Lơh sa mpồl bơtiàn càr Dăk Lăk pơn jăt tai geh tơngŏ niam. Càr Dăk Lăk gam tơrgùm tơrmù ală gơkòl lơh broă bơh gơnoar atbồ ƀòn lơgar bàr kấp dê, tơnguh uă cồng nha sồr lơh, đơng lam, lơh geh jơnau kờñ gơguh lơh sa 8% tàm nam 2025. Anih duh broă Làng bol càr Dăk Lăk pà git, bơdìh mờ kha gơguh pràn bơh lơh sa mờ măi mok, bơ̆t bơtàu, lơh sa suơn sre, brê bơnơm, phan tàm dà mờ tăc phan mờ lơgar bơdìh, den gah ròng phan càr dê kung neh jòi geh wơl bơta pràn tơnơ̆ mờ kòp gơtờp neh geh sền gròi niam.

Tàm hơ̆ uă ngan là Broă lơh tơn jơh hìu sèt, hìu ồm ñhăt dà mìu ai cau rơƀah in geh lơh pràn. Tus tŭ do, 100% khà hìu dong kờl neh geh lơh, rơlao 6 rơbô 900 nơm hìu neh lơh gơs mờ jào, geh mờr 78% khà broă geh ai, lơh ngan lơh gơs jơh ală hìu lài mờ ngai 15 nhai 8. Jăt ồng Tạ Anh Tuấn, Củ tịc Anih duh broă Làng bol càr Dăk Lăk pà git, bŭ lah bè hơ̆, nàng lơh geh jơnau kờñ gơguh lơh sa kờp jơh khà phan tàm càr gùt nam 8%, gơguh lơh sa 8,64% tàm 6 nhai lồi nam, kung gam là kơnòl broă kal ke ngan. Nàng gơtùi geh jơnau kờñ do, lài jơh pal bơsong ală gơkòl tàm broă lơh bơh gơnoar atbồ ƀòn lơgar 2 kấp dê; tơrmù bơta gơkòl, ờ niam tàm broă lơh tàm ală rơndăp broă lơh tờm, mờ tơnguh broă bơcri priă dà lơgar.