Tàm dơ̆ jờng rơ, Anih duh broă đơng lam Đảng ling klàng Dà lơgar, Ƀộ Ling klàng neh pà khà jờng ai 35 mpồl cau mờ 80 nă cau dồ nă să pơn rơ jak “Hòi jà làng bol chài” bơh Mpồl Ling klàng tàm tiah làng bol jơi bơtiàn dồ ết nă cau mờ tiah kơh bơnơm tơngai bơh nam 2019-2024. 5 nam do, Anih duh broă đơng lam Đảng ling klàng Dà lơgar, Ƀộ Ling klàng, Tổng kụk Cíñ trị neh sền gròi đơng lam, sồr lơh, lam lơh jat srơh tàm pơrlòng “Hòi jà làng bol chài”, bơt bơtàu “Mpồl ling hòi jà làng bol niam” dồ ròt bal, tơl làm, ngan ngồn, kơ̆ kơl jăp, geh broă lơh jrô ơnàng làm uă, di pal mờ bơta geh ngan, pơgồp bal niam mờ lơh jat ală srơh, ală dơ̆ hòi jà bơh jơh gùt lơgar dê, lơh geh uă cồng nha mờ mờng chài kwơ ngan...; pơgồp bơnah lơh kơ̆ kơl jăp sền gàr Dà lơgar, lơngăp lơngai, bơt bơtàu nùs nhơm rcang lài sền gàr Dà lơgar bơh jơh gùt làng bol dê, nùs nhơm rcang lài lơngăp lơngai làng bol, nùs nhơm rcang lài kơ̆ kơl jăp làng bol dê; gàr kơ̆ bơta pin dờn bơh làng bol ală jơi bơtiàn dồ ềt nă cau dê gơwèt mờ Đảng, Dà lơgar, Mpồl ling klàng; lơh jat niam gơnoar broă mpồl ling lơh broă, mpồl ling lơh broă sa, lơh àng sơrdah rùp hin “Cau ling Wa Hồ dê” tàm tơngai pa.

Bơh nam 2019-2024, ală mpồl ling pơgồp bal bơyai lơh mblàng yal jơnau ai rlau 250 rơbô dơ̆ mờ rlau 20 tơlak dơ̆ cau tus bal; hòi jà rlau 11 rơbô hìu bơnhă mờ mờr 56 rơbô nă làng bol ờ gŏ di ntrờn ơm kis khat gơboh mờ rlau 20 rơbô nă kơnòm bơsram ơm wơl tàm hìu bơsram. Neh pơgồp bal pờ ơdŭ tề lam jơnau gĭt wă sền gàr Dà lơgar, lơngăp lơngai ai rlau 18 rơbô 300 dơ̆ cau kra ƀòn, lam bồ thôn, ƀòn, cau geh bơngă pin dờn tàm tiah làng bol jơi bơtiàn dồ ết nă cau in; tus bal bơt bơtàu mpồl ling griăp ƀòn sền gàr is, mpồl cau rcang lòt ling bơh ală tiah kơh bơnơm dê kơ̆ kơl jăp pràn kơl dang; bơsong geh cồng nha ală broă kal ke gơlik geh bơh tàm ƀòn lơgar; ờ gŏ lời lơh gơlik gơs “tiah kal ke” gơrề uă tiah mờ jŏ jòng...

Thiếu tá ling geh griăt lơh broă ờs mờng Nguyễn Thị Thúy, Kông ty 723, Ling mpồl 15 ( lơh broă tàm ù tiah kơnhoàl Đức Cơ Gia Lai) neh hòi jà geh cồng nha bàr pe nă lang bol sang tĕ Yàng ờ ngan wơl rê wơl mờ hìu bơnhă yal:“Tàm dùl dơ̆ añ tus tàm ƀòn nàng hòi jà làng bol den dồ nă oh klau dềt tus koar jơng añ, sau dềt đơs mơi lơi, mơi jòi mè sau rê ai sau in, sau kah mè sau ngan. Bơta chài bơh cau lơh mè añ gĭt lài, tŭ kơnòm dềt đơs jơnau đơs hơ̆ là sau suơ̆u siar bơta ram mhŭ bơh cau mè dê. Añ mờ ală cau ling bal he dê neh lơh nền lam sau dềt hơ̆ mut tàm brê nàng bal mờ bol añ pơndờm pơnđiang, hòi jà, lơh tam gơl nùs nhơm cau mè bơh sau dềt dê mờ bàr pe nă làng bol wơl rê wơl mờ ƀòn lơgar”.

Đơs tàm dơ̆ jờng rơ, Thượng tướng ồng Trịnh Văn Quyết, Cau kong kơnòl broă Tổng kụk Cíñ trị, Mpồl Ling klàng Làng bol Việt Nam đơs nền, tiah làng bol jơi bơtiàn dồ ết nă cau mờ tiah kơh bơnơm là ù tiah kwơ màng ngan tàm bơtàu tơnguh lơh sa, niam chài, mpồl bơtiàn, sền gàr Dà lơgar, lơngăp lơngai, cribơyai broă mờ lơgar ndai. Ngan ngồn kăc màng Việt Nam neh lơh nền, làng bol ală jơi bơtiàn sùm tam klăc mờ tă pơgồp dờng ngan tàm broă lơh kăc màng bơh Đảng dê, uă kơnhoàl ù tiah gơ gơs tiah tờm tam lơh, tiah ròng siam mờ sền gàr kwang bàng, cau ling, gĭt nđờ jơ̆t rbô nă oh kòn ală jơi bơtiàn dồ ết nă cau neh jơh nùs lam lài lòt gùng lòt ling, pơgồp bơnah bal mờ làng bol jơh gùt lơgar ai geh uă cồng nha dờng màng tàm broă lơh sền gàr Dà lơgar.  Broă lơh hòi jà làng bol pơn jat tai đơs nền Mpồl Ling klàng bơh Làng bol mờ geh, tài Làng bol mờ tam lơh. Đơs loh Dà lơgar he dê gam mut tàm rài pa bơtàu tơnguh pas gơs, sơlơ bơtàu tơnguh tai  sồr pal lơh geh tiah ơm kis ƀuơn ngan nàng lơh jat uă ngan nùs nhơm kờñ gơboh Dà lơgar, nùs nhơm lơh is, lơh pràn is, bơta ƀuơn bơta pràn bơh làng bol ală jơi bơtiàn dê, dong làng bol kòn cau pơn jat tai tă pơgồp bồ tơngoh, dà kơl hề tàm broă lơh bơt bơtàu Dà lơgar, Thượng tướng ồng Trịnh Văn Quyết sồr:“Kấp ủy đơng lam mờ kwang bàng, cau ling tàm jơh gùt mpồl ling, tàm hơ̆ geh mpồl cau, cau dồ nă să pơn rơ ngan geh jờng rơ ngai do pơn jat tai lơh jat niam gơnoar broă tờm, ngan ngồn là tiah kơldìng pin dờn, bal mờ làng bol tàm tơl gah broă. Pơgồp bal niam mờ kấp ủy gơnoar atbồ ală tiah mblàng yal, hòi jà làng bol pin dờn ngan tàm bơta đơng lam bơh Đảng dê, jơh nùs lơh broă sa, bơtàu tơnguh lơh sa, niam chài, mpồl bơtiàn, lơh kơ̆ kơl jăp sền gàr Dà lơgar, lơngăp lơngai, tơnguh uă bơta rcang ngăc broă lơh, jơh nùs tam dră wơl lơh ờ geh cồng nha tơl kai hoài jà, dră ani ai bơh ală mpồl cau gơ jrañ kơ uềng dê nàng kờñ tam cah is mpồl tam klăc dờng jơh gùt jơi bơtiàn”.

Di dơ̆ do, Ƀộ Ling klàng tơlik mat broă lơh “Cau bơh ƀòn dê”, pờ tơlik tàm Gah Sơñio rùp Sền gàr Dà lơgar mờ pơnđàng tàm ală ƀăo bơh Mpồl Ling klàng bol dê nàng kờñ mblàng yal, lơh gơrề uă ală broă lơh geh ngan, geh kwơ, ală jơnau yal, rùp hin niam bè bơta tam klăc đềt mềr poăc mhàm bal đah Ling klàng mờ Làng bol, tàm hơ̆ geh làng bol ală jơi bơtiàn dồ ết nă cau mờ tiah kơh bơnơm.