VOV4.K’ho – Drim òr (07/6), tàm càr Kon Tum geh lơh Cribơyai khoa học dà lơgar “Bơtàu tơnguh lơh sa - mpồl bơtiàn tiah Tây Nguyên” dơ\ 3 nam 2019. Cribơyai geh 24 jơnau cribơyai kơlôi sơnơng khoa học bơh ală cau bơceh, mpồl cau bơceh là cau pơgru, cau khoa học, cau atbồ tàm 2, 3 hìu bơsram đại học mờ học viện, ala mat mpồl lơh sa kă bro tàm gùt lơgar, tơr gùm cribơyai ală tơngume tờm: “Bơta broă lơh sa mờ chính sách bơtàu tơnguh lơh sa ai tiah Tây Nguyên in”, “Bơta niam chài – nhơl chờ mờ cau lơh broă ai tiah Tây Nguyên in” mờ “Bơta lơh sa suơn sre – sơn đờm mut lơh broă ai Tây Nguyên in”.

Cribơyai là tu\ nàng ală cau khoa học, kuang đơng lam mpồl lơh sa kă bro, cau atbồ ală càr Tây Nguyên sơlơ lơh pràn lơh broă bal kơlôi sơnơng khoa học, tam klac bal bơtàu tơnguh, yal tơnggit phan lơh gơs geh pơn rơ, kung bè pơn jờng nùs nhơm sơn đờm mut lơh broă; cribơyai mờ ală kấp bè ai tơlik gùng dà broă lơh kuơ màng bơtàu tơnguh lơh sa - mpồl bơtiàn tiah Tây Nguyên di mờ bơta geh ngan.

Cau mblàng K’Duẩn