
“Tơngkah 100 nam Ngai Sră ƀău kac màng Việt Nam mờ cribơyai bè gùng dà broă lơh, bơta dong kờl, priă jền ai broă lơh sră ƀău in, bơt bơtàu mpồl ală cau lơh ƀău lơh jat jơnau sồr bơtàu tơnguh tàm tŭ tơngai pa” là tơngume dơ̆ pơrjum bơh Sờh Niam chài, Tàp pràn să jan mờ Lòt nhơl càr Dăk Lăk, Mpồl cau lơh ƀău càr, Mpồl Mblàng yal Bơto bơtê mờ Hòi jà làng bol Tỉñ ủy càr Dăk Lăk pơgồp bal bơyai lơh mho ngai 17/6. Tàm pơrjum, ală cau ala mat neh bal mờ gơp cribơyai bè ală bơta lòng geh ai tơlik tàm tŭ tơngai pa, yal ală broă lơh bơt bơtàu mpồl cau lơh ƀău lơh jat jơnau sồr bơtàu tơnguh.

Jat cau lơh ƀău mò Đàm Thị Thuần, Phó Lam bồ Mpồl Sền swì jơnau cih Ƀău Dăk Lăk pà git, jơnau sồr ngai sơlơ uă bè tam gơl sồ mờ bơta niam yal jơnau tơnggit, cau lơh ƀău pal gàr kơ̆ nùs nhơm kac màng, nùs nhơm lơh broă. Mờ kung pal mờng chài, git loh ù tiah he drơng lơh, pal là ală làng bol sồ, cau lơh ƀău sồ. Mò kung ring bal đơs, gơ wèt mờ ù tiah is ồn bè Dăk Lăk, broă yal jơnau tơnggit di, di tŭ, pal geh tus làng bol, ngan là làng bol tàm tiah sar lơgar ngài, tiah jơi bơtiàn dồ êt nă cau, ờ mìng là kơnòl broă kuơmàng mờ gam là kơnòl cíñ trị, nùs nhơm cau lơh ƀău dê.
Viết bình luận