Ồng Bùi Viết Tiệm, ơm tàm kơnhoàl Chư Sê, càr Gia Lai, đơs là broă rơndăp tăp sèng mpồl lơh broă sră nggal gơnoar atbồ kấp càr ờ mìng là tŭ tơngai niam nàng tam gơl pa mpồl lơh broă sră nggal gơnoar atbồ lơm mờ gam là dơ̆ nàng sơlơ tơnguh tai bơta bơtàu tơnguh lơh sa, phan bơna bơt bơtàu:“Añ kơ̆p kờñ tơnơ̆ tŭ tơmŭt bal càr Gia Lai pa rơ̆p geh lơh niam wơl ală gùng lòt rê nàng tàm tơrbŏ bal niam rlau tai đah ală tiah kơh bơnơm Gia Lai mờ ù tiah ring Bình Định dê. Kơ̆p kờñ Dà lơgar pơn jat tai lơh ală broă lơh tơrmù rƀah, is ồn là mờ ală mpồl bơtiàn jơi bơtiàn dồ ết nă cau mờ làng bol tàm tiah sar lơgar ngài”.

 Quôk hội ngan ngồn ring bal jơnau lơh nền tàm pơrjum tơmŭt bal, tơrmù khà càr, ƀòn dờng tàm gùt lơgar bơh 63 gơmù gam 34 mpồl lơh broă sră pơ àr gơnoar ătbồ kâp càr mờ ndrờm bal. Jăt hơ̆, Dăk Nông rơ̆p geh tơmŭt bal mờ Lâm Đồng bal mờ Bình Thuận, gơgơs càr Lâm Đồng pa. Kwang bàng mờ làng bol càr Dăk Nông kung tơnggŏ bơta ring bal mờ kờñ bal uă ngan jơnau sồr do.

Ồng Phan Cự Tâm, Phó Củ tịc Anih duh broă Làng bol sàh tiah nhàr lơgar Dak Buk So, kơnhoàl Tuy Đức geh jơnau đơs bè do: “Dak Nông mờ Lâm Đồng là bàr càr geh bơta pràn bơtàu tơngguh bè lòt nhơl lơh broă sa sươn sre, tàm tŭ Bình Thuận là càr geh bơta ƀươn dà lềng. Tơnơ̆ tơmŭt bal den jơh bal 3 ƀòn lơgar rơ̆p bơtàu tơngguh gơgơs càr pa pas pràn bơh bơta ƀươn dà lềng tus tiah brê bơnơm jơnhoa. Jơh ală rơ̆p tàm tìp bal nàng bơtàu tơngguh bal”.