Nàng pơgồp bal lơh geh cồng nha, tơl ală bơta ală jơnau kờñ broă rơndăp lơh tơnguh bơtàu lơh sa mpồl bơtiàn nam 2023 neh geh ai, Ƀộ Kông Thương tơrgùm lơh jăt ală kơnòl bè: Lơh jăt ndrờm bal, geh cồng nha Broă lơh bơh gah Kông Thương dê lơh jăt Nghị quyết sồ 01 bơh Cíñ phủ; Pơn jăt tai lơh jăt geh cồng nha Broă brồ guh wơl, tơnguh bơtàu lơh sa, lơh pràn broă bơcri priă dà lơgar, jăt sền broă lơh, bơsong kal ke nàng gờñ ai tàm broă lơh ală rơndăp broă lơh tờm.

Tàm pơrjum, Thủ tướng ồng Phạm Minh Chính sồr, ală kwang bàng tơrgùm cri bơyai bè broă tơnguh bơtàu mờ lơh geh cồng nha drà kă bro tàm lơgar, tơnguh broă hòi jà kă bro, tơrbŏ bal bơta kờñ mờ bơta geh, pờ ơnàng drà kă bro phan mờ lơgar bơdìh; lơh pràn broă lơh sa kă bro, ai geh broă lơh làng bol, cau lơh broă in.