Ngai 05/8, Đảng ƀộ Quân đoàn 34 bơyai lơh Pơrjum dờng cau ala mat dơ̆ 1, tơngai lơh broă bơh nam 2025 tus nam 2030. Quân đoàn 34 geh crơng gơs nam 2024 bơh bơta tơmut bal Quân đoàn 3 mờ Quân đoàn 4, lam lơh kơnòl broă bơh Tây Nguyên tus tiah đah jum mat tơngai lik dà lơgar. Tơngai lài, Đảng ƀộ Quân đoàn 34 neh sơrbac mhar pồ tơl mpồl lơh broă, rơhời đơs nền gơnoar broă là mpồl tờm ngan tàm mpồl phàu crong.

Mut tàm tơngai lơh broă pa, Đảng ƀộ Quân đoàn 34 đal git tơrgùm lam lơh 3 bơta tam gơl pràn kuơmàng; tơnguh bơta niam pơlam tàp, bơto bơtê cíñ trị, atbồ bồ tơngoh mờ bơtàu niam chài cau ling Wa Hồ tàm tơngai pa; lơh pràn bơt bơtàu di mờ jơnau sồr ngan ngồn, sơlơ sền gròi kơ̆ broă lơh jat jơnau pal jat, mpồl lơh broă ngac ngar, geh cồng nha, tam gơl wơl sră pơ àr gơnoar atbồ mờ tam gơl sồ; mờ kung sền gròi tus tơnguh pràn jak đơng lam bồ, bơta pràn lơh broă bơh mpồl lơh broă Đảng tàm ƀòn lơgar mờ bơta niam mpồl kwang bàng, đảng viên dê. Đơs tàm pơrjum, Thượng tướng ồng Võ Minh Lương, Thứ trưởng Ƀộ Ling klàng jờng rơ ală cồng nha bơh Đảng ƀộ Quân đoàn 34 dê tàm tơngai lơh broă lài neh lơh geh. Tềng đap jơnau sồr pa bè sền gàr dà lơgar mờ bơt bơtàu ling klàng tam gơl pa, Thứ trưởng sồr Quân đoàn pơn jat tai bơt bơtàu mpồl ling kơ̆ kơljap, pràn kơldang; crăp rơcang kơlôi sơnơng, tă pơgồp jơnau đơs mờ Ƀộ Ling klàng ală broă rơndap lơh pơgồp bal tam lơh dipal mờ broă lơh gơnoar atbồ 2 kâp.