Kơnhoàl Cư Kiuñ là dùl tàm ală tiah tàm càr Dăk Lăk geh gal làng bol dòn jăt Yàng. Tàm hơ̆, Yàng Bàp geh tus rlau 67%, Yàng Tin lành geh rlau 26% mờ Yàng Phờk geh mờr 7%. Mờ jơnau kờñ tơnguh khà đảng viên là cau dòn jăt Yàng, ngai 14/12/2017, Huyện ủy kơnhoàl Cư Kuiñ neh lơh mờ ai lơh jăt Broă rơndăp lơh sồ 02 bè “Lơh pràn tơmŭt Đảng là cau dòn jăt Yàng gơ jăt bal mờ ai lơh broă mờ ngui kwang bàng là cau dòn jăt yàng lơh broă tàm ală anih lơh broă cíñ trị kơnă hơđơm”.

Jơnau kờñ bơh Broă rơndăp lơh sồ 02 dê là lơh gơlik geh bơta tam gơl bè bơta gĭt wă tàm kwang bàng, đảng viên mờ làng bol ƀòn lơgar, ngan là làng bol dòn jăt Yàng bè nùs nhơm ờ tŭ lơi tam gơl mờ dipal ngan bơh Đảng dê tàm tŭ lam lơh jăt broă dong kờl pin dờn jăt Yàng. Bơh hơ̆, pin dờn tàm bơta lam bồ bơh Đảng dê, bơta sền gròi, bơta ătbồ, bơta đơng lam bơh Dà lơgar dê. Mơkung pơgồp bơnah tam gơl rơndăp tăp sèng mpồl đảng viên tàm tơl Đảng ƀộ, tơnguh tai gơnoar broă lam bồ, bơta pràn tam lơh bơh mpồl đảng mờ đảng viên dê tàm ală tiah làng bol dòn jăt Yàng.

Lam lơh jăt ală broă jàu mờ ală jơnau jàu tàm Broă rơndăp lơh sồ 02 bơh Huyện ủy kơnhoàl dê, ală đảng ƀộ kơnă hơđơm neh lơh jăt loh làng mờ ală kơrnoăt mìng dùl tơngume jăt pah nam. Pơnrơ bè tàm Đảng ƀộ xã Hoà Hiệp neh lơh jăt ngan ngồn mờ Kơrnoăt mìng dùl tơngume sồ 12 bè tơnguh tai bơta đơng lam bơh Đảng dê gơ wèt mờ broă lơh tơmŭt uă Đảng. Tàm hơ̆ gĭt nền loh làng jơnau kờñ “Lơh pràn broă lơh geh mpồl cau, tề lam, tơmŭt pa đảng viên là cau làng bol jơi bơtiàn dồ êt nă cau mờ cau dòn jăt Yàng”. Bơh ndo, ală Ci ƀộ tàm jơh gùt Đảng ƀộ xã neh lam lơh dùl bă kràñ cê jơh nùs bơh uă broă lơh mờ gùng dà broă lơh krơi is. Ồng Trần Văn Du, Ƀí thư Ci ƀộ thôn Giang Sơn, xã Hoà Hiệp, kơnhoàl Cư Kuiñ, càr Dăk Lăk, pà gĭt: Ci ƀộ lam lơh dùl srơh, tam pà khà jàu ai ală đảng viên tàm ci ƀộ in nàng lơh jăt kơnòl broă lơh geh mpồl cau. Mơkung tam pà ai ală kwang bàng, mpồl cau in kung dờp khà jàu do sơl.

Bơh ală srơh, broă lơh dipal ngan tàm tiah he dê, ală Ci ƀộ săc rwah ală làng bol jak ngan tàm tiah làng bol dòn jăt Yàng nàng  tề lam bơto bơta gĭt wă, tơmŭt tàm mpồl đảng dê, pơgồp bơnah lơh geh mpồl kwang bàng, đảng viên bơtơl ai tiah he dê in. Ồng Trần Văn Thục, Ƀí thư Đảng ủy xã Hoà Hiệp, kơnhoàl Cư Kuiñ, càr Dăk Lăk, pà gĭt: Bol hi neh bơyai lơh pơrjum mìng dùl tơngume bè broă lơh tơmŭt uă đảng, tàm hơ̆, sền gròi broă lơh tơmŭt đảng tàm tiah làng bol dòn jăt yàng, kung bè là tơmŭt uă đảng là cau jơi bơtiàn dồ êt nă cau. Nàng bè jŏ jòng geh cau ala ai ală kwang bàng tàm ală anih lơh broă cíñ trị in mờ tus tŭ do sơnam neh dờng kung kờñ ơm rlô lơh broă sơl.

Jăt mò Phúc Bình Niê Kdăm, Ƀí thư Huyện ủy kơnhoàl Cư Kuiñ yal, mờ uă broă lơh ngan tă bơsong ală bơta kòl yan, kal ke, đòm jăt ngac ngar chài ngan ală jơnau ai bơh Dà lơgar dê tàm tơmŭt uă đảng, tus tŭ do, Đảng ƀộ kơnhoàl Cư Kuiñ geh 33 mpồl đảng gơ wèt bal, geh 25 đảng ƀộ 08 ci ƀộ kơnă hơđơm bal mờ rlau 4 rbô 400 nă đảng viên. Khà đảng viên là cau dòn jăt Yàng ngai sơlơ gơguh bơta do neh pơgồp bơnah tam gơl rơndăp tăp sèng đảng viên, tơnguh tai gơnoar broă đơng lam, bơta pràn tam lơh bơh ală mpồl đảng dê. Mò Phúc Bình Niê Kdăm, đơs: Khà mờ cồng nha đảng viên là cau dòn jăt Yàng rơhời geh tơnguh tai. Tàm nam 2016, kờp jơh khà đảng viên dòn jăt yàng jơh gùt kơnhoàl là 108 nă oh mi. Tơnơ̆ tŭ lam lơh jăt broă rơndăp lơh tus tŭ do, kờp jơh khà đảng viên là cau dòn jăt yàng bơh kơnhoàl dê là 245 nă oh mi, geh tus 5,5% kờp jơh khà đảng viên bơh jơh gùt kơnhoàl dê. Kơnhoàl kung neh ai lơh broă mờ ngui 13 nă đảng viên là cau dòn jăt Yàng lơh kwang bàng tờm ngan mờ ală kwang ătbồ, phó kwang ătbồ ală mpồl lơh broă cíñ trị mpồl bơtiàn kâp xã.

Ală cồng nha tàm broă lơh tơmŭt uă đảng là cau dòn jăt Yàng neh tơngŏ loh geh bơta dipal mờ bơta geh ngan tàm kơnhoàl Cư Kuiñ dê, lơh geh tai ală mpồl cau lơh kòn gùng, tam klăc bal đah “broă yàng” mờ “broă tàm rài kis”. Bơh hơ̆ bơta pràn tam klăc dờng ală jơi bơtiàn, bơta pin dờn jăt yàng ngai sơlơ geh tơnguh uă, pơgồp bơnah bơtàu tơnguh lơh sa- mpồl bơtiàn, kơryan ală jơnau jòi kai, broă sơmờm bơh ală mpồl cau gơjrañ kwềng dê kung gam sơmờm sơl broă pin dờn jăt yàng nàng kờñ lơh tam cah is mpồl, lơh roh bơta tam klăc bal jơi bơtiàn tàm ƀòn lơgar.