Càr Dăk Nông tơrlòng lơh broă sơnah ƀòn pa tơnơ̆ mờ tŭ tơmŭt bal
Thứ hai, 07:56, 23/06/2025 Cau mblàng Ndong Brawl/Cau cih Tuấn Long (VOV Tây Nguyên) Cau mblàng Ndong Brawl/Cau cih Tuấn Long (VOV Tây Nguyên)
VOV4.K'Ho- Ngai do (23/06), càr Dăk Nông tơrlòng lơh broă dùl sàh mờ dùl sơnah ƀòn pa tŭ lơh jăt broă tơmŭt bal. kwang bàng, kông cứk ală sàh, sơnah ƀòn do gam lơh ngan lơh broă, tŭ lơi kung rơcang lài lơh kơnòl pa.

Nàng tơrlòng lơh broă, tàm nhai pa do, Mpồl dùl mpồng geh 5 nă cau geh Củ tịc Anih duh broă làng bol sơnah ƀòn Nghĩa Phú, ƀòn dờng Gia Nghĩa, càr Dăk Nông drơng lơh, pal sùm “lơh ngan” tơnguh tơngai lơh broă nàng bơsong sră nggal gam gơlời, tam cah is sră nggal, kờp phan bơna… rơcang jào lài mờ tŭ tơmŭt bal. Lŏ Trần Thị Thu Hiền, dùl nă cau lơh broă tàm mpồl pà git, bŭ lah geh uă nam broă lơh mờng chài lơh broă tàm anih lơh broă bơh ƀòn dờng Hồ Chí Minh mờ càr Dăk Nông dê, lŏ kung gam ờ git bè lơi tềng đăp mờ tam gơl dờng ngan do.

Mơya, tơnơ̆ mờ dơ̆ bơsram tàp tàm ngai 13 mờ 14 nhai 6 pa do, lŏ neh git mờr jơh khà broă lơh geh jào tàm anih lơh broă pa dê. “Broă tàm anih lơh broă lài ha là pa tơnơ̆ mờ tŭ tơmŭt bal kung ndrờm bal sơl, tài ndrờm là dờp, tơwơr cồng nha broă lơh drơng ala dà lơgar dê mờ lơh Rơndăp broă 06 bè tam gơl sồ. Tus do kơnòl broă gơguh, mơya tài neh mờng lơh mờ niam đao tàm sơnah ƀòn lài do, den tàng añ kơlôi là rơ̆p lơh gơtùi. Bŭ lah broă lơh di gơlan uă rơlao, ha là gah broă pa rơlao, mơya lơh ngan den di gơlan lơh gơs kơnòl broă geh jào”.

Jăt rơndăp broă rơndăp tăp sèng mpồl lơh broă sră nggal càr Dăk Nông dê, ală sơnah ƀòn Nghĩa Phú, Nghĩa Tân mờ sàh Dăk Rmoan rơ̆p geh tơrmŭt bal gơs sơnah ƀòn Nam Gia Nghĩa mờ hìu lơh broă geh lơh tềng hìu sồ 02 gùng Võ Văn Tần, sơnah ƀòn Nghĩa Tân, là hìu lơh broă bơh Anih duh broă làng bol ƀòn dờng Gia Nghĩa lài mờ tŭ tơn jơh lơh broă. Ồng Vũ Minh Nghĩa, Ƀí thư Đảng ủy sơnah ƀòn Nghĩa Phú pà git, khà kwang bàng lơh broă gơnoar atbồ sơnah ƀòn Nam Gia Nghĩa geh lơh bơh khà kwang bàng bơh Tỉñ ủy, Thàñ ủy mờ 3 sơnah ƀòn, sàh lài do dê: “Gùng dà broă lơh den jăt broă lơh pa, lơh broă tơrlòng ală kwang bàng Ƀí thư Đảng ủy, Củ tịc Anih duh broă làng bol sơnah ƀòn, Củ tịc Mpồl duh broă làng bol mờ Củ tịc Anih duh broă Mặt trận Dà lơgar Việt Nam sơnah ƀòn rơ̆p tus bal jăt tơl gơnoar broă tơn. Bơdìh hơ̆ tai, tơl anih lơh broă ndrờm geh ală bơnah broă pơlam dong kờl lơh broă di jăt gơnoar broă, kơnòl broă geh tam pà. Tàm broă lơh di lah gơtìp gơkòl, ờ hềt niam den rơ̆p pơrjum tai nàng bơyai lơh sền wơl broă lơh”.

Ồng Hoàng Công Hội, Ƀí thư Đảng ủy sơnah ƀòn Nghĩa Tân, ƀòn dờng Gia Nghĩa pà git, sơnah ƀòn do neh sền wơl jơh bơh phan bơna tus mờ kwang bàng lơh broă nàng lơh jăt broă tam jào, ai lơh broă tơnơ̆ mờ tŭ tơmŭt bal. Geh di pơgăp 200 nă kwang bàng, kông cứk lơh broă tàm sơnah ƀòn Nam Gia Nghĩa tơnơ̆ mờ tŭ tơmŭt bal. Broă lơh tơrlòng lài sơnah ƀòn pa lơh jăt di mờ jơnau bơto sồr bơh Ƀộ Lơh kơnòl broă dơlam is mờ Cíñ phủ neh ai. “Jăt rơndăp broă bơh ƀòn dờng lơh kung bè ală jơnau geh ai, jơnau yal bơto sồr bơh Ƀộ Lơh kơnòl broă dơlam is bal mờ Jơnau lơh nền tàm pơrjum Cíñ phủ dê, gơwèt mờ sơnah ƀòn Nam Gia Nghĩa rơ̆p lơh ală mpồl lơh broă, tàm hơ̆ geh: Cơl dŭ lơh broă; Anih Lơh sa-Phan bơna tiah drà; Cơl dŭ lơh broă niam chài, mpồl bơtiàn; mờ Anih Lơh sră nggal dà lơgar. Ală mpồl lơh broă broă lơh drơng ala den kung rơ̆p geh lơh tàm tơl sơnah ƀòn nàng drơng làng bol in geh cồng nha, di mờ jơnau kờñ tàm mùl màl sơnah ƀòn dê”.

Jăt rơndăp broă bơh Dà lơgar yal, bơh ngai 01 nhai 7 tus, càr Dăk Nông rơ̆p tơrmù bơh 71 gam 28 mpồl lơh broă sră nggal kấp sàh, sơnah ƀòn mờ tơmŭt bal tàm càr Lâm Đồng pa. Ală broă lơh ngan bơh tơl sàh sơnah ƀòn bal mờ tơl nă kwang bàng gam rơhời lơh jăt jơh broă lơh sră nggal tơrmù niam, geh cồng nha, pràn. Broă tơrlòng lơh mờ lơh gơs gùng dà broă lơh, rơ̆p dong kờl gơnoar atbồ kấp sàh pa lơh geh jơnau kờñ mhar, niam tŭ mŭt lơh broă mùl màl.

 

Cau mblàng Ndong Brawl/Cau cih Tuấn Long (VOV Tây Nguyên)

Viết bình luận

TIN CÙNG CHUYÊN MỤC