Dùl nhai tơnơ̆ broă lơh gơnoar atbồ sàh pa lơh broă, nùs nhơm lơh broă tàm Anih tờm drơng broă sră pơ àr gơnoar atbồ kwang àng sàh Mang Yang geh lơh sơrbac mhar. Kwang bàng, cau lơh broă sa priă nhai dà lơgar ờ ru ngan là broă dờp, bơsong sră nggal, hơ ală jơnau lùp mờ pơlam làng bol yal sră nggal. Ồng Võ Lê Xuân Thiện – Củ tịc Anih duh broă Làng bol sàh Mang Yang pà git, sră nggal uă ngan, mơya kwang bàng sàh neh bơsong niam ngan: “Khà sră nggal gơguh uă mhar ngan, rlau 1 rbô sră nggal. Ală sră nggal neh geh bơsong di mờ tŭ tơngai hơ pơrgon, làng bol chờ hờp ngan. Bơh sơn rờp lơh broă den lơh ndang, sền ală broă rơndap lơh ndang nàng bơsong sră nggal”.

Tơnơ̆ 1 nhai lơh broă broă lơh gơnoar atbồ ƀòn lơgar 2 kâp, ală anih tờm drơng broă sră pơ àr dà lơgar tàm càr Gia Lai neh lơh broă niam, kơ̆ kơljap. Mpồl kwang bàng, cau lơh broă sa priă nhai dà lơgar neh lơh ngan sơrlèt gan kal ke, mhar gơdờp mờ anih lơh broă pa bal mờ khà broă gơguh uă nisơna pơndrờm mờ lài do. 

Jat jơnau yal tàm Mpồng broă drơng ala dà lơgar ngai 01/8, càr Gia Lai tŭ do ơm dơ̆ 3 tàm 34 càr, ƀòn dờng bè khà sồ sơñio drơng broă làng bol mờ mpồl lơh sa kă bro in tàm broă lam lơh sră pơ àr gơnoar atbồ dà lơgar, mờ 76,86 điểm. Bơdìh hơ̆ tai, càr kung ơm dơ̆ 6 tàm 34 bè khà sră pơ àr gơnoar atbồ gơlik geh mờ geh dờp, bơsong, mờ kờp jơh 128 rbô 246 sră nggal, tàm hơ̆ khà sră nggal tong tàm internet geh 76,9%. Ồng Lê Dũng Linh – Lam bồ Cơldŭ tam gơl wơl mờ gròi sền sră pơ àr gơnoar atbồ, Cơldŭ lơh broă Anih duh broă làng bol càr Gia Lai pà git, tơngai tus, càr rơp pơn jat tai lơh pràn ngui bồ tơngoh jak kòn bơnus lơh gơs nàng dong kờl kwang bàng, lơh pràn bơto pơlam, bơto bơtê, mblàng yal jơnau… nàng kờñ tơnguh tơl làm cồng nha broă lơh gơnoar atbồ ƀòn lơgar 2 kâp: “Bol hi rơp pơn jat tai bơto pơlam bè ală broă rơndap lơh bơsong broă sră pơ àr gơnoar atbồ pal geh mờ gơlik geh uă sră nggal, gơ jat bal mờ bơyai lơh tìp mat tàm bơyai đah kâp càr mờ kâp sàh, sơnah ƀòn nàng bơsong ală kal ke, bơta gơ kòl. Tơnơ̆ tŭ bơto bơtê, bơto pơlam den rơp sền sơ wì wơl bơh 2 gah. Dùl là tàm internet mờ jơnau yal tàm măi mok, dơ̆ 2 là ai ală mpồl lòt sền. Bơh cồng nha sền sơ wì hơ̆, bol hi rơp pơn jat tai bơto bơtê, pơlam dong ală tiah gam uă kwi kuơ in. Broă do rơp tơn jŏ tus jơh nam 2025. Tàm nam 2026 ngan là pal geh bơta sac rơ wah kwang bàng”.

Tus tŭ do, càr Gia Lai neh lơh gơs broă pồ tơl mpồl lơh broă sră pơ àr gơnoar atbồ bơh càr tus sàh. Mờ kung lơh pràn tam pà kâp 1 rbô 60 kơnòl broă tàm jàu rê hờ kâp sàh. Anih duh broă Làng bol càr neh ai gơnoar ală tiah geh tơl bơta, crơng gơs mpồl lơh broă uă kơnòl, geh: atbồ rơndap broă lơh bơcri priă bơt bơtàu, tơl wơl broă ai ù lơh rơndap broă, bơtàu tơnguh bă ù, ai pà mờ tuh tơlik dà mờ lơh ală broă drơng ala dà lơgar pal geh ndai.

Ồng Phạm Anh Tuấn – Củ tịc Anih duh broă Làng bol càr Gia Lai pà git, bơh bơta git loh ală gơ kòl tàm kâp sàh, sơnah ƀòn, mờr tus càr rơp dong kờl tơl sàh bơh 1 tus 3 tơmàn đong nàng bơcri, lơh niam phan bơna; ai tơlik broă lơh dong kờl gơ wèt mờ kwang bàng pa geh ntrờn tus, gơ jat bal mờ broă lơh bơto bơtê, bơto pơlam tơnguh mờng chài lơh broă, mờ kung sền sơ wì broă rơndap lơh sồr kwang bàng bơh kâp càr rê dong kờl ală sàh, sơnah ƀòn gam gơtìp kal ke, nàng kờñ gàr bơta crăp rơcang, ngac ngar mờ geh cồng nha tàm tŭ lam lơh kơnòl broă dà lơgar: “Bè gơnoar atbồ 2 kâp den tơr gùm lài ngan là drơng làng bol mờ mpồl lơh sa kă bro in den lài ngan là anih tờm sră pơ àr gơnoar atbồ dà lơgar pal gàr lơh broă sùm, geh cồng nha mờ nùs nhơm drơng broă niam. Mờ dơ̆ 2 là pal sùm rềp làng bol, git mờ bơsong di tŭ ală jơnau kờñ dipal bơh làng bol mờ mpồl lơh sa kă bro dê. Jơh ală broă lơh bơh càr mờ ală tiah dê pal tam gơl lơh broă bơh atbồ sră pơ àr gơnoar atbồ, gròi sền gơ gơs rài sră pơ àr gơnoar atbồ bơt bơtàu, drơng wơl, tam gơl pa, bơceh lơh, ai làng bol mờ mpồl lơh sa kă bro lơh tờm, lơh gơlik bơta niam ai làng bol mờ mpồl lơh sa kă bro in”.

Bulah gam uă bơta gơ kòl kờñ pal tă bơsong, uă bơnah broă pal tam gơl, mơya cồng nha bơh sơn rờp tàm broă lơh bơh gơnoar atbồ kâp sàh dê tàm càr Gia Lai ai gŏ, càr gam lòt di gùng. Bal mờ bơta crăp rơcang bơh kâp sàh, pơgồp bal kơnòl bơsong broă mờ tơl nă cau, tơl mpồl, gam geh bơta lòt bal, nền nòn bơh Anih duh broă Làng bol càr dê. Kơnờm bơh hơ̆, broă lơh bơh ală sàh dê gam geh tơnguh cồng nha ngai pah ngai, rơhời lơh gơlik ală tam gơl kơ̆ kơljap tàm broă đơng lam sàh.