Ngai 05/8, tàm Hà Nội, Thủ tướng Cíñ phủ ồng Phạm Minh Chính tus bal Pơrjum dờng cau ala mat Đảng ƀộ Ƀộ Bơt bơtàu dơ̆ 1, tơngai lơh broă bơh nam 2025 tus nam 2030. Mờ jơnau đơs “Tam klac bal – ring bal jơnau đơs – lơh jat jơnau pal jat – tam gơl pràn – bơtàu tơnguh”, Đảng ƀộ Ƀộ Bơt bơtàu tơngai lơh broă bơh nam 2025 tus nam 2030 đal git 6 kơnòl broă tờm; 3 bơta tam gơl pràn kuơmàng lơh gơlik bơta tam gơl pràn tàm bơtàu tơnguh rơndap tap sèng phan bơna, tiah drà mờ hìu ơm mpồl bơtiàn; lơh gơs jơnau kờñ tus nam 2030 gùt lơgar geh 5 rbô kơi sồ gùng ù gờl rơndeh lòt mhar; Kơlôi sơnơng tàm tơrbŏ bal ring bal ală broă lơh jun pơndiang, kuơmàng là ală anih ơhò ơm tàm dà lềng, anih ơhò ơm tàm dà tàm lơgar mờ ală gùng rơndeh ồs, gùng ù gờl; sồr lơh gơs jơnau kờñ 1 tơlak nơm hìu ơm mpồl bơtiàn tus nam 2030 jat ală jơnau lơh nền bơh Cíñ phủ dê…

Đơs tàm pơrjum, Thủ tướng ồng Phạm Minh Chính đơs niam mờ jờng rơ bơta lơh ngan dờng ngan mờ 9 mpồl cồng nha kuơmàng mờ Đảng ƀộ Ƀộ Bơt bơtàu neh lơh geh tàm tơngai lơh broă lài. Đơs ală jơnau bơsram mờng chài, Thủ tướng đơs sùm uă ngan jơnau bơsram bè tam klac bal, drơng wơl broă lơh ngac ngar mờ bơta geh ngan mờ sơlơ tơnguh tai bơta tam pà kâp, tam pà gơnoar gơ jat bal mờ sền sơ wì, jat sền. Thủ tướng sồr tềng đap mat, lồi nam 2025 pal lơh gơs 3 rbô kơi sồ gùng rơndeh lòt mhar, pơnđơl pràn lơh gơs gùng kềng gah dà lềng jat rơndap ù tiah. Thủ tướng kung sồr sền dờng màng broă tàm jàu măi mok, cau lơh broă ai gùng rơndeh ồs mờ gùng rơndeh ồs lòt mhar in. Tơnguh mhar tơngai lam lơh, bơta niam broă tam gơl tiah drà, bơtàu tơnguh phan bơna tiah drà jat gùng dà tam gơl pa, tiah drà tơlir, ngac ngar, gơ dờp mờ tam gơl nhơm trồ tiah.