Tàm Pơrjum dơ̆ IV, Mpồl Củ tịc Anih duh broă Mặt trận Dà lơgar Việt Nam pơgồp jơnau đơs tàm uă tơngu me kwơ màng bè: Rơndăp broă rơcang cih gùng dà broă lơh Mặt trận nam 2026; Rơndăp broă bơyai lơh Pơrjum dờng cau ala măt Mặt trận Dà lơgar Việt Nam tus do; Rơndăp broă rơcang cih jơnau yal tơn jơh 10 nam lơh jăt Rơndăp broă sồ 01, ngai 5 nhai 5 nam 2025 bè tam gơl pa broă yal tơngit mblàng jơnau bơh Mặt trận Dà lơgar Việt Nam dê; Jơnau yal cồng nha lơh jăt Jơnau lơh nền tàm pơrjum sồ 18 bè broă lơh jăt broă rơndăp tăp sèng, tơmŭt ală mpồl lơh broă cíñ trị mpồl bơtiàn, ală mpồl lơh broă geh Đảng, Dà lơgar jào kơnòl broă gơwèt Mặt trận Dà lơgar Việt Nam dê.

Phó Củ tịc Anih duh broă Măt trận Dà lơgar Việt Nam mò Nguyễn Thị Thu Hà pà git di pal mờ jơnau kờñ kơnòl broă tàm rài pa, bơh tŭ do tus jơh nam 2025 mờ tàm nam 2026, mpồl lơh broă Mặt trận pơn jăt tai sền wơl, rơndăp tăp sèng wơl mpồl lơh broă tàm dơlam gơwèt Mặt trận Dà lơgar, ală mpồl lơh broă cíñ trị mpồl bơtiàn, ală mpồl lơh broă ală kấp geh Đảng, Dà lơgar jào kơnòl.