Jơh gùt càr Dăk Lăk geh 33 tiah pơrlòng, mờ rlau 22 rơbô 500 nă kơnòm pơrlòng. Gah bơto bơtê  càr dê neh pơgồp bal mờ ală gah broă geh gơnoar lam lơh ală gùng dà broă lơh gàr niam lơngăp lơngai, lơh geh ală bơta ƀuơn ngan ai cau pơrlòng in tàm jơh tŭ tơngai pơrlòng, is ồn là kơnòm pơrlòng tiah sar lơgar ngài halà kơnòm geh rài kis kal ke. Broă lơh “Dong kờl kàl pơrlòng” tàm càr Dăk Lăk geh bơyai lơh mờ bơta tus bal bơh rlau 1 rơbô nă ơruh pơnu dong kờl is.

Ală cau dong kờl is neh jơh nùs tus bal ală broă lơh, bè: bơto pơlam, tề lam cau pơrlòng jòi cơldŭ pơrlòng, lơh sră pơ àr tus bal pơrlòng, pà dà hùc, pà phan, sền gàr mờ gàr phan ờ sa priă ai kơnòm pơrlòng in; dong kờl ală phan ngui bơsram sră... Bal mờ hơ̆, tus bal sền gàr rơndăp tăp sèng, lơngăp lơngai gùng lòt rê tàm ală tiah lơh broă mờ ală tiah pơrlòng. Bơdìh hơ̆, broă lơh neh hòi jà geh rlau 1 rơbô 500 dơ̆ sào ờ sa priă, 50 thùng dà toh, gĭt nđờ jơ̆t rơbô khàr dà, pà ală cau pơrlòng in; mờ lơh kes priă pà 4 bơnah priă bơsram “Dong kờl kàl pơrlòng” kờp priă 2 tơlak đong tơl bơnah dong kờl ai ală kơnòm pơrlòng kal ke in.

 Càr Kon Tum geh rlau 5 rbô 300 nă cau tus bal pơrlòng jơh bơsram kâp pe. Jơh gùt càr rơndap lơh 14 anih pơrlòng mờ 244 cơldŭ pơrlòng, 28 cơldŭ kơp. Bơdìh hơ̆ tai, Gah bơto bơtê mờ bơsram mờ gơnoar atbồ ală tiah kung lơh tai 9 anih pơrlòng rơcang lài dilah geh bơta trồ tiah lơh aniai. Nàng gàr dơ̆ pơrlòng jơh bơsram kâp pe geh lơh lơngăp lơngai, nền nòn, di kơrnuat pơrlòng, càr Kon Tum neh ai rlau 1 rbô 200 nă kwang bàng, cau lơh broă sa priă nhai dà lơgar lơh broă lơh pơrlòng. Ală tiah tàm càr neh hòi jà tă pơgồp geh rlau 600 tơlak đong dong kờl rlau 1 rbô 800 nă cau pơrlòng geh rài kis kal ke. Bal mờ hơ̆, ală hìu bơsram kung neh rơcang wil tơl anih ơm, sàu sa ai ală cau pơrlòng jơi bơtiàn dồ êt nă cau ơm ngài anih pơrlòng in.

 Nam do, càr Gia Lai geh rlau 16 rơbô 200 nă cau pơrlòng cih mat dan tus bal pơrlòng. Jơh gùt càr ai 42 tiah pơrlòng mờ 718 cơldŭ pơrlòng. Gia Lai neh hòi jà 4 rơbô 500 nă kwang bàng, cau pơgru, cau lơh broă tus bal bơyai lơh pơrlòng. Broă lơh “Dong kờl kàl pơrlòng” tàm ală tiah kung neh crăp rcang tàm ală tiah pơrlòng. 2 rơbô 400 nă kơnòm pơrlòng kal ke tàm càr neh geh dong kờl mờ kờp jơh khà priă rlau 940 tơlak đong. Mìng is ƀòn dờng Pleiku geh ai, dong kờl tiah sa sào, tiah ơm rlô ai cau pơrlòng khat gơboh in.

Gùt càr Dăk Nông geh rlau 8 rbô 500 nă cau pơrlòng cih mat tus bal pơrlòng jơh bơsram kâp pe. Càr rơndap lơh 23 anih pơrlòng ngan ngồn mờ kờp jơh 380 cơldŭ pơrlòng, geh tam pà ndrờm bal tàm ală kơnhoàl, ƀòn dờng, nàng kờñ lơh gơlik bơta ƀuơn ngan rlau jơh ai broă lòt rê bơh cau pơrlòng dê, ngan là tàm tiah sar lơgar ngài.

 Dơ̆ pơrlòng nam do, càr Lâm Đồng geh mờr 17 rơbô nă cau pơrlòng tus bal cih mat dan pơrlòng. Càr ai 40 tiah pơrlòng mờ kờp jơh geh 719 cơldŭ pơrlòng. Kờp jơh kwang bàng tus bal bơyai lơh dơ̆ pơrlòng là rlau 2 rơbô 500 nă cau. Mờ bơta rcang lài nền nòn ngan bè kwang bàng, phan bơna mờ broă lơh ờs mờng bal mờ bơta pơgồp bal niam đah gah Bơto bơtê mờ ală mpồl lơh broă geh gơnoar, càr Lâm Đồng jơh nùs lơh ngan bơyai lơh dơ̆ pơrlòng lơngăp lơngai, niam, di mờ kơrnoat boh lam mờ lơh geh cồng nha uă ngan rlau jơh.