Drim ngai 30/05, tàm ƀòn dờng Buôn Ma Thuột, Mpồl Sồr lơh rơcăng kơryan bơta aniai iù jràu càr Dăk Lăk bơyai lơh pơrjum cribơyai mờ lam lơh jăt Ngai Dunia ờ iù jràu ngai 31/05, Tơngleh Dà lơgar ờ ìu jràu bơh ngai 25 tus 31/05. Pah nam dunia geh rlau 8 tơlak nă cau chơ̆t tài iù jràu, tàm hơ̆ 1 tơlak 300 rbô nă cau gơrềng bơh chu jràu. Hoàc hươr lơh sa tàm Việt Nam tài iù jràu kờp dŭ rlau 108 rbô tơmàn đong.

Càr Dăk Lăk neh lơh pràn mblàng yal, lơh gơs broă lơh tơrlòng lài tiah ờ ñhŭ jràu tàm uă anih. Kơnờm bè hơ̆, 2 nam do, khà cau klau chu jràu geh gơmù, mơya khà ngui jràu điện tử gơguh uă ngan, ngan là tàm rơnàng kơnòm să bơh 15 tus 24 sơnam. Anih lơh broă lơh sơnơm yal tơngkah lài bơta lơh pơrlồm bơh iù jràu pa dê lơh bol kơnòm dềt ƀươn tồn lah là ờ huan aniai, bulah kung gam geh sơl sơnơm nicotine mờ uă dà sơnơm khih sơbơng roh ndai.