Mho ngai lồi nam, Y Dũng, kòn cau M’nông, soh phan pa ngan geh kwang bàng Pôs đồng ling sền gàr tiah ngàr lơgar Mpồng nhàr lơgar Thuận An pơndiang jun rê tàm ƀòn Sa Par (xã Thuận An, kơnhoàl Dăk Mil, càr Dăk Nông) nàng tus bal broă lơh Nam pa tiah nhàr lơgar ram mhŭ nùs nhơm làng bol ƀòn lơgar. Y Dũng nam do gam bơsram ơdŭ 6, là kòn ròng Pôs đồng ling sền gàr tiah nhàr lơgar dê neh rlau 3 nam, geh kwang bàng, cau ling ròng siam mờ bơsram tàm Pôs đồng tơn. Bơh dùl nă kơnòm bơsram ờ jak, sùm bàs sìl, ờ pin dờn, bơh bơta jơh nùs ngan ròng siam, dong kờl, bơto bơtê bơh ală bèp ròng ling geh grăt tơlir dê, Y Dũng neh gơ gơs cau bơsram jak ngan, pin dờn rlau uă ngan. Tàm nùs nhơm hô hơng bơh jơh gùt ƀòn dê wă rò nam pa sa tềp bal mờ mpồl ling sền gàr tiah nhàr lơgar, Y Dũng kung chờ hờo ngan bal mờ ală gơ̆p bơyô tàm sơnam bal ƀòn dê nhơl ală jơnau nhơl bơh yau bè drŏ gai, dŭi che, ñhĕt bào tạ. Oh Y Dũng, đơs: “Sau geh ală wa mpồl ling sền gàr tiah nhàr lơgar sền gròi, dong kờl jơh nùs ngan, kơnờm mờ hơ̆ mờ sau neh gĭt wă uă rlau tai, sau rơ̆p pơnđơl pràn lơh ngan bơsram sră jak ngan nàng ờ lơh muăt jrùm nùs nhơm ală wa mpồl ling sền gàr tiah nhàr lơgar dê. Nam tus, sau gờm chờ ală wa mpồl ling sền gàr tiah nhàr lơgar geh uă pràn kơl dang să jan, lơh broă niam”.

Bal mờ kwang bàng, cau ling Pôs đồng ling sền gàr tiah nhàr lơgar Mpồng nhàr lơgar Thuận An bơyai lơh broă lơh nam pa mpồl ling sền gàr tiah nhàr lơgar ram mhŭ nùs nhơm làng bol ƀòn lơgar, bi H’ Loen, Ƀí thư Đoàn ơruh pơnu ƀòn Bu Dăk, xã Thuận An pà gĭt, rùp hin mpồl ling sền gàr tiah nhàr lơgar niam ngan gơwèt mờ làng bol tàm tiah nhàr lơgar. Ală nam pa do, ală cau ling geh grăt tơlir sùm lòt bal mờ làng bol tàm ƀòn lơgar. Ală bi neh dong kờl làng bol lơh broă sa, bơtàu tơnguh lơh sa, lơh hìu ai hìu bơnhă rƀah in, den hơ̆ sồng lơh niam wơl, lơh niam ală broă lơh bơt bơtàu bè gùng lòt rê, rbòng dà nàng làng bol in ƀuơn lòt rê, sih tam phan. Tiah lơi kal ke den sền gŏ rùp hin ală bi dê. Den tàng bè hơ̆, làng bol wă rò sa tềp bal mờ ală cau ling geh grăt tơlir sơlơ ram mhŭ, tam klăc rlau tai. Bi H’ Loen, đơs:“Làng bol tàm ƀòn lơgar den chờ hờp ngan tŭ wă rò sa tềp bal mờ mpồl ling sền gàr tiah nhàr lơgar. Ală bi neh dong kờl làng bol uă ngan tàm rài kis mờ tàm broă lơh sa. Làng bol den kung lòt bal mờ mpồl ling sền gàr tiah nhàr lơgar sền gàr bal tiah nhàr lơgar. Nam tus den añ gờm chờ mpồl ling sền gàr tiah nhàr lơgar geh uă pràn kơl dang să jan, lơh broă niam mờ pơn jat tai tam klăc bal mờ làng bol tàm tiah nhàr lơgar”.

Klơm mbar lơm pòng bal mờ cau ling mpồl ling sền gàr tiah nhàr lơgar mờ làng bol tàm ƀòn nàng wă rò sa tềp, bi H’ Lo Ren, cau pơgru Hìu bơsram Mầm non Hoà Bình, ƀòn Sa Par, xã Thuận An, pà gĭt, uă nam do, broă lơh rcang wă rò sa tềp ram mhŭ, chờ hờp mờ tam klăc bè do ndrờm geh rcang lài niam ngan. Bi H’ Lo Ren, đơs: “Cau pơgru bol añ kung lòt bal mờ mpồl ling sền gàr tiah nhàr lơgar tàm uă broă lơh mờ uă nam rao. Gơtùi đơs là, mpồl ling sền gàr tiah nhàr lơgar là tiah kơl dìng ai làng bol tàm nhàr lơgar in, bol añ chờ hờp ngan. Nam pa den kung gờm chờ ală bi mpồl ling sền gàr tiah nhàr lơgar geh uă pràn kơl dang să jan, lơh jat niam ală kơnòl broă”.

Thượng tá Nguyễn Văn Thắng, Cíñ trị viên Pôs đồng ling sền gàr tiah nhàr lơgar Mpồng nhàr lơgar Thuận An pà gĭt, mpồl ling geh uă kơnòl broă sền gàr gùng tiah nhàr lơgar jòng pơgap 10 kơi sồ mờ ù tiah xã Thuận An, kơnhoàl Dăk Mil. Kwang bàng, cau ling tàm Pôs đồng sùm gĭt nền pôs đồng là hìu, tiah nhàr lơgar là ƀòn lơgar tờm, làng bol ală jơi bơtiàn là oh mi poăc mhàm bal. Ală nam pa do, Pôs đồng sùm bơsram lơh jat niam gùng dà broă lơh “3 rềp- ơm rềp mpồl ling, ơm rềp ù tiah, ơm rềp làng bol” mờ “4 bal- sa bal, ơm bal, lơh bal, đơs bal dà kòn cau mờ làng bol”. Pah ngai, ală mpồl, mpồl lơh broă ơm rềp ù tiah, hòi jà cau geh bơngă pin dờn bè kra ƀòn, kwang atbồ ƀòn nàng mblàng yal, hòi jà, dong làng bol gĭt tơl tềl tơngŏ gùng tiah nhàr lơgar, jrong nhàr lơgar nàng gĭt kơnhoàl ù tiah bơh kơnhoàl dê, mpồl atbồ, yal di tŭ ală broă lơh tìs mờ gơnoar tờm kơnhoàl ù tiah Dà lơgar dê. Ngan là, srơh làng bol atbồ is gùng tiah nhàr lơgar, jrong nhàr lơgar geh lơh niam ngan mờ tŭ do tàm ù tiah bơh Pôs đồng atbồ geh 6 mpồl atbồ is gùng tiah nhàr lơgar, jròng nhàr lơgar. Bơh hơ̆, hời rơ hời bơt bơtàu nùs nhơm rcang lài bơh làng bol dê jơh gùt làng bol sền gàr tiah nhàr lơgar, sền gàr kơ̆ kơl jap tiah nhàr lơgar bơh Dà lơgar dê.

Thượng tá Nguyễn Văn Thắng kung pà gĭt, nàng dong kờl ală hìu bơnhă geh rài kis kal ke mờ làng bol tàm ală ƀòn lơgar chờ hờp nam pa, wă rò sa tềp, Pôs đồng ling sền gàr tiah nhàr lơgar Mpồng nhàr lơgar Thuận An pơgồp bal mờ Mpồl Cữ thập đỏ kơnhoàl Dăk Mil mờ Ủy ƀan Ñân zân xã Thuận An bơyai lơh broă lơh Nam pa tiah nhàr lơgar ram mhŭ nùs nhơm làng bol ƀòn lơgar. Tàm broă lơh, rơ̆p pơyoa tus làng bol in uă bơnah phan pà geh kwơ. Thượng tá Nguyễn Văn Thắng, đơs:“Mpồl ling pơgồp bal mờ Mpồl Cữ thập đỏ kơnhoàl Dăk Mil mờ Ủy ƀan Ñân zân xã Thuận An bơyai lơh broă lơh Nam pa ling sền gàr tiah nhàr lơgar ram mhŭ nùs nhơm làng bol ƀòn lơgar. Broă lơh jàu pà rlau 200 bơnah phan pà, 25 sră Bảo hiểm Y tế, 46 bơnah priă bơsram, kờp jơh priă jền rlau 200 tơlak đong. Bal mờ bơyai lơh broă lơh Nam pa ling sền gàr tiah nhàr lơgar ram mhŭ nùs nhơm làng bol ƀòn lơgar den mpồl ling sồr 2 mpồl lơh broă nàng tus sa tềp bal mờ làng bol, lơh niam broă lơh cíñ trị, bồ tơngoh, jơh nùs lơh ngan gàr kơ̆ gơnoar tờm, lơngăp lơngai tiah nhàr lơgar tàm gơl gùng tiah nhàr lơgar geh jàu kơnòl broă drơng broă”.

Bal mờ làng bol gùt lơgar, kwang bàng, cau ling mờ làng bol tàm tiah nhàr lơgar xã Thuận An, kơnhoàl Dăk Mil, càr Dăk Nông gam wă rò dùl nam pa bềng bơta tam klăc bal, bềng nùs nhơm tam klăc oh mi bal. Ling klàng làng bol sơm bat tê bal, dùl nùs bal là bơta pràn nàng tiah nhàr lơgar Thuận An đơs is, càr Dăk Nông đơs bal sơlơ kơ̆ kơl jăp mờ ngai sơlơ bơtàu tơnguh.