng bol càr Dăk Lăk. Nting bơr nam pa bềng lìu pràn kơldang, chờ hờp mờ lơh geh cồng nha. Nting bơr càr pơn jat tai geh bơta bơtàu tơnguh lơh sa- mpồl bơtiàn, sền gàr kơ̆ dà lơgar – lơngap lơngai, bơt bơtàu đảng, bơt bơtàu mpồl lơh broă cíñ trị lơh geh uă cồng nha”.

Jat ồng Nguyễn Đình Trung, Kwang geh jơng tàm Đảng dà lơgar, Ƀí thư Tỉñ ủy càr Dăk Lăk pà git: Sa tềp nam do, càr Dăk Lăk meh hòi jà tă pơgồp geh rlau 80 tơmàn đông nàng lam lơh broă sền gròi sa tềp ai hìu bơnhă geh sră dong kờl bơh dà lơgar, làng bol geh rài kis kal ke in. Tàm ală ngai do, ală mpồl kwang bàng bơh càr dê kung neh tus ală tiah sar lơgar ngài nàng jàu pà phan sa tềp mờ bơta kơp kờñ ờ lời cau lơi jơgloh, ờ cau lơi gơtìp lời wơl hờ ngkời.