Dăk Lăk tŭ do geh 104 sră ai gơnoar tơnhàu phan kuơ tàm ù gam tơngai lơh jat, tàm hơ̆, geh 12 sră ai gơnoar tơnhàu drơng tơn ală rơndap broă lơh bơcri priă dà lơgar, 14 sră ai gơnoar mờ yal ai wơl phan kuơ tàm ù tàm bă tiah ală rơndap broă lơh bơt bơtàu mờ kờp jơh khà geh ai gơnoar tơnhàu rlau 8 tơlak 200 rbô khối.

Is ồn, quý 4 nam 2026, jơnau kờñ bơh 44 broă lơh, rơndap broă mờ ƀòn lơgar dê mờr 690 rbô khối. Uă ngan rơndap broă lơh neh git nền mpồl tac phan, mơya bàr pe mpồl atbồ kung gam yal wơl là ờ tơl lŭ, lŭ rơđeh, giă phan ngui bơt bơtàu tàm drà kă bro gơguh jơnhua. Ồng Đỗ Hữu Huy, Chủ tịch Anih duh broă Làng bol càr Dăk Lăk đơs là, bơta do là tài bàr pe anih tơnhàu phan tàm ù ờ hềt gơtùi lơh broă tài gơ kòl sră pơ àr ù tiah, tiah ơm kis; khà phan tac tàm bàr pe anih tơnhàu ờ gàr tơl bơta niam jat jơnau sồr.

Chủ tịch Anih duh broă Làng bol càr Dăk Lăk sồr jat sền jơh tŭ tơngai bơh tơnhàu, kă bro bơh mpồl lơh sa kă bro lơh kòn gùng tus jun pơndiang phan bơt bơtàu. Jơnau yal tơnggit bè khà, sră tac bro tàm điện tử, kơnòl tă dia mờ broă lơh jun pơndiang pal geh tàm tơrbŏ bal, tàm pơn drờm; ngui măi mok sồ, bồ tơngoh jak kòn bơnus lơh gơs mờ rùp hin bơh vệ tinh nàng git gŏ tềl tơnggŏ krơi nisơna, ngan là bơta tơnhàu rlau mờ khà geh ai, tơnhàu trồ mang halà lơh dipal broă tơnhàu phan kuơ tàm ù tìs mờ adat boh lam.

Gơ wèt mờ giă tac, Chủ tịch Anih duh broă Làng bol càr Dăk Lăk sồr anih lơh broă geh gơnoar yal giă phan bơt bơtàu di tŭ, di mờ bơta geh ngan tơl anih tơnhàu, kờp di khà priă tă drơng broă tơnhàu, lơh gơlik mờ jun pơndiang; ờ lời giă yal gơ lin uă ir pơndrờm mờ giă drà kă bro, lơh mpồl lơh sa kă bro pal tơnguh giă bơh ală mpồl lơh kòn gùng. Ală mpồl lơh sa kă bro pal lir, yal giă song dơpă, tac phan di mờ giă kă bro, sơñio sră tac bro di mờ giă mùl màl; ờ prap phan lơh gơlik bơta ờ tơl phan ờ ngan, ring bal lơh nền giă halà tơnguh giă bơh anih tac, mpồl lơh sa kă bro jun pơndiang: “Tàm tơngai tus, đơng lam Anih duh broă rơp sơlơ lòt sền nisơna, tơrgùm tàm sră ai gơnoar, bơta pràn tơnhàu, khà tơnhàu, bơh lơi geh giă tac, sră tac blơi, jun pơndiang hơ̆ sồng kơnòl bè priă jền mờ bơta tac phan ai ală rơndap broă lơh in. Is ồn sền ngac tus ală tiah geh bơta tam gơl giă nisơna, broă yal wơl ờ tơl, prap phan geh tềl tơnggŏ lơh tìs. Tŭ geh tềl tơnggŏ lơh tìs den yal wơl Chủ tịch Anih duh broă Làng bol càr in nàng sồr ală anih lơh broă lùp sền, sền swì, đal git jơnau yal, lơh glài kràñ jat jơnau sồr”.