Jơnau pơndŭt sồ 67 bơh Bộ Chính trị, Jơnau lơh nền tàm pơrjum sồ 72/2022/QH15 bơh Quốc hội dê tơngŏ bơta sền gròi is ồn bơh Dà lơgar, lơh geh adat boh lam mờ bơta pràn nàng bơt bơtàu Buôn Ma Thuột gơ gơs tiah drà tờm tiah Tây Nguyên dê.

Ală broă lơh do neh lơh geh ală bơta chính trị, adat boh lam kwơ màng nàng càr Dăk Lăk in ai lơh lài bơta pràn bơcri priă lơh, bơtàu tơnguh Buôn Ma Thuột. Pal sền gròi là, Jơnau lơh nền tàm pơrjum sồ 72 sồr 5 mpồl broă lơh krơi is bè priă jền, kes priă, rơndăp ù tiah, gơ hòi gơ jà bơcri priă mờ mpồl lơh broă jak. Tàm hơ̆, broă lơh bơtơl 45% khà priă tă ngui sùm neh lơh geh cồng nha loh làng.

Tơngai bơh nam 2021–2025, kờp jơh priă bơcri bơtàu tơnguh gùt mpồl bơtiàn tàm ù tiah Buôn Ma Thuột lơh geh 125 rơbô tơmàn đong. Phan bơna bơt bơtàu tiah drà, gùng lòt rê, lơh sơnơm, bơto bơtê geh sền gròi; ală tiah, mpồl lơh sa mờ măi mok gơ hòi gơ jà tai uă rơndăp broă lơh, pơgồp bơnah lơh kơ̆ kơl jap gơnoar anih tờm bơh tiah drà dê.

Mơya, ồng Cao Đình Huy, Kwang Lam bồ Sờh Priă jền càr Dăk Lăk đơs là, cồng nha bơtàu tơnguh ờ hềt ndrờm pal mờ bơta pràn. Tàm 10 broă jàu tờm ngan, geh 5 broă jàu ờ hềt lơh geh. Lơh sa tiah drà ờ hềt geh gah tề lam, ờ hềt gơ hòi gơ jà geh cau bơcri priă lơh jŏ jòng mờ rơndăp broă lơh dờng. Lơh sa mờ măi mok lơh gơlik jrô, logistics, lòt nhơl niam mờ lơh bal kơnhoàl ù tiah gam ờ hoan geh. “Geh 3 broă lơh ờ hềt lơh geh cồng nha ngan ngồn. Dơ̆ 1 là broă lơh tơnguh khà jơng kah dồs càn priă ờ hềt geh bơnah càn, dơ̆ 2 dong kờl priă dia priă lơh geh mpồl lơh sa kă bro ờ hềt geh rơndăp broă lơh tơl ală bơta mờ dơ̆ 3 là broă lơh gơ hòi gơ jà cau gĭt wă jrô broă lơh, cau jak chài ờ hềt gơ hòi gơ jà geh”.

Jat tàm ală bơta sền wơl Jơnau pơndŭt sồ 67 mờ Jơnau lơh nền tàm pơrjum sồ 72, càr Dăk Lăk dan mờ Dà lơgar pơn jat tài tàm pơrdờn, tam gơl niam ală broă lơh neh lơh geh cồng nha; kơlôi sơnơng bơtơl broă lơh bè phan bơna bơt bơtàu, tam gơl tơlir, jak chài măi mok, logistics mờ lơh bal kơnhoàl ù tiah. Dăk Lăk kung dan rề ơnàng broă lơh bơtơl 45% khà priă jền tă ngui sùm, di pal mờ ù tiah bơtàu tơnguh pa, pơgồp bal mờ ală anih tờm gơn kơnờm Buôn Ma Thuột – Buôn Hồ mờ Tuy Hòa – Đông Hòa.

Ồng Lương Nguyễn Minh Triết, Bí thư Tỉñ ủy càr Dăk Lăk đơs, ală broă lơh krơi is mờ Dà lơgar lời ai Buôn Ma Thuột in là bơta ƀuơn mờ kơnòl dờng bơh càr dê. Tàm tơngai càr Dăk Lăk pa geh ù tiah bơtàu tơnguh dờng ơnàng rlau, broă tàm pơr dờn ală broă lơh do pal pơgồp bal mờ rơndăp ù tiah bal tiah drà Buôn Ma Thuột tus nam 2050, sơlơ tơnguh tai lơh bal mờ lơh jat niam gơnoar tờm bơh tiah drà dê gơwèt mờ gùt tiah do dê. “Gùng dà broă lơh neh geh, rơndăp ù tiah neh geh yal, ală kơnòl broă tờm den kung neh geh sền gĭt, bơta kwơ màng ngan rlau jơh là broă lơh lam lơh jat. Broă lơi neh lơh geh den kung pal sền sơwì jơnau tờm lơh geh, bè lơi lơh geh; broă lơi ờ hềt lơh geh kung pal sền sơ wì nền, bè lơi ờ hềt lơh geh, jơnau tờm ờ lơh geh bơh lơi”.

Ồng Nguyễn Đức Trung, Phó Lam bồ Mpồl Gùng dà broă lơh mờ Broă rơndăp lơh dờng Dà lơgar đơs sùm, broă lơh krơi is mìng ngan ngồn lơh geh bơta kwơ tŭ lòt bal mờ bơta pràn jak lam lơh jat mờ bơta pràn hòi jà tă pơgồp, ngui geh cồng nha bơta pràn. Dà lơgar cih dờp, kờñ ală jơnau đơs bơh càr dê, mơya sồr pal rơwah broă lơh di tiah, di anih, bơsong di bơta gơ kòl, jat tàm ală bơta sền sơ wì bơta gơrềng mờ bơta gơ tùi lơh jat ngan ngồn.  “Broă lơh krơi is mìng lơh geh bơta kwơ tŭ geh lơh jat nền mờ jơnau sồr geh ngan mờ lòt bal mờ bơta pràn jak lam lơh jat mờ bơta pràn jak hòi jà ngui cồng nha ală bơta pràn dê. Broă lơh mìng là ală bơta kờñ geh, gam broă lam lơh jat hơ̆ sồng là bơta tờm lơh nền”.

Broă pơn jat tai lơh sir ală broă lơh krơi is nàng bơtàu tơnguh Buôn Ma Thuột ờ mìng nàng kờñ tă bơsong ală kal ke tềng đăp mat lơm mờ gam lơh geh bơta gơn kơnờm nàng tiah drà in lơh jat niam gơnoar anih tờm, tiah tờm tàm tơrbŏ mờ tề lam bơtàu tơnguh lơh sa- mpồl bơtiàn bơh càr Dăk Lăk pa mờ jơh bal tiah Tây Nguyên dê. Mơya, bơh gùng dà broă lơh, broă lơh tus cồng nha ngan ngồn kung gam là dùl jơnau lơh nền pràn kơl dang, bơta rcang lài mờ kràñ cê jơh nùs tàm lam lơh jat. Do rơ̆p là bơta tờm ngan nàng lơh geh bơta ƀuơn bè broă lơh, bơta pràn gơ gơs ală tam gơl geh ngan, lam Buôn Ma Thuột bơtàu tơnguh drờm pal mờ gơnoar tiah drà tờm tiah do dê.