Tàm 124 mpồl lơh broă sră pơ-àr gơnoar atbồ lơgar tàm kấp sàh càr Lâm Đồng dê geh tus 113 mpồl lơh broă dan cih măt kờñ tơnguh cau lơh broă tus dong kờl, geh tŭ geh anih lơh broă kờñ tus 12 nă kwang bàng.

Tàm khà rơlao 400 nă kwang bàng càr kờp dŭ rơ̆p sồr tus dong kờl sàh, geh 93 nă kwang bàng lơh broă tờm bè đah măi mok pa; 68 nă kwang bàng đah phan geh is mờ tiah kis; 42 nă đah kờp sền priă jền; 35 nă kwang bàng gah bơtơ̆t bơtàu mờ 34 nă kwang bàng đah adăt boh lam, sră nggal hìu nhă… bal mờ kwang bàng lơh broă tờm gơwèt ală gah broă ndai. Broă sồr kwang bàng bơh càr tus dong kờl sàh neh geh kơlôi tus, tài tơnơ̆ mờr 1 nhai lơh broă mpồl lơh sră pơ-àr gơnoar atbồ lơgar bàr kấp, uă sàh, sơnah ƀòn tàm càr ờ tơl kwang bàng lơh broă tờm. Geh ờ uă mpồl lơh broă kấp kơnhoàl lài do neh ai kwang bàng tus sàh ờ ndrờm bal, geh tiah ờ tơl, geh tiah gal ir. Geh tiah kwang bàng lơh broă ờ hềt mùl màl jak kơnòl broă tàm gah geh jào.