Ồng Ka Phu Beng là cau Cơ Tu ơm tàm sàh Cà Dy, kơnhoàl Nam Giang, càr Quảng Nam. Tŭ do neh gơ gơs là hìu bơnhă geh priă jền lơh geh uă mơya ồng kung gam ờ hềt gơtùi huĭ ală ngai lài do bòl glar, kal ke, ùr bơklau lơh broă sùm mơya rài kis kung gam tàm bơta sa ờ tơl mơl ờ bềng.

Iat jơnau kwang bàng sàh òi jà mờ pơlam bơta chài lơh sa, ồng neh khin cha càn 50 tơlak đong bơh Ngân hàng dong kờl mpồl bơtiàn nàng lơh niam ù suơn, tam chi sa plai, tam brê, hơ̆ sồng rơhời rề ơnàng ròng phan. Tŭ do ồng Ka Phu Beng geh rơ wah là cau lơh broă sa jak bơh kơnhoàl dê: “Hìu bơnhă añ ròng 6 nơm kơn rồ me deh kòn, nhai pa do tac 2 nơm, dùl nơm tac geh 7 tơlak đong. Priă lơh geh 80 tơlak đong pah nam. Hìu bơnhă tam chi sa plai tac kung geh đau sơl. Ală gah lơh broă geh gơnoar kơnhoàl Nam Giang pơlam bơta chài ròng phan,  tam phan. Pơlam bơta chài lơh sa ai ală hìu bơnhă làng bol tàm ƀòn lơgar. Ală bơnah priă lơh geh bơh tam brê, ròng phan, hìu bơnhă neh bơtàu tơnguh, jơh rƀah. Bơh hơ̆, hìu bơnhă lơh geh hìu, ròng 3 nă kòn ndrờm bơsram Đại họk lơm”.

Kơnhoàl Nam Giang gehmờr 80% khà kờp làng bol là cau jơi bơtiàn dồ êt nă cau. Tàm kơnhoàl geh 200 broă lơh cau lơh broă sa lơh sa wàng dờng pơgồp bal mờ lơh sa suơn sre – brê bơnơm, bơtàu tơnguh lơh sa mpồl lơh broă bal jat mpồl ală hìu bơnhă lơh bal, tam gơl chi tam, phan ròng. Uă hìu bơnhă làng bol geh priă jền lơh geh kơ̆ kơljap sùm bơh 2, 3 jơt tơlak tus 2, 3 rhiăng tơlak đong pah nam. Ồng Châu Văn Ngọ, Phó Củ tịc Anih duh broă làng bol kơnhoàl Nam Giang pà git: Bơh ală bơnah dong kờl bơh dà lơgar mờ càr dê, bơdìh mờ broă bơcri priă lơh phan bơna, kơnhoàl Nam Giang gam dong kờl làng bol lơh uă broă lơh sa ngan ngồn di mờ bơta geh ngan tàm kơnhoàl, dong khi tơnguh priă lơh geh. Tŭ do, khà hìu rƀah bơh kơnhoàl Nam Giang dê neh gơmù gam 25%. Kờp bal pah nam, khà hìu bơnhă rƀah gơmù rlau 8%: “Bơh bơta dong kờl bơcri priă dà lơgar dê kung bè hòi jà ală bơta tă pơgồp priă jền, kơnhoàl Nam Giang neh lam lơh niam ală broă lơh, rơndap broă lơh tàm kơnhoàl. Bơdìh mờ broă bơcri priă lơh phan bơna pal geh nàng drơng broă lơh sa mờ rài kis in, den kơnhoàl gam dong kờl bơtàu tơnguh lơh sa, dong kờl broă lơh sa làng bol kòn cau in, ngan là ală hìu bơnhă rƀah, hìu bơnhă ndrờm bè cau rƀah, hìu bơnhă pa jơh rƀah nàng dong làng bol geh priă jền lik klàs rƀah kơ̆ kơljap jŏ jòng sùm. Tàm hơ̆, geh ală broă lơh bơtàu tơnguh lơh sa jat gùng dà lơh bal ală mpồl lơh gơlik phan pơgồp bal đah mpồl lơh sa kă bro nàng blơi phan lơh gơs. Bè hơ̆ den tàng neh pơgồp bơnah tàm broă lơh tơrmù rƀah, bơt bơtàu ƀòn lơgar pa”.

Ală broă lơh jơnau kờñ dà lơgar, ngan là Broă lơh jơnau kờñ dà lơgar tơrgùm rƀah kơ̆ kơljap jŏ jòng sùm neh dong git nđờ rbô hìu bơnhă làng bol tiah jơi bơtiàn dồ êt nă cau, tiah sar lơgar ngài, tiah kơh bơnơm càr Quảng Nam geh dong kờl broă lơh sa, tac sơntìl chi tam, pơlam bơta chài ròng phan, tam phan, dong khi rề ơnàng broă lơh sa. Ồng Hồ Quang Bửu, Phó Củ tịc Anih duh broă làng bol càr Quảng Nam pà git: “Ală broă lơh jơnau kờñ dà lơgar dê kung bè kes priă càr dê dong kờl làng bol tiah jơi bơtiàn dồ êt nă cau tàm càr Quảng Nam neh lơh geh cồng nha, lơh tam gơl muh mat bơtàu tơnguh lơh sa tiah kơh bơnơm. Tŭ do, bol hi gam sồr lam lơh uă ală broă lơh do, lơh bè lơi nàng uă hìu bơnhă làng bol kung bè ală ƀòn làng bol ơm kis, ngan là tàm tiah kơh bơnơm gơ dờp  nàng lam lơh uă broă lơh do. Bơh hơ̆, pơgồp bơnah ai broă tơnguh priă lơh geh, tơrmù rƀah kơ̆ kơljap jŏ jòng sùm”.