Sùm geh mpồl ling sền gàr tiah nhàr lơgar dong kờl là hìu bơnhă bi Rơ Mah Tíu mờ pơ ùr là Rơ Lan Blớc, kòn cau Jrai ơm tàm ƀòn Tung, xã Ia Nan, kơnhoàl Đức Cơ. 2 nam lài, hìu bơnhă bi Tíu là dùl tàm ală hìu bơnhă rƀah, ờ tơl priă bơcri lơh sa nàng bơtàu tơnguh lơh sa hìu bơnhă. Priă lơh geh uă ngan kơnờm tàm broă lơh apah jat ngai tŭ geh tŭ ờ. Kơnờm geh bơta dong kờl bơh Mpồl ling sền gàr tiah nhàr lơgar pôs đồng Ia Nan mờ gơnoar atbồ tiah do dê, hìu bơnhă bi neh geh dong kờl sơntìl phan tam nàng tam 3 sào kơphê, geh bơto pơlam broă sơng ka sền gàr, mờ rcang sơndră tu kòp lơh aniai ai phan tam in. Tus tŭ do, 3 sào kơphê neh geh tơnhào, bal mờ 2 sào kòi sre mờ 8 sào kao su, neh cèng wơl ai hìu bơnhă bi in priă lơh geh sùm pơgap 100 tơlak đong pah nam. Bi Rơ Mah Tíu, đơs:“Ală wa mpồl ling kung bè mpồl cau mờ xã kung dong kờl bè là cau tàm hìu, bơto pơlam tơn broă koh ntê, ơn phơng, tŭ do hìu bơnhă añ geh priă jền sùm, ròng siam oh kòn bơsram sră hờm ram”.

Jat khà tơrgùm kờp bơh xã Ia Nan, kơnhoàl Đức Cơ dê, xã do geh 1 rơbô 951 hìu bơnhă, mờ mờr 9 rơbô nă cau. Xã neh geh 7 tàm 9 thôn lơh sir broă lơh ƀòn lơgar pa. Khà hìu bơnhă rƀah gơmù rơ hời bơh ală nam mờ tus lồi nam 2023, xã mìng gam 100 hìu bơnhă rƀah, geh tus 4,9% khà hìu bơnhă. Phó Củ tịc Ủy ƀan Ñân zân xã Ia Nan Phạm Văn Thuỷ pà gĭt, tàm ală nam pa do gơnoar atbồ tiah do mờ mpồl ling sền gàr tiah nhàr lơgar lơh pôs đồng tàm ù tiah do dê sùm bal mờ gơ̆p bơt bơtàu ală broă rơndăp lơh, gùng dà broă lơh geh ngan nàng dong làng bol bơtàu tơnguh lơh sa, bơt bơtàu ƀòn lơgar pa. Ồng Phạm Văn Thuỷ đơs:“Bơh ngai geh kwang bàng tàm ù tiah do dê dờp kơnòl broă dong kờl tàm ală hìu bơnhă làng bol dê den ală hìu bơnhă làng bol kung sền gŏ sơl, ƀuơn ngan là broă lơh ƀlàng sre lơh kòi dờng kung bè phan tam jŏ nam, kwang bàng ling sền gàr tiah nhàr lơgar sền gròi ngan mờ at tề sơñio broă lơh, ngan là ală hìu bơnhă geh mpồl ling sền gàr tiah nhàr lơgar tàm ù tiah do dê dong kờl den ală hìu bơnhă neh lik klàs rƀah, brồ guh kơ̆ kơl jăp rài kis”.

Trung tá Lê Hồng Tuấn, Kwang atbồ Pôs đồng ling sền gàr tiah nhàr lơgar Ia Nan, kơnhoàl Đức Cơ pà gĭt, mờ bơta kơ̆p kờñ lòt bal mờ gơnoar atbồ tiah do dong kờl làng bol bơtàu tơnguh lơh sa, tơnguh uă priă lơh geh, tơrmù rƀah kơ̆ kơl jăp mờ do kung là dùl kơnòl broă tờm, lơh jat sùm bơh mpồl ling sền gàr tiah nhàr lơgar dê nàng kờñ gàr niam lơngăp lơngai tiah nhàr lơgar, lơngăp lơngai cíñ trị, rơndăp tăp sèng, lơngăp lơngai mpồl bơtiàn tàm tiah nhàr lơgar, ù tiah Pôs đồng dê atbồ. Trung tá Lê Hồng Tuấn, đơs:“Lơh jat broă lơh jơnau kờñ Dà lơgar bơh Đảng mờ Dà lơgar dê tàm broă bơt bơtàu ƀòn lơgar pa tàm ală nam pa do, mpồl ling ai 9 nă kwang bàng đảng viên tus bal pơrjum tàm 9 Ci ƀộ thôn, ƀòn bơh xã Ia Nan dê, 15 nă kwang bàng drơng broă 158 hìu bơnhă làng bol. Lòt bal mờ broă lơh bơtàu tơnguh lơh sa- mpồl bơtiàn bơh tiah do dê, tàm ală nam pa do Đảng ủy, Mpồl đơng lam Pôs đồng neh geh broă lơh kĭ hơ mờ Đảng ủy, Ủy ƀan Ñân zân xã dong làng bol bơtàu tơnguh lơh sa, tơn jơh jơgloh tơrmù rƀah, bơt bơtàu ƀòn lơgar pa nàng tiah do in hời rơ hời pràn kơl dang kơ̆ kơl jăp bè lơh sa mpồl bơtiàn, lơh geh jơnau kờñ sền gàr Dà lơgar, lơngăp lơngai tàm tơngai pa”.

Bal mờ bơta dong kờl làng bol bơtàu tơnguh lơh sa, Mpồl ling sền gàr tiah nhàr lơgar càr Gia Lai gam geh uă broă lơh, broă lơh gàr niam rài kis mpồl bơtiàn. Tàm nam 2023, neh lơh 13 nơm hìu ơm ai cau rƀah tàm tiah nhàr lơgar in, gàr niam broă dờp ròng siam 63 nă kơnòm bơsram tàm broă lơh “Dong kờl oh lòt bơsram”, mờ “Kòn ròng pôs đồng ling sền gàr tiah nhàr lơgar dê”... Jat Đại tá Nguyễn Văn Nghị, Phó Cíñ uỷ Gah đơng lam Mpồl ling sền gàr tiah nhàr lơgar càr Gia Lai yal, mpồl ling rơ̆p pơn jat tai lơh jat gùng dà broă lơh bơh Đảng, Dà lơgar dê bè bơt bơtàu, sền gàr tiah nhàr lơgar bơh Dà lơgar dê, bơt bơtàu ƀòn lơgar pa mờ tơrmù rƀah kơ̆ kơl jăp tàm tiah nhàr lơgar. Đại tá Nguyễn Văn Nghị, đơs: “Tŭ do tàm ù tiah tiah nhàr lơgar geh 3 kơnhoàl mờ 7 xã, rài kis bơh làng bol tàm tiah do gơtìp uă ngan kal ke. Nàng lơh niam kơnòl broă bơtàu tơnguh lơh sa, niam chài- mpồl bơtiàn, bol añ pơn jat tai sồr kwang bàng, cau ling ală pôs đồng ling sền gàr tiah nhàr lơgar lơh jat niam kơnòl broă bơh tiah nhàr lơgar dê tàm broă lam lơh ală broă lơh, ală tơngume geh gơrềng tus ală tiah hơ̆ là bơtàu tơnguh lơh sa, niam chài, mpồl bơtiàn, dong làng bol tơn jơh jơgloh tơrmù rƀah. Bol añ kung rơ̆p ai 196 nă kwang bàng đảng viên dong kờl ală hìu bơnhă rlau 800 hìu bơnhă tàm tiah nhàr lơgar dê”.

Mờ nùs nhơm “Pôs đồng là hìu, tiah nhàr lơgar là ƀòn lơgar, làng bol ală jơi bơtiàn là oh mi tờm”, Mpồl ling sền gàr tiah nhàr lơgar Gia Lai neh jơh nùs pơgồp bal mờ ală kấp ủy Đảng, gơnoar atbồ ală tiah tàm broă dong kờl làng bol tiah nhàr lơgar bơtàu tơnguh lơh sa- mpồl bơtiàn. Kơnờm hơ̆, uă hìu bơnhă neh lik klàs rƀah, bơtàu tơnguh rài kis tàm ù tiah tiah nhàr lơgar gam uă ngan kal ke”.