Bơh bồ nam do tơn, Mpồl lơh broă bơh Dà lơgar dê bơh mò Bùi Thị Minh Hoài, Ƀí thư Đảng Dà lơgar, Kwang ătbồ Mpồl Lam sồr làng bol Dà lơgar dê lơh Kwang ătbồ Mpồl neh lòt còp mờ pà phan cau lơh phan cau lơh broă tàm ù tiah càr Dăk Lăk in. Mò Bùi Thị Minh Hoài đơs wih đơs wơl, Dăk Lăk là càr tiah tờm tiah Tây Nguyên dê, ală mpồl lơh sa kă bro tàm càr mìng là mpồl lơh kă bro geh broă lơh sa kă bro di mơ mờ dềt lơm, rài kis bơh uă cau lơh phan cau lơh broă dê sền bal gam uă kal ke. Tài bè hơ̆, broă sền gròi dong kờl ai cau lơh broă in là kơnòl broă kwơmàng ngan rlau jơh bơh ală kâp, ală gah lơh broă dê. Mò Bùi Thị Minh Hoài, sồr: tàm tơngai tus, ală kâp gơnoar ătbồ bơh càr Dăk Lăk dê pal geh ală broă lơh geh kwơ ngan, geh cồng nha nàng lơh jăt niam rlau tai broă lơh sền gròi dong kờl rài kis ai cau lơh broă in, sền gàr niam rài kis mpồl bơtiàn, tơrmù rƀah kơ̆ kơl jăp jŏ jòng. Mò Bùi Thị Minh Hoài, đơs: Añ sồr ală kâp ủy, gơnoar ătbồ, ală mpồl ala măt cau lơh broă bal mờ ală kâp sùm gĭt bơta gơlik geh bè rài kis, jơnau kơlôi sơnơng bơta kơ̆p kờñ bơh cau lơh broă dê nàng geh broă lơh dong kờl di tŭ nàng sền gàr ai cau lơh phan cau lơh broă in geh dờp ală broă dong kờl mpồl bơtiàn bơh Đảng mờ Dà lơgar dê. Kwơmàng sền gròi tus bơta broă lơh, priă nhai, adăt boh lam cau lơh broă, lơh jăt jơnau sồr pal jăt làng bol lơh tờm tàm kơnă hơđơm sền gròi dong kờl phan bơna mờ nùs nhơm ai cau lơh broă mùl màl đềt mềr mờ mpồl kông đoàn Việt Nam in.

Ngan ngồn sền gròi đoàn viên kông đoàn in, ngan là ală đoàn viên geh rài kis uă kal ke, gơtìp kòp kơn jơ̆ sơbơng roh, rềs àr lơh broă, tơngai lài, Liên đoàn Lao động ală kâp tàm càr Dăk Lăk neh geh uă broă lơh lùp còp, pơn dờm pơnđiang, jàu pà phan. Kuơmàng, broă lơh Hìu ơm Kông đoàn neh geh lam lơh ring bal, dờp geh bơta dồ nùs bal, bơta dong kờl bơh ală kâp ủy, gơnoar atbồ, mpồl, gah broă lơh,mpồl cau tàm càr dê, ală mpồl lơh broă, mpồl lơh sa kă bro mờ bơta lơh jat bơh gal ngan kwang bàng, đoàn viên, cau lơh broă. Jat hơ̆, tàm 5 nam do, gùt càr neh hòi jà tă pơgồp geh rlau 23 tơmàn đông mờ lam lơh dong kờl piă lơh pa, lơh niam wơl mờr 600 nơm hìu ơm kông đoàn ai đoàn viên geh rài kis kal ke bè hìu ơm in. Tơl nơm hìu geh jàu ờ mìng ai tơnggŏ nùs nhơm, bơta tam pà bơh mpồl Kông đoàn dê tus Đoàn viên, cau lơh broă geh rài kis kal ke bè hìu ơm, lơh gơs bơta pin dờn mờ bơta đềt mềr bơh đoàn viên, cau lơh broă dê gơ wèt mờ mpồl Kông đoàn mờ gam pơgồp bơnah lam lơh broă lơh gàr lơngăp lơngai rài kis mpồl bơtiàn bơh càr dê tai.

Là dùl tàm ală đoàn viên geh dong kờl lơh hìu ơm tàm nam 2023, bi H’Phúc Niê, cau lơh phan Sơnĕ Anih broă sa suơn sre suơn dờng 19/8, Kông ty kổ phần kau su Dăk Lăk neh gơtùi lơh bơta kơp kờñ lơh hìu ơm kơ̆ kơljap hìu bơnhă in. Jat hơ̆, tàm lồi nam 2023, bi geh dong kờl 40 tơlak đông bơh Kông đoàn Kông ty dê nàng lơh hìu ơm Kông đoàn. Hìu bơnhă bi neh tềm pềr, leng càn tai nàng lơh hìu ơnàng 45 thơk vuông tàm bơnah ù mè bèp pà, kờp jơh priă tă lơh mờr 100 tơlak đông. Tàm hìu pa bulah ờ huan dờng mơya ram mhŭ, bi H’Phúc ờ gơtùi pồn bơta chờ hờp he dê: Añ chờ hờp ngan tài dờp geh bơta sền gròi bơh Kông đoàn kông ty dê neh dong hìu bơnhă añ lơh geh hìu do, dong ùr bơklau añ iang nùs rlau bè anih ơm. Bơh tŭ do ùr bơklau añ sơlơ lơh ngan lơh broă, tă pơgồp uă rlau tai ai kông ty in.

Mò Vũ Thu Hà, Phó Củ tịc Ủy ƀan Ñân zân ƀòn dờng Hà Nội đơs wih đơs wơl: Ƀòn dờng Hà Nội sùm gĭt nền broă lơh sền gàr lơngăp lơngai sàng goh lơh broă là broă lơh sùm sùm. Ală broă lơh lơh jăt nhai lơh broă lơngăp lơngai sàng goh lơh broă neh geh lam lơh dồ ròt bal bơh ƀòn dờng tus kâp xã, pơgồp bơnah kwơmàng tàm bơtàu tơnguh lơh sa mờ sền gàr niam rài kis mpồl bơtiàn bơh càr lơgar dê. Mờ đơs là, bal mờ ală cồng nha lơh geh tàm ù tiah ƀòn dờng kung gam sơl bàr pe anih lơh broă, mpồl lơh sa kă bro broă lơh bơ̆t bơtàu gam ờ hềt sền gròi uă tus broă lơh lơngăp lơngai sàng goh lơh broă, pơhìn sùm uă jơnau digơlan gơlik geh, pơnyơu bè tàm nam 2023 tàm ù tiah ƀòn dờng dê kung gam gơlik geh sơl 296 dơ̆ rềs àr lơh broă lơh 300 nă cau lơh broă gơtìp rềs àr. Den tàng bè hơ̆, mò Vũ Thu Hà sồr ală Sở, gah sơnah lơh broă, ƀòn dờng, gơnoar ătbồ, kông đoàn ală kâp, ngan là ală mpồl lơh sa kă bro, anih lơh gơlik phan lơh sa kă bro, cau lơh phan, cau lơh broă kờñ pal tơrgùm bơyai lơh ală broă lơh mìng dồ tơngume bè lơngăp lơngai sàng goh lơh broă mờ lơh broă mpồl bơtiàn geh bơta tus bal bơh mpồl lơh sa kă bro, cau lơh broă dê, bơyai lơh ală broă lơh bơto pơlam dong kờl mpồl lơh sa kă bro, lơh niam wơl bơta pal geh lơh broă ai cau lơh broă in. Mò Vũ Thu Hà, đơs: Lơh jăt broă lơh lùp sền, lòt sền broă lơh lơngăp lơngai lơh broă, sàng goh lơh broă, rơcăng lài sơndră wơl ồs sa bơrtoh tàm anih lơh broă, mpồl lơh sa kă bro, bơyai lơh sền wơl, sền jơh wơl, sền swì, ai jơnau bơsram tàm broă lơh sồr lơh nhai lơngăp lơngai sàng goh lơh broă, yal Ủy ƀan Ñân zân ƀòn dờng in jăt jơnau sồr, sồr ală anih lơh broă, mpồl lơh sa kă bro, ală anih lơh gơlik phan, lơh sa kă bro gơ wèt jơh ală bơnah lơh sa lơh broă tàm ù tiah ƀòn dờng dê rơcăng lơh, ai lơh jăt broă rơndăp lơh tơngguh tai broă lơh pơgồp bal, lơh niam wơl bơta pal geh lơh broă, sền gròi pràn kơldang să jan, bơtàu tơnguh rài kis phan bơna, nùs nhơm ai cau lơh phan, cau lơh broă in.

Bi Trần Trung Hiếu ƀòn tờm tàm càr Quảng Bình, là cau atbồ cau lơh broă mờ măi mok ai Kông ty TNHH Tập đoàn Sơn Hải in, gam lơh bơnah broă crăp broă sồ 3, Rơndap broă lơh gùng rơndeh ntoat mhar Khánh Hòa – Buôn Ma Thuột. Bi yal, tàm bơnah broă do, Tập đoàn Sơn Hải ai mờr 50 nơm măi mok geh: rơndeh jă lŭ ală bơta, măi chŏ, măi cò tơnring, rơndeh ƀen, măi khoàng… mờ mờr 150 nă cau lơh broă, tam pà gơs uă dơ̆ lơh broă ngai mang. Tơl nă cau măi rơndeh halà cau chài drơng broă lam lơh bơnah broă geh Tập đoàn tơm priă nhai bơh 25 tus 30 tơlak đông dùl nhai; ai cau lơh broă ờs mờng bè cau chài lơh, hàn, lòs, khoàng, drơng broă,… geh tơm priă nhai bơh 12 tus 17 tơlak đông dùl nhai. Bơdìh mờ priă nhai, cau lơh broă gam geh dờp tai broă tơnguh jơ lơh broă tàm ală ngai rlô chờ..

Dơ̆ ơm rlô chờ 30/4, kwang đơng lam bồ Tập đoàn neh ring bal priă jờng ai tơl nă cau lơh broă in là 500 rbô đông, mờ dilah lơh broă tàm ngai rlô chờ den rơp geh pà priă jờng 300% pơndrờm mờ ngai ờs dilah lơh klò ngai mờ 330% dilah lơh trồ mang. Do là khà jờng kờp jat Adat Lơh broă gam ngui tŭ do. Bi Trần Trung Hiếu pà git: Rài kis bơh cau lơh phan bol hi dê den geh kông ty kơlôi rơcang gàr wil tơl. Bè sàu sa den kloh niam, geh tơl phan bơkah, phan pràn, bic den geh cơldŭ is mờ geh crap măi lơh mrềt. Rài kis geh gàr niam, oh mi bol hi lơh broă tryăng tryồng, jơh nùs, gàr niam tŭ tơngai hơ pơrgon ai broă lam lơh broă lơh in.

Dơ̆ ơm rlô ngai 30/04 mờ ngai 01/05 nam do jŏ jòng 05 ngai cèng wơl bơta chờ hờp ai uă cau lơh broă in mơya lơh ờ dồ êt mpồl lơh sa kă bro, is ồn là mpồl lơh sa kă bro lơh gơlik phan tìp kal ke. Uă anih rơcăng lài ai cau lơh broă in tơngguh jiơ lơh broă, bơsir tŭ jiơ lơh broă tơnơ̆ dơ̆ ơm rlô chờ, geh tiah cau lơh phan lơh broă is tàm ală ngai ơm rlô chờ nàng kờñ lơh geh di tơngai jàu phan. Ai tàm Bình Dương, tiah geh gal cau lơh broă, mò Phan Lê Diễm Trang, Phó Củ tịc Ală mpồl tàñ mai Bình Dương yal: 60 mpồl lơh sa kă bro tàm mpồl bal mờ gĭt nđờ jơ̆t rbô nă cau lơh phan gam tìp kal ke tàm broă rơndăp tăp sèng lơh sa tài bơh tơngai ơm rlô nisơna. Mò Trang pà gĭt, pơndrờm mờ nam 2023, nam do, sră dan blơi phan gơ rê wơl uă den tàng mpồl lơh sa kă bro neh geh broă rơndăp lơh lơh gơlik phan jơh gùt nam. Broă ơm rlô chờ ờ geh yal gờñ lơh khi tìp kal ke tàm broă rơndăp tăp sèng cau lơh phan. Is ồn nam do, sră hơ mờ cau lơh broă bal lơyah tơngai, sồr pal jàu phan di tơngai den tàng tŭ dờp geh jơnau yal ơm rlô chờ, mpồl lơh sa kă bro pal tàm bơyai mờ cau lơh broă bal tam gơl wơl ngai jàu phan. Uă năc blơi ờ bài den tàng lồi dŭt pal tơngguh tai tŭ jiơ lơh broă, halà tam gơl ngai ơm rlô ndai ai cau lơh phan in nàng khi iang nùs, chờ hờp chờ hờn lơh broă. Mò Trang, sồr: Broă ai cau lơh broă in ơm rlô jŏ ngai là niam ngan mơya pal geh bơta rơndăp tăp sèng lài. Pơnyơu bè nam do, dà lơgar rơcăng ai ơm rlô jŏ ngai den pal geh broă rơndăp lơh lài bơh 6 nhai. Ờ gơtùi mìng yal dồ tŭ tơngai lơyah tơnơ̆ hơ̆ sồr là nàng gơhòi jà jà cau lòt nhơl cau ngui sa mờ ai cau lơh broă in geh ơm rlô. Bè hơ̆, ală cau lơh broă hìu măy lơh gơlik phan bè bol hi ờ thàn lơh jăt. Tàm dùl tŭ tơngai lơyah, bol hi neh rơndăp tăp sèng rao mờ geh wơl dơ̆ ơm rlô jŏ ngai bè hơ̆ den đơs ngan là dùl bơta kal ke ngan ai ală anih lơh gơlik phan in, ờ mìng tàm gah tàñ mai lơm mờ gam tàm ală gah lơh sa ndai ngui uă cau lơh broă ndai tai.